1 Goday Museko haysada yaagis. 2 Isra7eele asaas haysada yaagada oda; issi asi Godaas ase immanaw qangiko, wozo gatiya ne gammatidaysa mela he uraa gisho miishe qanxo. 3 Laatamu laythafe bidi usupun tammu laythi gakanaw de7iya adde gidiko geeshsha dunkaanen eretida mizaanen usupun xeetu bira santime qanxo. 4 Macca gidiko hastamu bira santime qanxo. 5 Ichashu laythafe bidi laatamu laythi gakanaw de7iya adde gidiko laatamu bira santime qanxo; qassi maccas gidiko tammu bira santime qanxo. 6 Issi ageenape bidi ichashu laythi gakanaw de7iya adde gidiko ichashu bira santime qanxo; qassi maccas gidiko heedzu bira santime qanxo. 7 Laythi usupun tammanne iyape bolla gidida adde gidiko, tammanne ichashu bira santime; qassi maccas gidiko tammu bira santime qanxo. 8 Qangida uray neeni gammatidaysa qanxanaw danda7onna manqo gidiko, I ba qangetha gathanaw immida uraa ehidi kahiniya sinthan esso; qangetida uray qanxanaw danda7eysa keena qopidi kahiney gammato.

9 Issi asi Godaas yarsho oothidi immanaw qangiday mehe gidiko Godaas imetiya mehe ubbay geeshshi gidees. 10 He mehiya gisho hara mehe immofo; woyko iya hara mehera laammofo. Lo77uwa iitaara woyko iitaa lo77uwara laammofo; shin I laammiko, koyro meheynne laame immida mehey nam7ayka geeshshi gido. 11 Issi asi Godaas yarsho oothidi immanaw gepida mehey geeshshi gidonna ixiko, he uray he mehiya kahiniya sinthe eho. 12 Lo77o gidin, iita gidin kahiney he mehiya gammato; kahiney gammatidaysi iyaw gate gido. 13 Shin he mehiya goday zaaridi wozanaw koyiko, he mehiya gatiya bolla xeetape laatamu kushe gujo.

14 Issi asi ba keethaa geeshshi oothidi Godaas dummayiko, lo77o gidin, iita gidin kahiney he keethaa gammato; kahiney gammatidaysi iyaw gate gido. 15 Ba keethaa geeshshi oothidi Godaas dummayida uray zaaridi wozanaw koyiko, he keethaa gatiya bolla xeetape laatamu kushe gujo; simmidi keethay iyabaa gidees.

16 Issi asi ba laata gadiyape shaakidi geeshshi oothidi Godaas dummayiko, he gadiya gatey iyan zeretiya zerethan gammateto. Hessika nam7u xeetanne laatamu kilo giraame banga zeriya gade gidiko, ishatamu saqile qanxo. 17 I ba gadiya Ishatammantho Laytha Ba7aalepe doomidi geeshshi oothidi Godaas dummayiko, he gadiya kumetha gatiya qanxo. 18 Shin I ba gadiya Ishatammantho Laytha Ba7aaley aadhin, geeshshi oothidi Godaas dummayiko, kaallidi de7iya Ishatammantho Laytha Ba7aaley gakanaw de7iya laythata kahiney taybidi, iya kumetha gatiyape wodho. 19 He gadiya geeshshi oothidi Godaas dummayida uray zaaridi wozanaw koyiko, gammatetida gatiya bolla xeetape laatamu kushe gujo; simmidi gadey iyabaa gidees. 20 Shin I gadiya zaaridi wozanaape sinthe hara asas bayziko, he gadiya wozanaw danda7enna. 21 Ishatammantho Laytha Ba7aaley gakin gadey yedetiya wode he gadey nam7antho guye simmonna Godaas geeshshi gido; he gadey kahinetaba gidees.

22 Issi asi hara asape shammida gadiya geeshshi oothidi Godaas dummayanaw koyiko, 23 kaalliya Ishatammantho Laytha Ba7aaley gakanaw de7iya gatiya kahiney gammatiko, uray he gallas gammatida gatiya qanxo; He miishey Godaas dummatida miishe gidana. 24 Ishatammantho Laytha Ba7aaley gakiya wode he gadey koyro laatan ekidi bayzida uraas simmees.

25 Enta gatey geeshsha dunkaaniyan eretida mizaanen gammatetees. (Issi saqiley laatamu Geera gidees).

26 Shin oonika bayra yeletida mehe Godaas dummayidi shiishanaw danda7enna; I kaseka Godaaba. Miizi woyko dorse gidin Godaaba. 27 He mehey geeshshi gidonna ixiko, I gammatetida gatiya bolla ichashape issi kushe gujidi iya goday zaaridi wozo. I wozonna ixiko, gammatetida gatiyan hara asas bayzeto.

28 Issi asi Godaas dummayidi immidabay ayba gidikoka, ase woyko mehe woyko iya laata gade gidin, bayzetenanne wozetenna. I dummayidaba ubbay Godaas Ubbaafe geeshshi. 29 Asaa giddofe hayqana mela pirdetida asi oonika wozetofo; he uray hayqo.

30 Gaden kaxida kathi woyko mitha ayfe gidin tammaafe issoy Godaaba. Hessi Godaas geeshshi. 31 Issi asi ba asraata wozanaw koyiko, iya gatiya bolla xeetape laatamu kushe gujidi wozo. 32 Miiza asraata woyko dorsa asraata woyko deesha asraata gidin, henthanchuwa xam7afe garsara aadhiya tammaafe issoy Godaas geeshshi. 33 Tammantho mehey iita gidin, lo77o gidin dooropo; woyko iya haraara laammofo. Laammiko, koyroynne laame immida nam7ay Godaas geeshshi gidoosona; zaaridi wozanaw danda7etenna.

34 Siina zuma bolla Goday Muse baggara Isra7eele asaa kiitida kiitay haysa.