1 He wode Yesuusako asay yidi Philaxoosi wodhidi enta suuthara enta yarshuwa walakida Galila asaaba odida asati he bessan de7oosona. 2 I haysada yaagidi zaaris; “Yaatin he Galila asati he iita hayqo hayqida gisho, Galilan de7iya asa ubbaafe aadhida nagarancho daanonna? 3 Gidenna! Gidoshin, hinteka maarotan simmonna ixiko, ubbay hessada dhayana. 4 Woyko qassi Salihoome geetetiya bessan gimbey woddidi wodhida tammanne hospun asay Yerusalaamen de7iya asa ubbaafe aadhida nagarancho daanonna? 5 Gidenna! Shin hinteka maarotan simmonna ixiko ubbay hessada dhayana.”

6 Qassika Yesuusi haysada gidi leemiso odis: “Issi uraas woyne gaden toketida balase mithi de7awusu. I iipe ayfe demmanaw koydi aykoka demmibeenna. 7 Woyne gadiya goday woyne oosanchuwako, ‘Ayfe demmanaw koyada heedzu laythi simeretada aykoka demmabike. Hessa gisho, qanxa digga; ayis biitta melisay?’ yaagis.

8 “Shin oosanchoy, ‘Godaw, I yuushuwa oothada osha yeggana gakanaw ha laythas aggarki. 9 Ha laythi ayfiko lo77o, ixiko qanxa agga’ ” yaagidi zaaris.

10 Yesuusi Sambaata gallas ayhude woosa keethan tamaarsees. 11 He bessan tammanne hospun laythi tuna ayyaani zoko kuunisida issi maccasiya de7awusu. Iya kuunape dendoysan suure eqanaw danda7uku. 12 Yesuusi iyo be7ida wode xeegidi, “Ha maccasete, ne hargiyafe paxadasa” yaagis. 13 Ba kushiya I bolla wothin, iya ellesada, suurada eqasu. Xoosse galatasu.

14 Shin ayhude woosa keetha halaqay yilotidi asaako, “Ooso oothiya usupun gallasati de7oosona. Hessa gisho, he gallasatan yidi paxitepe attishin, Sambaata gallas gidenna” yaagis.Kessa 20:9-10; Zaare 5:13-14.

15 Goday, “Cubboto, hinte giddofe boori woyko hare Sambaata gallas zadalope billidi haathe ushshanaw efonnay oonee? 16 Yaatin, ha maccasiya Abrahaame na7a gidashe xalahen qashetada tammanne hospun laythi kumethi de7idaaris Sambaata gallas birshetethi koshshennee?” yaagidi oychis.

17 I hessa odida wode eqeteysati ubbay yeellatidosona. Shin asa ubbay I oothida malaalsiya ooso ubban ufaytidosona.

18 Hessafe guye, Yesuusi haysada yaagis, “Xoossa kawotethi ay daanii? Iya aybira daaniso? 19 Xoossa kawotethi issi asi ba goshshan tokida wola ayfe mela. I diccidi mithi gidis. Salo kafoti iya tashiya bolla shempidosona.”

20 Qassi, “Xoossaa kawotetha aybira daaniso? 21 Issi maccasiya daro dhiillera walakada munuqida guutha irsho daanees” yaagis.

22 Hessafe guye, Yesuusi Yerusalaame bishe I kanthiya ogiyan de7iya katamataninne gutatan tamaarsishe aadhis. 23 Issi asi Yesuusako, “Godaw, attanay guutha asa xalaalee?” yaagidi oychis.

Yesuusi entako, 24 “Si7ite, xuuntha wulara gelanaw baaxetite. Daroti gelanaw koyoosona shin entaw hanenna. 25 Keetha aaway dendidi wulaa gordidaape guye, ‘Nuus dooyarki’ yaagishe karen eqidi xeessi oyketa. Shin I, ‘Hinte oonekonne awupe yidaako ta erike’ gidi zaarana. 26 He wode hinte, ‘Neera wolla mida, uyida, nu dabaabanka tamaarsadasa’ yaagana.

27 “I zaaridi, ‘Hinte oonekonne awupe yidaako erike. Hinteno, geellato taape haakite’ yaagana.Maz 6:8. 28 Abrahaame, Yisaaqa, Yayqoobanne nabeta ubbaa Xoossa kawotethan be7ana, shin hinte karen wodhidi attiya wode hintew yeehonne ache garcethi gidana. 29 Asay dolohape, wulohape, pudehapenne dugehape yidi Xoossaa kawotethan gibira bolla uttana.Maato 8:11-12; 22:13; 25:30. 30 Hessa gisho, ha77i dethan guye gididaysatape sinthe gidanaysati, sinthe gididaysatape guye gidanaysati de7oosona” yaagis.Maato 19:30; 20:16; Mar 10:31.

31 He wode Farsaawetape issoti issoti yidi, “Herodiisi nena wodhanaw koyiya gisho ha bessaafe dendada ba” gidoosona.

32 I zaaridi, “Bidi, he workanaas, ‘Heko, hachinne wonto tuna ayyaanata kessana, harganchota pathana, heedzantho gallasan kuushsha bolla gakana’ yaagis giite. 33 Hanope attishin, nabey Yerusalaamepe karen hayqanaw bessenna. Hessa gisho, hachi, wontonne wonti pee7in he bessa baanaw dendas.

34 “Yerusalaame, Yerusalaame, nabeta wodhiyare, neeko kiitetidaysata shuchan caddiyare, kuttoy ba nayta ba qefiyape garsan shiishiyada ne nayta ta qesiyape garsan aapun toho shiishanaw koyadina, shin hinte ixas gideta. 35 Ta hintew odayis; hinte keethay kaysatana. Godaa sunthan yeysi anjetidaysa hinte gaana gakanaw tana demmeketa” yaagis.Maz 118:26; Ermi 22:5.