1 Yihuda kochaas enta kochan kochan shaaketida biittay Edoomen zawatidi, dugeha baggan de7iya Xiine mela biitta wursethaa gakees. 2 Dugeha baggan enta zaway Maxine Abbaafe dugeha baggan wursetha gaxa gakees. 3 Akraabima Pinuwa kanthidi, Xiinepe bidi, Qaades-Barnes dugeha bagga gakees. Qassi Hexroona kanthidi, Adaare keydi, Qarqako simmees. 4 Hessafe qassi Aximoona kanthidi, Gibxe shaafa gakidi, Medetiraane Abban zawatees. Dugeha baggan de7iya Yihuda zaway hessa.

5 Doloha bagga zaway Maxine Abbaa bidi, Yordaanose shaafa wursethaa gakees. Pudeha bagga zaway qassi Yordaanose shaafay geliyasuwap bidi, 6 Beet-Hogila keyees. Yaape Beet-Araba baggara kanthidi, Robeela na7aa Bohaana qofiso shuchan zawatees. 7 Yaape zaway Akoora Zangaarape Dabira keyidi, zangaarape dugeha baggan de7iya Adumima Pinuwa sintha baggan aggidi pudeha baggara Galgala simmees. Hessafe qassi Enshemeshe pultuwa kanthidi, Enrogeelan zawatees. 8 Hessafe Hinooma Zangaara kanthidi, Yaabuseta katama gidida Yerusalaame dugeha baggaa gakees. Kaallidi zaway Hinoome Zangaarape wuloha baggan de7iya zumaa huuphiya keyidi, pudeha baggan Raafayme Zangaara gakees. 9 He zumaa huuphiyape bidi, Naftooha pultuwa kanthidi, Efroona zumaa bolla de7iya katamatako keyees. Hessafe qassi Ba7aala woyko Qiriyat-Yi7aarima simmees. 10 Baala pudeha baggara zawaydi, Sayre zumako wuloha bagga mirqetidi, Yi7aarime woyko Kisaloone deriya gakidi, iyape duge Beet-Sameesa wodhidi, Timina pinnees. 11 He zaway Eqroona pudeha baggara kanthidi, Shikroona mirqetidi, Baala zumaara bidi, Yabni7eelan zawatees. He zawa wursethay Medetiraane abba gididi, 12 wuloha bagga zaway Medetiraane abbas gaxa gidees. Yihuda kochay de7ida biitta zaway haysa.

13 Goday kiitidaysada, Iyyasuy, Yoofona na7aa Kaaleba gakiya laata Yihuda biittafe Qiriyaat-Arba geetetiya Kebroona immis. Arbi Anaaqe aawa. 14 Kaalebi Anaaqe kochata, Sesaya, Akmaananne Talmaya geetetiya heedzata Kebroonape kessis. 15 Hessafe dendidi, Dabiran de7iya asaa olanaw bis. Dabira katamay kase Qiriyat-Sefera geetetees. 16 Kaalebi, “Qiriyat-Sefera olidi, oykiya addiyas taani, ta na7iw Akiso immana” yaagis. 17 Yaatin, Kaaleba ishaa Qanaza na7ay, Gotoniyali he katama olidi oykin, Kaalebi ba na7iw Akiso iyaw immis.

18 Aksa Gotoniyala geliya wode I aaway iw gade immanaada woossana mela Gotoniyali iyo zoris. Iya baqulo bollafe wodhin, Kaalebi iyo, “Ay koyay?” yaagidi oychis.

19 Iya zaarada, “Ne kase taw woytida biittay mela biitta gidiya gisho, haatha pultoy de7iya biitta taw gujada immarki” yaagasu. Yaatin, Kaalebi qommoninne garsan de7iya pulto haatha iw immis.

20 Yihuda kochati banta kochan kochan ekida laatay haysafe kaallidi xaafetidaysa. 21 Dugeha baggan Edoome gaxan de7iya Yihuda katamati, Qabdu7eela, Edera, Yaagura, 22 Qiina, Dimoona, Adaada, 23 Qaadesa, Haxoora, Yitinaana, 24 Ziifa, Xelema, Baalota, 25 Haxoor-Hadaata, Qiriyot-Hexiroona woyko Haxoora, 26 Amaama, Shama7a, Moloda, 27 Haxar-Gaade, Heshmoona, Beet-Palexa, 28 Haxar-Shu7aala, Barsaabeh, Biziyoota, 29 Ba7aala, Iyuma, Exema, 30 Eltolaada, Kesila, Horma, 31 Xiqilaaga, Madmaana, Sansana, 32 Lebawoota, Shilihaama, Aynanne Irmoona. Ha katamati banta gutatara issife laatamanne uddufuna.

33 Wuloha baggan zuma xaphon de7iya katamati, Eshta7oola, Xor7a, Ashina, 34 Zanoha, Enganima, Tapuha, Enama, 35 Yarmuta, Adulaama, Sooko, Azeeqa, 36 Sha7irayma, Aditayma, Gederanne Gederotayma. Ha katamati banta gutatara issife tammanne oydda.

37 Qassi hara katamati, Xinana, Hadasha, Migidaal-Gaade, 38 Dil7ana, Mixipha, Yoqiti7eela, 39 Laakiso, Boxiqaata, Egloona, 40 Kaboona, Lahimaasa, Kitiliisha, 41 Gederoota, Beet-Daagona, Na7imaananne Maqeda. Ha katamati banta gutatara issife tammanne usupuna.

42 Qassi Libina, Etera, Ashena, 43 Yiftaahe, Ashina, Nexiba, 44 Qa7ila, Akziibanne Mareesa. Ha katamati banta gutatara issife uddufuna.

45 Hessadaka, Eqroona katamay ba gutaara yan de7ees. 46 Eqroonape wuloha baggan Ashdooda katamaynne iya gutati de7oosona.

47 Qassi Ashdoodanne Gaaza katamati banta gutatara bidi, Gibxe shaafa zawanne Medetiraane abba lanqiya gakanaw de7oosona.

48 Derey dariya katamati, Samira, Yatira, Sooko, 49 Daane, Qiriyat-Sefera woyko Dabira, 50 Anaaba, Eshtamoo7a, Anima, 51 Goshena, Holonanne Gilo. Ha katamati banta gutatara issife tammanne issino.

52 Qassi Araba, Duma, Esh7ana, 53 Yanima, Beet-Tapuha, Afeeqa, 54 Humixa, Kebroona woyko Qiriyat-Arbanne Xi7oora. Ha katamati banta gutatara issife uddufuna.

55 Qassi Ma7oona, Qarmeloosa, Ziifa, Yuuxa, 56 Izra7eele, Yoqidi7aama, Zanoha, 57 Qayna, Gib7anne Timina. Ha katamati banta gutatara issife tamma.

58 Hessadaka Halhula, Beet-Xura, Gadoora, 59 Ma7irata, Beet-Anotanne Eltiqoona. Ha katamati banta gutatara issife usupuna.

60 Qassi Qiriyaat-Ba7aale woyko Qiriyat-Yi7aarimanne Raaba. Ha katamati banta gutatara issife nam7a.

61 Mela biittan qassi Beet-Araba, Midina, Sekaka, 62 Nibishaana, Maxine katamaanne Engaade. Ha katamati banta gutatara issife usupuna.

63 Gidoshin, Yihuda asay Yerusalaamen de7iya Yaabuseta gooddidi kessanaw danda7ibookona. Hessa gisho, Yaabuseti hachi gakanaw Yerusalaamen Yihuda asaara issife de7oosona.