4
Yesuusi Paacetethi
(Maato 4:1-11; Mar 1:12-13)
1 Yesuusi Geeshsha Ayyaanan kumidi Yordaanose Shaafape simmida mela Ayyaanay iya mela biitta efis. 2 Yan oytamu gallasinne qamma xalahen paacetis. He gallasatan aykoka moonna gam7ida gisho wursethan koshatis.
3 Xalahey iyako, “Neeni Xoossaa na7a gidiko ane haysi shuchay uythu gido gada kiitta” yaagis.
4 Yesuusi zaaridi, “Asi uytha xalaalan deenna geetetidi xaafetis” yaagis.Zaare 8:3.
5 Hessafe guye, Xalahey Yesuusa adussa dere bolla kessidi ha alamiya kawotethata ayfe qiphi zaaranaw bessis. 6 Xalahey, “Ha ubbaas maataynne bonchoy taw imetis. Taani dosida oodeska immiya gisho new immana. 7 Hessa gisho, neeni taw goyinniko ubbay new gidana” yaagis.
8 Yesuusi zaaridi, “Ne Godaa, ne Xoossaa, iya xalaala goyinna geetetidi xaafetis” yaagis.Zaare 6:13.
9 Wursethan Xalahey Yesuusa Yerusalaame efidi Xoossa Keethas huuphiya bolla essidi, “Neeni Xoossaa na7a gidiko ane duge sa7an nena yegga. 10 Ayis giiko,
“ ‘Nena naagiya Kiitanchota
Xoossay ne gisho kiittana.Maz 91:11-12.
11 Enti ne tohoy shuchan dhubetonna mela,
banta kushiyan dhoqu oothidi nena denthana’ geetetidi xaafetis”
yaagis.
12 Yesuusi zaaridi, “Ne Godaa Xoossaa paacofa geetetidi xaafetis” yaagis.Zaare 6:16.
13 Xalahey Yesuusa paaciya wursidaape guye hara inje wode demmana gakanaw iyape shaaketis.
Yesuusi Galilan Tamaarso Doometha
(Maato 4:12-17; Mar 1:14-15)
14 Yesuusi Ayyaana wolqan kumidi Galila simmis. Iya sunthay heeran de7iya biitta ubban keyis. 15 I ayhude woosa keethi gelidi tamaarsis; asa ubbay iya galatidosona.
16 Yaape I diccida katamaa Naazirete yis. Kase meezetidaysada Sambaata gallas ayhude woosa keethi gelis. Nabbabanawuka dendi eqis. 17 Nabiya Isayaasa maxaafay iyaw imetin, dooyidi, haysada yaagidi xaafetidaysa demmis:
18 “Godaa Ayyaanay ta bolla de7ees,
manqotas Wongela odana mela
Xoossay tana dooris.
Qashetidaysatas biletethi,
qooqidaysata xeelisanaasinne
un7etidaysata birshana mela,Isa 61:1-2.
19 Xoossay keehanaw qopida laytha odana mela tana kiittis”
yaagis.
20 Hessafe guye, maxaafaa xaaxidi haggaazeysas immidi tamaarsanaw uttis. Ayhude woosa keethan de7iya asati ubbay caddi xeelloosona. 21 I, “Haysi hinte haythan hinte si7iya ha maxaafaa qaalay hachi poletis” yaagis.
22 Ubbay iyabaa darsidi odetoosona. Qassi iya doonape keyiya aadho keehatethan kumida qaalan malaaletishe, “Haysi Yoosefa na7aa gidenneyee?” yaagidosona.
23 I, “ ‘Neno dhale aawaw nena ashsha, Qifirnahooman ne oothidaba nu si7oysa qassi haysan ne kataman ootha’ giya leemisuwan hinte tana gaanaysas sidhey baawa” yaagis. 24 Qassi, “Tuma odayis; nabey ba yeletida biittan bonchetenna.Yoha 4:44.
25 “Ta hintew tuma odayis; saloy heedzu laythinne bagga gordetin mino koshi biitta ubban de7iya Eeliyaasa wode daro am7eti Isra7eelen de7oosona.1 Kawo 17:1. 26 Eeliyaasi entafe issinnekoka kiitetibeenna. Shin Saraptan de7iya am7eeko kiitetis.1 Kawo 17:8-16. 27 Nabiya Elsa wode Isra7eelen daro baro harganchoti de7oosona. Shin Soore uraa Ni7imaanepe attishin, oonika paxibeenna” yaagis.2 Kawo 5:1-14.
28 Ayhude woosa keethan de7iya asa ubbay hessa si7ida wode daro yilotidosona. 29 Banta uttida bessaafe dendidi dere bolla keexetida katamaape gaxa kessidi sugi yeddanaw aafo doona efidosona. 30 Shin I enta giddora kanthidi aadhis.
Yesuusi Tuna Ayyaana Kessis
(Mar 1:21-28)
31 Yaape Galila biittan de7iya Qifirnahooma katamaa bis. Yan Sambaata gallas asaa tamaarsis. 32 I tamaarsey maatara gidiya gisho ubbay iya timirtiyan malaaletidosona.Maato 7:28-29; Maz 91:11-12.
33 Ayhude woosa keethan tuna ayyaanay oykida uray de7ees. 34 I, “Naazirete Yesuusa nuna ayis waaysay nuupe haaka; neeni yiday nuna dhaysanaseyee? Neeni ooneko taani erayis. Neeni Xoossaafe yida Geeshsha” yaagidi waassis.
35 Yesuusi tuna ayyaanako, “Si7i gada ha uraape keya” yaagidi hanqis. Tuna ayyaanay uraa asaa ubbaa sinthan holi yeggidi aykoka qohonna yeddidi keyis.
36 Asa ubbay malaaletidosona. Woliko, “Hanos, haysi aybi timirtee? Tuna ayyaanata maataninne wolqan kiittees; entika keyoosona” yaagidosona. 37 Iya sunthay heera ubban keyis.
Yesuusi Daro Harganchota Pathis
(Maato 8:14-17; Mar 1:29-34)
38 Hessafe guye, Yesuusi ayhude woosa keethafe keyidi Simoona soo gelis. Simoona mache aayiya mino qoxo misha hargen saketasu. Iyo pathana mela Yesuusa woossidosona. 39 I hiixako shiiqi hokidi I hargiya hanqis. Mishay aggin ellesa dendada enta mokasu.
40 Away wullana hanishin dumma dumma hargiyan oyketida asaa iyako ehidosona. I issuwa issuwa bolla ba kushiya wothidi pathis. 41 Tuna ayyaanati qassi, “Neeni, Xoossaa na7aa” gidi waassishe daro asaape keyidosona. Shin I entana hanqis. I Kiristoosa gideysa enti eriya gisho, issibaaka odetonna mela diggis.
42 Buroo wontiya wode Yesuusi issi geema bessi bis. Asay koyishe I de7iya bessaa yidosona. Entafe I shaaketidi boonna mela digganaw koydosona. 43 Shin I, “Taani hara katamata bada Xoossaa kawotethaa Wongela markatanaw bessees. Ta kiitetiday hessasa” yaagis. 44 Yihuda biittan de7iya ayhude woosa keethan sabbakis.