Yoonasa Maxaafa
Gaatha Qofa
Yoonasa Maxaafay, hara nabe maxaafatape dumma maxaafa. Ha maxaafay, Yoonasi Xoossa kiita ixas gidaysanne guyepe kiitetida taarike odeesipe attishin, sinthara yaanaba odenna.
Yoonasi Isra7eeles mata morke gidida Asoore waanna katama Nanawe kiita ekidi bana mela Xoossi kiittis. Shin Yoonasi he deriyas markatidi simmin, Xoossay he katama maaranaysa eriya gisho, baanaw koybeenna. Hanoshin, dumma duma hanotatape guye, wolqan yaa bis. Yoonasi kiitetidi simmin Nanawe asay banta nagara paaxidi Godaako simmidosona. Goday enta maaris.
Ha maxaafan, wursetha shempuwan Xoossay Yoonasa tamaarsanaw naagetonaba oothidi tamaarsidaysa bessees. Wursethan, Godaas ba medhetetha bolla gita maati de7eysa, I maariya Xoossi gideysanne hari attoshin, ba asaa morketaka maariya Xoossi gideysa qoncisees.
Maxaafa Ayfe Qofata
Yoonasi Xoossafe baqatanaw dendis (1:1-7)
Yoonasa woosa (2:1-10)
Nanawe asay Xoossako simuwa (3:1-10)
Xoossa maarotanne Yoonasa yiluwa (4:1-11)
1
Yoonasi Xoossafe Baqatuwa
1 Godaa qaalay Amaate na7aa, Yoonasas haysada yaagidi qoncis. 2 “He katama asa iitatethay ta sinthe gakida gisho, dendada hini wolqaama katama Nanawe bada sabbaka” yaagis. 3 Shin Yoonasi Godaa sinthafe betidi Tarsesa biitta baanaw keyis. I, Yoophe katama wodhidi Tarsesa biya markabe demmis. Godaa sinthafe betanaw koyidi Tarsesa baanaw koshshiya miishe ciggidi markabiyan gelis. 4 Shin Goday abba bolla wolqaama carkuwa denthis. Abban wolqaama hobbey wolqaamida gisho markabiya meqanaw gakasu. 5 Yaatin markabiya oosanchoti yayyidosona. Issoy issoy ba xoossaako ba xoossaako waassis. Qassi markabey kawuyana mela giddon de7iya caana denthidi abban yeggidosona. Shin Yoonasi markabiyas giddo gelidi wolqaama dhisko dhiskis. 6 Markabiya laaggeysi iyako shiiqidi, “Haysa mela saaten waana dhiskay? Denda ne xoossa woossa! Ooni eri I nuus qadhetidi nuna ashshanekonne” yaagis.
Yoonasi Abban Yegetis
7 Markabiya oosanchoti issoy issuwako, “Haa yiite, ha iitabay nuna oodde gaason gakidaako eranaw saama yeggana” yaagidosona. Saama yeggin, saamay Yoonasa bolla wodhis. 8 Enti Yoonasako, “Ha iitabay oodde gaason nu bolla gakidaako ane nuus oda. Ne oosoy aybee? Awupe yadii? Ne biittay awee? Neeni oodde baggee?” yaagidi oychidosona. 9 Yoonasi zaaridi, “Taani Ibraawe asi; abbanne biitta medhida Godaa, salo Xoossa goyinniya asi” yaagis. 10 I entaw koyrottidi odidaysada I Godaa sinthafe beteysa eridosona. Hessa gisho, enti yayyidi, “La ayba palaba oothadi” yaagidosona. 11 Abbaa hobbey kaseysafe haa darida gisho asati Yoonasa, “Nuus abbay si77i gaana mela nena nuuni waatino?” yaagidi oychidosona. 12 Ika, “Ha wolqaama hobbey hinte bolla dendiday ta gaason gideysa taani erayis. Hessa gisho, tana ekidi abban yeggite. Yaatiko abbay hintew si77i gaana” yaagis. 13 Shin markabiya oosanchoti markabiya gaxa kessanaw gita pidhidosona. Shin abba hobbey haa darida gisho gaxa kessanaw danda7ibookona. 14 Hessa gisho, enti Godaako, “Abeeti Godaw, haa ura shempuwa gisho, neeni nuna dhaysonadanne ha geeshsha suutha acuwa neeni nuupe achonada nuuni nena minthidi woossoos” yaagidi Godaa woossidosona. 15 Hessafe guye, Yoonasa denthidi, abban yeggidosona. Abbaa hobbayka si77i gis. 16 Yaatin asati Godaas daro yayyidi yarsho yarshidosona; iyaw qangidosona. 17 Yoonasa mittana mela issi gita molo Goday giigisis. Yoonasi he moluwa ulon heedzu gallasinne heedzu qamma gam7is.