1 “Ha77ika kahineto, ha kiitay imetiday hintesa. 2 Hinte si7onna ixiko; ta sunthaa bonchanaw hinte wozanan ta qaala wothonna ixiko, ta hinte bolla baadethi yeddana; hinte anjuwa taani baadethan laammana. Hinte hinte wozana tana bonchanaw giigisiboonna gisho, ta hintena baaddas” yaagees Ubbaafe Wolqaama Goday.

3 “Taani hinte kochaa seerana; hinte yarsho mehe osha hinte som7on laallana; hinteka iyara issife holetana. 4 He wode ta Leewera caaqida caaqoy, minnidi daana mela ha kiita kiitiday tana gideysa hinte erana” yaagees Ubbaafe Wolqaama Goday.

5 “Ta iyara caaqida caaqoy de7onne sarotetha caaqo; I taw yayyana mela de7onne sarotetha iyaw immas; ika taw yayyis, ta sunthaa bonchida mela de7is. 6 Tuma timirtey iya doonan de7is; iya inxarsanka wordoy bentibeenna. I taara sarotethaninne suuretethan hemetis; qassi darota nagarape zaaris. 7 Kahiney, Ubbaafe Wolqaama Goday kiitidaysa gidiya gisho, iya mettershay eratethi naaganaw koshshees; asay eratethi iya doonape tamaaranaw bessees” yaagees Ubbaafe Wolqaama Goday.

8 “Shin hinte ta ogiyape gaxa keydeta; hinte timirtiyan darota dhubideta; taani Leewera caaqida caaquwa menthideta. 9 Hessa gisho, hinte ta ogiyan boonna ixidi, hinte timirtiyan asaa giddon shaahetethi medhiya gisho, ta hintena asa ubbaa sinthan kadhetanaadanne kawuyanaada oothas” yaagees Ubbaafe Wolqaama Goday.

10 Nu ubbaas issi aawi de7ees gidennee? Nuna issi Xoossay medhibeneyee? Yaatin, nu issoy issuwas ammanetona ixidi, nu mayzata caaquwa ayis menthanee? 11 Yihudi cimmis; Isra7eeleninne Yerusalaamen tunabay oosetis; Yihudi allaga xoossa macca nayta ekidi, Goday dosiya xoossa keetha tunisis. 12 Hessa tamaarseynne kaalliya oonika, Ubbaafe Wolqaama Godaas yarsho ehiyakoka, Goday iya Yayqooba dunkaaniyape dhayso.

13 Qassi hinte oothiya harabay aybe giiko, Goday hinte yarshuwako xeellonna gisho woyko ufaysan ekonna gisho yarsho bessa afuthan, yeehoninne azzanon kuntheeta. 14 Hinte, “I nu yarshuwa ayis ekennee?” yaagidi oycheeta. Hessi haniday, hinte, hinte na7atetha machera caaqida caaquwa menthida gishonne cimmida gishosa; iya ne miyenne ne caaqo macho gidiya gisho Goday marka. 15 Goday hintewunne hinte machetas issi asatethinne issi ayyaani daana mela oothibeennee? Hessa ayis oothidee? Xoossa yayiya koche daana mela koyda gishosa. Hessa gisho, hinte ayyaana naagite; hinte na7atetha macheta cimmofite.

16 “Taani Goday, Isra7eele Xoossay, azini ba machiw yeddanaysa ixayis; ba ma7uwa iita ooson kammiya oonaka ta ixayis. Hessa gisho, hinte ayyaana naagite; hinte na7atetha macheta cimmofite” yaagees Ubbaafe Wolqaama Goday.

17 Hinte, hinte odan Godaa salethideta.

Hinte zaaridi, “Nuuni iya waatidi salethido?” yaageeta.

Hinte iya salethiday, “Iita oothiya ubbay Godaa sinthan lo77o; ika entan ufaytees” yaagusaana; woyko, “Xillo pirdiya Xoossay awun de7ii?” yaagusaana.