1 Siina zuma bolla Goday Museko haysada yaagis. 2 Neeni Isra7eele asaas haysada yaagada oda; taani hintew immiya biitta hinte geliya wode biittiya ba huuphen Godaa Sambaata boncho. 3 Usupun laythi kumethi hinte gaden zerite; usupun laythi kumethi hinte woyne xeera xunqite; iya ayfiya maxite. 4 Shin laapuntha laythay biittas shempo Sambaata; hessi Godaa Sambaata. He laapuntha laythan gaden zeropite; hinte woyne xeeraa xunqofite. 5 Hinte biittan aasebo kaxidaba shiishopite; woyne xeera xunqofite; ayfiya maxopite. He laythay biittas kumethi shempo laythi gido. 6 He Sambaata laythan biittay oosetonna de7ishin kaxiya kathaa neeni, ne adde aylley, ne macca aylley, ne son une oothey, guutha wodes de7iya bete asi maanaw danda7ees. 7 Hessadaka, ne mehiyasinne ne biittan de7iya do7atas gidiya kathi demmana; biittan kaxiyaba ubbay meeteto.

8 Laythatas giddon de7iya laapun Sambaatata tayba; laapun Sambaatatas laytha tayboy laapun toho laapuna; hessika oytamanne uddufun laythi. 9 Laapuntha ageenan, tammantho gallas bonchetiya nagara atotetha gallasan moyze punniya asi biitta ubbaa kiitta. 10 Ishatammantho laytha dummayidi, he biittan de7iya ubbaas la77atethi awaajite. Hessi hintew Ishatammantho Laytha Ba7aale. He wode hinte ubbay hinte gadiyakonne hinte soo asaako simmite. 11 He laythay hintew Ishatammantho Laytha Ba7aale. He laythan zeropite; aasebo kaxidaba cakofite; xeera xunqonna ayfida woyne ayfiya maxopite. 12 Hessi Ishatammantho Laytha Ba7aale gidiya gisho I hintew geeshshi; goyonna coo denban kaxidaba miite.

13 He Ishatammantho Laytha Ba7aale wode asi ubbay ba gade simmo.

14 Hinte, hinte shooruwape gade shammiko woyko iyaw bayziko issoy issuwa cimmofite. 15 Hinte Ishatammantho Laytha Baaliyape guye de7iya laythata taybuwan hinte shooruwape shammite. Hinte shooroy gadey kathi immanaw de7iya laythata taybuwada bayzo. 16 Laytha tayboy daro gidiko gatey darees; laythata tayboy guuxiko gatey guuxees. Gadiya lo77otethaada hinte shooroy hintew bayzees. 17 Hinte issoy issuwa cimmofite; shin hinte, hinte Xoossaa yayyite. Taani Godaa, hinte Xoossaa.

18 Hinte ha biittan saro daana mela ta kiitta polite; ta higgiya naagite. 19 Biittay ba ayfiya hintew immin hinte kallana gakanaw maana; he biittan hinte saro daana. 20 Heko, nuuni zeronna aggidi, qassi kathi shiishonna aggidi, laapuntha laythan ay maanee? giiko, 21 taani usupuntho laythan ta anjuwa hintew kiittana; biittay heedzu laythas gidiya kathi immana. 22 Hospuntha laythan hinte, hinte biittan zeriya wode shaacha kathaa maana. Hinte zeriya kathaa uddufuntho laythan shiishana gakanaw shaacha kathaa maana.

23 Biittay tabaa gidiya gishonne hinte he biittan imathenne bete gididi de7iya gisho biitta simmonnaada oothidi bayzopite. 24 Hinte oykida gadiya godati, wozana maatay Isra7eele ubban naagetanaw bessees.

25 Issi Isra7eele asi manqidi ba gadiyape bayziko, iya mata dabboy he gadiya iyaw wozo. 26 Iyaw he gadiya woziya dabboy dhayiko, I wonto duretidi woziya miishe demmiko zaaridi wozanaw danda7ees. 27 Ba bayzida wodepe doomidi de7iya laytha taybidi, attida laytha miishiya shammidaysas zaaro; yaatidi I ba gadiya simmo. 28 Shin iyaw he gadiya wozanaw gidiya miishey dhayiko, Ishatammantho Laytha Ba7aaley gakanaw gadey shammida uraa kushen gam7o. Ishatammantho Laytha Ba7aale wode iya gadey iyaw simmo.

