31
1 “Geela7o xeellada amottonna mela,
taani ta ayfiyara caaqetas.
2 Bollan de7iya Xoossaa matape asas imetida qaaday aybee?
Salon de7iya Ubbaa Danda7iya Xoossay asas immiya gishoy aybee?
3 Iitata bolla boshi, bala ootheyisata bolla gadoy
gakanaysi eretidaba gidenneyee?
4 Xoossay ta ogiya ubbaa be7eneyee?
ta tanguwa ubbaa taybeneyee?
5 “Taani wordon de7idaba gidiko,
ase cimmidaba gidiko,
6 Xoossay tana like mizaanen mazzano;
yaatidi ta xillo gideysa be7o.
7 Ta hemethay ogepe keydaba gidiko,
ta wozanay ta ayfey xeellidaba amotidaba gidiko,
ta kushey nagaran tunidaba gidiko,
8 ta dolay shodetidi dhayo;
ta zeridaysa hari mo.
9 “Ta wozanay hara maccas amotidaba gidiko,
woyko taani ta shooruwa machiw geeddidaba gidiko,
10 ta machiya hara asas gaacco;
iira hara addey aqo.
11 Hessi yeellayiya nagaras koshshiya
gita pirda.
12 Ha nagaray tamada xuuggiyaba gidiya gisho,
ta aquwa ubbaa dhaysanashin.
13 “Ta adde woyko ta macca aylleti abeeti gin,
entaw pirdonna ixidaba gidiko,
14 Xoossa sinthan ta pirdas shiiqiya wode waananee?
I tana oychiya wode taani woyga zaaranee?
15 Tana medhida Xoossay enta I medhibeneyee?
Nuna ubbaa nu aaye ulon medhiday issi iya gidenneyee?
16 “Taani manqoti woossidaba diggidaba gidiko,
woyko am7eta minthethonna aggidaba gidiko,
17 yi7o nayti mela aqiya wode be7ashe, taani tarka midaba gidiko,
18 Taani enta ta na7atethafe doomada enta aawada dichas;
ta yeletoosope doomada am7eta maaddas.
19 Ma7oy dhayin meegoy wodhiya uraa,
woyko kallo de7iya metootanchuwa be7ada,
20 ta dorsata ikisepe oosetida ma7o mayzin,
tana anjona biday de7iko,
21 Taani mooton enta shatimmanaysa erada,
yi7o nayta naaqidaba gidiko,
22 ta qesey kuriyape me77o;
ta kushey hashiyape kareti wodho.
23 Xoossaa hanquwa yayyida gisho
hessa oothanaw danda7ike.
24 “Taani worqan ammanetidaba gidiko,
woyko walahi bayna worqaa ‘Ta ceeqoy nena’ gidaba gidiko,
25 Ta duretetha darotethan,
ta kushey demmida wodhen ufaytidaba gidiko,
26 Awa phoolethi be7ada,
woyko ageena lo77otethi xeellada,
27 ta wozanay geeman enta nashshibeenna,
woyko ta enta yeerada goyinnabike.
28 Hessi pirda ehiya nagara gidiya gisho
Xoossaa kaddas guussu.
29 “Ta morketa kundethan ufaytabike;
enta gakida metuwan hashshu gabike.
30 ‘Ta morkey dhayo’ yaaga baaddada,
nagara oothabike.
31 Ta soo asay, ‘Iya son
kathi midi kallonnay oonee?’ yaagidi markatoosona.
32 Ta soy ubba wode dooya gidiya gisho,
oge asi karen aqi erenna.
33 Harati ootheysada,
ta nagaraa ta wozanan genthabike.
34 Asa pokos yayyada,
enta boriyas dagammada,
soo gelada qosetida wodey deenna.
35 “Tana si7iya asi de7eerenneshin,
Ta oday tuma gideysa paramayis;
Ubbaa Danda7iya Xoossay taw zaaro immo
Ta morkey ba mootuwa xaafidi shiishin
ta be7arkinashin.
36 Be7iyako woytoda qoodhen aathada ma7anashin,
Kallachada ta huuphen wothanashin!
37 Taani maati de7iya asada xoossaako shiiqada,
ta oothidaba ubbaa iyaw qoncisanashin!
38 “Ta goshsha biittay ta bolla waassidaba gidiko,
daasatika afuthan laakidaba gidiko,
39 he biittan kaxidaba miishe qanxonna ekidaba gidiko,
woyko he biitta ootheyisata koshan wodhidaba gidiko,
40 taw he biittan giste gisho agunthi,
banga gisho sharaafi dolo” yaagis.
Iyyoba oday hessan poletis.