1 Issi asi ba be7idaba woyko ba eriyaba markatana mela oyshetidi markatonna ixiko he uray nagara oothida gisho seereto.

2 Issi asi eronna de7ishe tunabaa, hessika, hayqida do7a woyko mehe woyko sa7ara gooshetiya do7ata bochiko, hessi tuna gideysa I eronna ixikoka tuna gidiya gisho bala gidees.

3 Issi asi eronna de7ishe asa asatethafe goggidi tunisiyaba bochiko, hessi tuna gideysa I eronna ixiko, tuna gidiya gisho bala gidees.

4 Issi asi iitaba gidin lo77oba oothanaw eeson caaqikonne ba caaqidaysa dogidi, guyepe I akeekida wodepe doomidi bala gidees.

5 Issi asi ha odetida balatape issuwa oothidaba gidiko ba oothida nagaraa paaxo. 6 I ba oothida nagaraa gisho Godaas ba mehiya giddofe macca dorse woyko macca deeshe nagaraa yarsho oothidi shiisho. Kahiney ekidi he uraa nagaraa qushethas yarshana.

7 Issi asi ba oothida nagaraa gisho yarshanaw dorse woyko deeshe shammanaw iyaw gatey gakonna ixiko nam7u kuraachota woyko nam7u holleta, issuwa nagara yarshos qassi issuwa xuussa yarshos oothidi Godaas eho. 8 I enta kahiniyas immo; kahiney nam7u holletape issuwa qoodhiya mirqidi duuthonnashin, nagara yarsho oothidi shiisho. 9 Yaatidi suuthaafe guuthara ekidi, yarsho bessa matan wurxo; attida suuthaa yarsho bessa garsan gusso; hessi nagara yarsho. 10 Hanko holliya qassi higgey kiiteysada xuussa yarsho oothidi xuuggo. Kahiney haysada oothidi, uray oothida nagaraa qushisanaw yarsho yarshees; he uraa nagaray atto geetetana.

11 Shin issi asi nam7u holle woyko nam7u kuraacho ehanaw gatey gakonna ixiko, issi kilo giraame lo77o dhiille ba nagaraa gisho yarsho oothidi eho. He dhiilley nagara yarsho gidiya gisho zaytey woyko ixaaney iya bolla guzhetofo. 12 I hessa ehidi kahiniyas immo; kahiney he dhiilliyafe issi kuuca ekidi, Godaas shiiqiya katha yarshuwara gathidi, qofiso oothidi yarsho bessan xuuggo; hessi nagara yarsho. 13 Issi asi ha nagaratape issuwa oothiko haysada oothidi iya nagara qushisees; he uraa nagaray atto geetetana. He yarshuwafe attidaysi katha yarshuwada kahiniyas gido.

14 Goday Museko haysada yaagis; 15 Oonika Godaa naaqikonne geeshsha miisheta tunisidi qoponna nagara oothiko ba naaquwas ba mehiya giddofe borey bayna issi maraze Godaas eho. Iya gatey geeshsha dunkaanen eretida mizaane ginan cigeto; hessi naaqo yarsho. 16 I geeshsha miisheta bolla nagara oothida gisho koyro cigganaw bessiya gatiya bolla xeetape laatamu kushe gujidi kahiniyas immo. Kahiney hessa maraziyara gathi yarshidi uraa naaquwa qushisees; iya nagaray atto geetetees.

17 Issi asi qoponnashin, Godaa kiitatape issuwa menthidi nagara oothiko I hessa eronna ixikoka bala gidiya gisho ba nagaran seereto. 18 I ba mehiyape borey baynanne gate kunthiya issi maraze naaqo yarshos kahiniyako eho. Kahiney he maraziya yarshidi uraa naaquwa qushisees; iya naaqoy atto geetetees. 19 I tumape Godaa naaqida gisho hessi naaqo yarsho.