33
1 Iyyoba, ha77i ta odaa si7a;
ta giyaba ubbaa hayza.
2 Taani ta doona dooyas;
ta qaalati ta inxarsaa xeeran de7oosona.
3 Ta qaalati ta wozana suuretetha qoncisosona;
ta ereysa ta inxarsay tumatethan odees.
4 Tana medhiday Xoossaa Ayyaana;
Ubbaa Danda7iya Xoossaa shempoy taw de7o immis.
5 Ne danda7iko taw zaaro imma;
nena giigisada taara palama.
6 Taani Xoossaa sinthan ne mela;
taanika urqafe medhetas.
7 Neeni taw yayiya gaasoy baawa;
taani nena naaqike.
8 “Ne haasaya ubbaa taani si7ashe gam7as;
ne doonape keyida qaalata hayzas.
9 Taani geeshshinne borey bayna asi;
taani xillonne nagara oothaboonna asi.
10 Shin Xoossay tana seeranaw gaaso koyees;
I tana ba morkeda taybees.
11 Ta tohuwa duxis;
ta tango ubbaa I wochees” yaagadasa.
12 “Iyyoba, ne oday like gidenna;
ta new odayis, Xoossay asape aadhees.
13 ‘Xoossay asa odaas zaaro immenna’ gada,
ayis iyara palamay?
14 Asi akeekennafe attishin,
Xoossay dumma dumma ogera odees.
15 Asi qamma hiixan zin7idi,
dhisko eeyidi de7iya wode,
Xoossi amuhoninne qoncethan odees.
16 He wode asay si7anaada haythe dooyees;
ba seeran enta daganthees.
17 Yaatidi asi nagara oothonna mela teqees;
otoro asape diggees.
18 Xoossi ase dhayope ashshees;
hayqopeka naagees.
19 Asi hargetidi hiixan de7ishin,
iya meqethaa garsan qanxonna saho yeddidi seerees.
20 Hessada hanidi hargida uray kathi ixees;
daro mal7o kathi iya shaatees.
21 Iya ashoy gilqidi wurees;
iya asatethay melin meqethi taybetees.
22 Iya shempoy duufoko,
iya de7oy hayqo kiitanchotako matees.
23 “Asas suure ogiya bessiya
mukulun taybetiya kiitanchotape
issoy iya maaddanaw danda7ees.
24 Iyaw qadhetidi, ‘I duufo gelonna mela iya ashsha;
taani iya woziyaba demmas;
iya aggaaga’ yaagidi hayqos odees.
25 Hessa gisho, iya asatethay na7a asatethi gidana;
iya yalagatetha wolqay iyaw simmana.
26 He wode I Xoossaa woossana;
Xoossay iya woosa si7ana;
Xoossay iyaw iya xillotethaa zaariya gisho, I ufaysan Xoossaa goyinnana.
27 He wode asa sinthan I haysada yaagidi yexana;
‘Taani nagaraa oothas; suureba geellayas;
shin Xoossay ta hanuwa taw qanxibeenna.
28 Ta duufon gelonna mela tana ashshis;
ha77i paxa de7ada poo77o be7ayis’ yaagana.
29 “Heko, Xoossi asas hessa ubbaa
zaari zaari oothees.
30 I de7o poo7o be7ana mela,
iya shempuwa duufope ashshees.
31 “Iyyoba, taani odeysa hayzada si7a;
ane ne si77i ga; taani odetana.
32 Ne odanaw koyaabay de7iko oda;
taani ne xillo gideysa be7anaw koyayis.
33 Atto giiko si77i gada, ta haasaya si7a;
ta nena cincatethi tamaarsana” yaagis.