1 Goday Museko haysada yaagis. 2 Isra7eele asa ubbaas haysada yaagada oda; “Taani, Goday, hinte Xoossay, geeshshi gidiya gisho, hinteka geeshshi gidite.

3 “Hintefe issoy issoy ba aawanne ba aayiw boncho; ta Sambaata bonchite. Taani Godaa, hinte Xoossaa.

4 “Tana aggidi eeqata goyinnofite; woyko biratape oosetida xoossata hintew oothopite. Taani Godaa, hinte Xoossaa.

5 “Hinte issifetetha yarsho Godaas yarshiya wode he yarshoy hinte gisho eketana mela besseysada yarshite. 6 He yarshoy hinte yarshida gallas woyko wontetha gallas meeteto; heedzantho gallas gakanaw attiday de7iko taman xuugeto. 7 Heedzantho gallas meetetiko, hessi tunisiyaba; taani hessa ekike. 8 Hessa miya oonika Godaas geeshshi gididaba tunisida gisho ba nagaran oyshetana. He uray ba asaa giddofe kuretto.

9 “Hinte gaden kaxida kathaa hinte cakiya wode gadiya gaxaa gakanaw de7eysa cakofite; caki simmin de7iya poshiliya qoropite. 10 Ne woyne ayfiya maxiya wode mithaa bolla qosetidi attidaysa woyko sa7an wodhida woyne ayfiya maxopa. Hessa manqotasinne bete asaas aggaaga. Taani Godaa, hinte Xoossaa.

11 “Kaysotopite.

“Wordotopite.

“Issoy issuwa cimmofite.

12 “Ta sunthan wordo caaqofite; hinte Xoossaa sunthaa tunisopite. Taani hinte Godaa.

13 “Ne shooruwa bolla gene oothofa; woyko iya bonqofa.

“Une oothiya uraa damooziya diggada, issi qammaka ne matan aysopa.

14 “Tulliya cayopa; woyko qooqiya sinthan dhube wothofa, shin neeni Xoossas yayya. Taani ne Godaa.

15 “Pirda geellayopite; manquwa iya manqotetha gisho maaddada pirdofa; duriya iya duretetha gisho yayyada aggofa. Shin ne shooruwas suure pirda.

16 “Ne asaa giddon iita zigirsi ekada yuuyopa.

“Ne shooruwa hayqos gathiyaba aykoka oothofa. Taani ne Godaa.

17 “Ne ishaa ne wozanan ixofa. Ne shooruwa gaason ne nagara oothonna mela iya hanqa.

18 “Halo keyopa; ne asaape issuwa bollaka shifopa. Shin ne shooruwa ne huupheda dosa. Taani ne Godaa.

19 “Ta kiitata naaga.

“Issi qommo mehe hara qommo mehera biraysisopa.

“Issi shooqan nam7u qommo zerethi zeropa.

“Nam7u qommofe oosetida ma7o ma7ofa.

20 “Issi asi azinas oyshetada de7ishin, wozo miishey imetidi wuronnashin woyko la77a keyonnashin, he ayllera aqiko enti seeretanaw bessees, shin enti hayqanaw bessenna. 21 Gidoshin, he uray ba naaqo yarshos gidiya maraze Geeshsha Dunkaaniya pengen Godaa sinthe eho. 22 Kahiney he naaqo yarsho maraziya ekidi, ura nagara atotethas Godaa sinthan yarshees; iya nagaray atto geetetana.

23 “Hinte Kanaane biitta geliya wode ayfe immiya ay qommo mithi tokikoka, he mithaa ayfey meetetonna mela digetidaysa akeekite. Heedzu laythi wurana gakanaw he mithaa ayfey meetetofo. 24 Oyddantho laythan he mithaa ayfey Godaas galatas shiiqiya geeshsha yarsho gidana. 25 Ichashantho laythan he mithaa ayfiya miite. Hinte hessada oothiko, hinte mithaa ayfey darana. Taani Godaa, hinte Xoossaa.

26 “Suuthi iya giddon de7iya asho moopite. Marotopite woyko bitopite.

27 “Hinte huuphe binaana garsara yuushshi aathidi ciiropite; hinte buuchaa yuushshi aathidi meedopite.

28 “Hayqida asa gisho hinte asatethaa gaaropite; woyko cacha beeta hinte asatethaa bolla medhofite. Taani ne Godaa.

29 “Biittiya laymatethaninne tunatethan kumonna mela ne macca na7iw laymatethas aatha immada tunisopa.

30 “Ta Sambaata bonchite; ta goyinnetiya bessaa bonchite. Taani Godaa.

31 “Moytille odisiya asaako woyko marotako boopite; hinte tunonna mela enta koyopite. Taani Godaa, hinte Xoossaa.

32 “Dondza asinne cima asi be7iya wode uttida bessaafe denda eqada enta boncha; ne Xoossaas yayya. Taani Godaa.

33 “Hinte biittan de7iya bete ase sugopite. 34 Hinte biittan de7iya bete asi hinte gade asada xeellite; iya hinte huupheda dosite. Hinte kase Gibxe biittan bete asi gididi de7ideta. Taani Godaa, hinte Xoossaa.

35 “Hinte wadhiyaban, makiyabaninne mizaanen wordotopite. 36 Hinte mizaaney, hinte makiyabaynne wadhiyabay issino gido. Taani hintena Gibxe biittafe kessada ehida Godaa hinte Xoossaa.

37 “Hinte ta higgiyanne ta kiitaa ubbaa naagitenne oothite. Taani Godaa.”