1 Goday Museko, “Kahine gidida Aarona adde naytas haysada yaagada oda. Hintefe oonika 2 ba mata dabbo, ba aaye, ba aawa, ba adde na7aa, ba macca na7e, ba ishaa, 3 woyko azina gelonna, iya son de7iya ba miche aha gidonna ixiko, hayqida asa aha bochidi bana tunisopo. 4 Ekoninne gelon dabbotida asa aha bochidi bana tunisopo.

5 “Kahineti kayos banta huuphiyanne banta buuchaa meedopo; woyko banta asatethaa gaaropo. 6 Enti Godaas xuussa yarshonne katha yarsho shiishiya kahineta gidiya gisho banta Xoossaas geeshshi gido; banta Xoossaa sunthaa tunisopo. Hessa gisho, enti geeshshi gidanaw bessees.

7 “Kahineti banta Xoossaas geeshshi gidiya gisho, kahineti layma maccasi, geela7o gidonna maccasi woyko azini yeddida maccasi ekofo. 8 Kahineti hinte Xoossaas katha yarsho yarsheyisata gidiya gisho, hinte enta geeshshi oothidi ekite. Hintena geeshshiya Goday, taani, geeshshi gidiya gisho, enti geeshshi gido. 9 Kahiniya na7iya laymatada bana tunisiko, iya ba aawa kawushasu; iya taman xuugetada hayqo.

10 “Kahine halaqay, iya huuphen tiyo zaytey gukidaysinne kahinetetha ma7uwa ma7anaw dummatidaysi, ba huuphiyape xaatha qacciya denthofo; ba ma7uwa daakofo. 11 Ahi de7iya soo gelopo; hari attoshin ba aawa woyko ba aaye aha gidikoka, hessa bochidi bana tunisopo. 12 Iya dummayanaw tiyida Xoossaa zaytey iya bolla de7iya gisho, kahiney Geeshsha Dunkaaniyape keyopo; Geeshsha Dunkaaniya tunisopo. Taani Godaa.

13 “I ekiya machiya geela7o gido. 14 Azini hayqida maccasi woyko azini yeddida maccasi woyko layma maccasi macho ekofo. Shin ba asaa giddofe geela7o macca na7a dooridi macho eko. 15 Hessi hanonna ixiko, ba asaa giddon ba nayta tuna oothees. Taani iya geeshsheysa, iya Godaa.”

16 Goday Museko haysada yaagis. 17 “Neeni Aaronas haysada yaagada oda; ne kochaafe asatethan borey de7iya oonika katha yarsho taw yarshanaw bessenna. 18 Asatethan borey de7iya asi, hessika qooqe woyko wobbe woyko som7oy iitida asi woyko laqoy de7iya asi, 19 woyko tohoy woyko kushey silida asi, 20 woyko kuuna asi woyko daro qantha asi woyko ayfe mulca asi woyko puusoy oykida asi woyko iralley de7iya asi woyko shuufa asi taw katha yarsho yarshanaw bessenna. 21 Kahiniya Aarona kochaafe asatethan borey de7iya asi oonika Godaas xuussa yarshonne katha yarsho shiishanaw yarsho bessa yaanaw bessenna. 22 I geeshsha kathaanne Ubbaafe geeshshi gidida ba Xoossaa kathaa maanaw danda7ees. 23 Shin iya asatethan borey de7iya asi gidiya gisho, I ta Dunkaaniya tunisonna mela magarajuwako woyko yarsho bessaako shiiqopo. Entana geeshshiya Goday tana.”

24 Musey hessa ubbaa Aaronas, iya adde naytasinne Isra7eele asa ubbaas odis.