1 Goday Museko haysada yaagis; 2 Isra7eele asaas haysada yaagada oda; Geeshsha shiiqo yaagidi awaajishe, hinte bonchanaw bessiya eretida Godaa ba7aaleti haysata.

3 Hinte usupun gallas ooso ootheeta, shin laapuntha gallasay hinte shempiya Sambaata gallas. He gallas geeshsha shiiqo shiiqite; ay oosoka oothopite; hinte de7iya bessa ubban hessi Godaas Sambaata.

4 Enta woden woden geeshsha shiiqo oothidi hinte bonchanaw bessiya eretida Godaa ba7aaleti haysata; 5 Koyro ageenan tammanne oyddantho gallas sa7i omarsiya wode Godaa Paasikay doomees.

6 He ageenan tammanne ichashantho gallasan Godaas Uytha Ba7aale gallasay doomees. Hessa gisho, laapun gallasatan irshoy geliboonna uythi miite. 7 He gallasatape koyro gallas geeshsha shiiqo shiiqite; ooso oothopite. 8 Laapun gallas ubbaa Godaas xuussa yarsho yarshite; laapuntha gallasan geeshsha shiiqo shiiqite; ooso oothopite.

9 Goday Museko haysada yaagis; 10 Isra7eele asaas haysada yaagada oda; taani hintew immiya biitta gelidi hinte kathi cakiya wode, he kathaa koyro mirqiya kahiniyas ehite. 11 Goday hintebaa ekana mela Sambaata kaalliya wontetha gallas kahiney he mirqiya Godaa sinthan dhoqu oothidi yuushsho. 12 Hinte mirqiya yuushshida he gallas borey bayna issi laytha maraze xuussa yarsho oothidi Godaas shiishite. 13 He yarshuwara issife shamaho zaytera munuqetida nam7u kilo giraame lo77o dhiille katha yarsho oothidi shiishite. Hessi Godaas sawo tonku giya xussa yarsho gidana; iyara issife issi litiro gidiya woyne ushshi shiishite. 14 Ha yarshuwa hinte, hinte Xoossaas shiishiya gallasay gakanaw, wacha kathaafe qaye woyko caaca woyko uukidi moopite. Hessi hinte de7iya bessa ubban yaana yeletethaas merinaa woga gido.

15 Hinte yuusho yarsho mirqiya ehida Sambaata wontetha gallasaape doomidi, laapun saaminta taybite. 16 Laapuntha Sambaata kaalliya wontetha gallasay gakanaw ishatamu gallas taybite; wacha kathaafe yarsho Godaas shiishite. 17 Hinte de7iya bessaafe nam7u kilo giraame gidiya lo77o dhiilliyan irsho yeggidi uukida nam7u uythi yuusho yarshos ekidi yiite. Hessi wacha kathaafe Godaas shiiqiya yarsho gidees. 18 He uythaara issife borey bayna issi laythi gidida laapun dorsa urgeta, issi wofaanonne nam7u marazeta shiishite. Enta katha yarshoranne ushsha yarshora issife Godaas xuugetiya sawo tonku giya yarsho oothidi yarshite. 19 Qassi issi kole nagara yarshos, issi laythi gidida nam7u dorsa urgeta issifetetha yarshos shiishite.

20 Kahiney bayra kathaa, uythaanne nam7u dorsa urgeta yuusho yarsho oothidi, Godaa sinthan dhoqu oothidi yuushsho. Hessati Godaas geeshshi; kahinetas qassi gisho. 21 He gallas hintew geeshsha shiiqo gidana mela awaajite; ooso oothopite. Haysi hinte de7iya bessa ubban yaana yeletethaas merinaa woga gido.

22 Hinte biittan kaxida kathaa cakiya wode gadiya gaxaa gakanaw cakofite; cakishin attida poshiliya qoropite; hessa manqotasinne bete asaas aggaagite. Taani Godaa hinte Xoossaa.

23 Goday Museko haysada yaagis; 24 Isra7eele asaas haysada yaagada oda; laapuntha ageenan koyro gallasaa shempo gallas oothidi bonchite; hassayiso moyze punnishe geeshsha shiiqo shiiqite. 25 He gallas Godaas xuussa yarsho shiishitepe attishin, ooso oothopite.

26 Goday Museko haysada yaagis; 27 Laapuntha ageenan tammantho gallasay nagara atotetha gallas; he gallas geeshsha shiiqo shiiqite. He gallas hintena kawushite; Godaas xuussa yarsho shiishite. 28 He gallasay Godaa hinte Xoossaa sinthan hinte nagaray qushetana mela hinte nagaraa atotetha gallas gidiya gisho he gallasan ooso oothopite. 29 He gallas banatetha kawushonna asi oonika ba asaa giddofe kuretto. 30 He gallas ooso oothiya uraa oonaka taani iya asaa giddofe kurana. 31 He gallas ooso oothopite. Haysi hinte de7iya bessa ubban yaana yeletethaas merinaa woga gido. 32 Hessi hintew dummatida shempo gallas; he gallas hintenatethaa kawushite. He ageenan uddufuntho gallas omarsafe doomidi, tammantha gallas omarsi gakanaw hinte Sambaata bonchite.

33 Goday Museko haysada yaagis; 34 Isra7eele asaas haysada yaagada oda; laapuntha ageenan tammanne ichashantho gallasaape doomidi, laapun gallas gakanaw Godaas Shaqara Ba7aale. 35 He gallasatape koyro gallasan geeshsha shiiqo shiiqite; ooso oothopite. 36 Laapun gallas ubban Godaas xuussa yarsho shiishite; hospuntho gallasan geeshsha shiiqo shiiqite. Godaas xuussa katha yarsho shiishite. He gallasay baaliya wursetha gallas gidiya gisho, ooso oothopite.

37 Xuussa yarsho, katha yarsho, hara yarshotanne ushsha yarsho koshshiya woden Godaas shiishanaw geeshsha shiiqo oothidi awaajana Godaa ba7aaleti haysata. 38 Ha yarshoti Godaa Sambaatatape, Godaas immiya imotatape, qangetha imotatapenne dosan immiya imotatape dumma.

39 Hinte gaden kaxida kathaa shiishidaape guye, tammanne ichashantho gallasaape doomidi laapun gallas gakanaw Godaa ba7aale bonchite. Koyro gallasaynne hospuntho gallasay hintew dumma shempo gallas gidana. 40 Koyro gallas lo77o mitha ayfe, zamba tashe, cil7o mitha haythenne shaafa gaxan dicciya mitha haythi ekidi, Godaa hinte Xoossaa sinthan ufaytishe laapun gallas ba7aale bonchite. 41 He baaliya laythan laythan laapuntha ageenan laapun gallas Godaa bonchite. Hessi yaana yeletethaas merinaa woga gido. 42 He laapun gallasaa shaqaran de7ite; Isra7eele asi gidida ubbay he shaqaran de7o. 43 Taani hintena Gibxe biittafe kessida wode shaqaran daana mela oothidaysa yaana yeletethay erana. Taani Godaa hinte Xoossaa.

44 Hessada oothidi, Musey Godaa ba7aaleta bonchiya wogaa Isra7eele asaas odis.