29 Issi asi gimbetida katama giddon de7iya keethe bayziko, I bayzida wodiyape bidi issi laythi kumana gakanaw zaaridi wozanaw danda7ees. 30 Shin issi laytha giddon wozanaw danda7etonna ixiko, he gimbetida katamaa giddon de7iya keethay shammida uraasinne iya kochaas gidees. Ishatammantho Laytha Ba7aale wode simmenna. 31 Shin gimbetiboona heeran de7iya keethati gade mela wozetoosona. Ishatammantho Laytha Ba7aale wode bayzidaysas simmoosona.

32 Gidoshin, Leeweti katamatan de7iya banta keethaa banta koyida wode wozanaw danda7oosona. 33 Leewetape issi asi enta katamaa giddon de7iya keethaa bayzidi wozanaw xoonetiko, he enta katamaa giddon de7iya keethay Ishatammantho Laytha Baaliya wode simmees. Leeweta katamaa giddon de7iya keethay Isra7eele asaa giddon Leewetasa. 34 Shin enta katamaa yuushuwan de7iya hentha biittay entaw merinaa aqo gidiya gisho bayzetenna.

35 Issi Isra7eele asi manqidi bana aysanaw xoonetiko, imathada woyko bete asada I neera daana mela maadda. 36 Iya neera wothanaw iyape yelo ekofa woyko wodhe moopa. Shin ne Xoossaa yayya. 37 Ne bira iyaw yelora tal7ofa; ne kathaa iyaw wodhera bayzopa. 38 Hintew Kanaane biitta immanawunne hinte Xoossaa gidanaw, hintena Gibxe biittafe kessida, taani, Godaa hinte Xoossaa.

39 Issi Isra7eele asi manqidi, bana new aylle oothidi bayziko iya aylleda oosisopa. 40 I bete asada une oothidi Ishatammantho Laytha Ba7aaley gakanaw neera de7o. 41 He wode I ba naytara issife ne soope keyidi ba soo asaako boo; ba aawa gade simmo. 42 Isra7eele asay taani Gibxe biittafe kessida ta aylle gidiya gisho enti aylletethas bayzetofo. 43 Neeni enta un7ethada haaropa; shin neeni, ne Xoossaa yayya.

44 New addenne macca aylley daana mela koyiko, ne yuushuwan de7iya kawotethatape shamma. 45 Hinte biittan de7iya bete asaa nayta shammanaw danda7eeta. Hinte biittan de7ishe yeletida enta soo asaape hintew shalo oothanaw danda7eeta. 46 Hintefe guye, hinte nayti enta merinaw laattana mela hinte naytas immite. Hinte enta ubba wode hinte aylle oothanaw danda7eeta; shin Isra7eele asi un7ethidi haaropite.

47 Ne matan de7iya imathi woyko bete asi duretiko, iya matan de7iya Isra7eele uray manqidi, ne matan de7iya imathas woyko bete uraas woyko imatha addiya kochaafe issuwas bana bayziko, 48 I bayzetidi simmin, iya wozanaw danda7etees; iya dabbotape issoy iya wozo. 49 Iya aawa ishay, woyko iya aawa ishaa na7ay woyko iya yaraape mata dabboy iya wozo; woyko I ba huuphen duretidi bana wozo. 50 I bana shammida uraara gididi, I bana bayzida laythafe doomidi Ishatammantho Laytha Ba7aaley gakanaw de7iya laythata taybo. Iya la77atetha gatey, he laytha taybuwa keena gido. I bana shammidaysara gam7ida wodiya gatey issi asi une oothidi demmiya miishiyara gina gido. 51 Ishatammantho Laytha Ba7aaley gakanaw daro laythi attidaba gidiko, ba bayzetida gatiyape he laytha taybon bana woziya gatiya qanxo. 52 Ishatammantho Laytha Ba7aaley gakanaw attida laythay guutha gidiko, bana shammidaysara issife taybidi, he laytha taybon bana woziya gatiya qanxo. 53 I laythan laythan une oothiya asada bana shammidaysara de7o; iya goday iya un7ethidi haaranaw bessenna.

54 Shin I hessa mela hanon wozetonna ixiko, Ishatammantho Laytha Ba7aaley gakiya wode inne iya nayti aylletethafe keyo. 55 Isra7eele asay, ta Gibxe biittafe kessida ta aylle. Taani, Godaa hinte Xoossaa.