Maatosi Xaafida
Yesuus Kiristoosa Wongela
Gaatha Qofa
Maatosa Wongelay, yaana geetetidi ufaysan naagetey ashshiya Yesuusa gideysanne Xoossay gal7a caaquwan ba asaas immida ufaysa qaala poliday iya baggara gideysa odiya Wongela. Ha Wongelay Yesuusi enta giddon yeletidi diccida Ayhudeta xalaalas gidonashin, kumetha alamiyasa.
Maatosi ba maxaafa Yesuusa yeletethan doomidi, iya xammaqetethanne iya paacetetha odees. Kaallidi, I Galilan sabbakidaba, tamaarsidabanne harganchota pathidaba odees. Yesuusi Galilape Yerusalaame bidaysanne sa7a bolla de7ishe wursetha saamintan hanidabata, hessika: iya kaqetetha, iya hayquwanne iya denduwa qoncisees.
Ha wongelay, Yesuusi Xoossa higge birshanaw maati de7eysanne Xoossa kawotethaaba tamaarsiya gita astamaare oothidi ekees. Iya timirtey, dumma dumma maaran giigetida ichashu kifiletan shaaketees.
1. Xoossa kawotethan de7iya asa hanota, maatanne wursetha qaada odiya Zuma Bolla Timirtiya (Shem 5—7).
2. Tammanne nam7u tamaareti Wongela odanaw biya wode entaw imetida kiita (Shem 10).
3. Xoossaa kawotethaaba tamaarsanaw shiiqida dumma dumma leemisota (Shem 13).
4. Yesuusa tamaare geysas birshethay ay guusseko tamaarsiya timirte (Shem 18).
5. Wode wursethinne Xoossa kawotetha yuussaba odiya timirte (Shem 24—25).
Maxaafa Ayfe Qofata
Yesuus Kiristoosa yeletethinne iya susa (1:1—2:23)
Xammaqiya Yohaanisa oosuwa (3:1-12)
Yesuusa xinqatenne paacetethi (3:13—4:11)
Yesuusi Galilan ba oosuwa oykethi (4:12—18:35)
Galilape Yerusalaame gakanaw (19:1—20:34)
Yerusalaame heeran aathid wursetha saaminta (21:1—27:66)
Godaa hayqope denduwanne asas qoncethi (28:1-20)
1
Yesuusa Yeleta Susa
(Luqa 3:23-38)
Haysafe kaallidi xaafetidaysi Dawita na7a Abrahaame na7a gidida Yesuus Kiristoosa yeletethaa.
Abrahaamey Yisaaqa yelis;
Yisaaqi Yayqooba yelis;
Yayqoobi Yihudanne iya ishata yelis;
Yihudi Timaaripe Faaresanne Zaara yelis;
Faaresi Asroome yelis;
Asroomey Raame yelis;
Raamey Amnadaabe yelis;
Amnadaabey Na7asoona yelis;
Na7asooni Salmoona yelis;
Salmoona Raabipe Boo7eza yelis;
Boo7ezi Uruutipe Iyobeeda yelis;
Iyobeedi Isseye yelis;
Isseyey kawa Dawita yelis;
Dawiti koyro Ooriyo machefe Solomone yelis;
Solomoney Orobi7aama yelis;
Orobi7aamey Abiya yelis;
Abiyi Asaafa yelis;
Asaafi Iyosaafexa yelis;
Iyosaafexi Iyoraama yelis;
Iyoraami Ooziyana yelis;
Ooziyani Iyo7ataame yelis;
Iyo7atami Akaaza yelis;
Akaazi Hizqiyaasa yelis;
10 Hizqiyaasi Minaase yelis;
Minaasey Amoone yelis;
Amooni Iyosiyaasa yelis;
11 Isra7eele asay di7etidi Babiloone biitta bida wode Iyosiyaasi Ikoniyaananne iya ishata yelis.2 Kawo 24:14-15; 2 Taari 36:10; Ermi 27:20.
12 Babiloone biitta Isra7eele asay di7etidi bidaape guye Ikoniyaani Salatiyaala yelis.
Salatiyaali Zarubaabela yelis;
13 Zarubaabeli Abdiyu yelis;
Abdiyuy Eliyaqeeme yelis;
Eliyaqeemi Azaara yelis;
14 Azaari Saadoqa yelis;
Saadoqi Akime yelis;
Akimey Elyuuda yelis;
15 Elyuudi Alaazara yelis;
Alaazari Maatane yelis;
Maataney Yayqooba yelis;
16 Yayqoobi Yoosefa yelis;
Yoosefi Kiristoosa geetetiya Yesuusa yelida Mayraami azina.
17 Hiza, yeletethay Abrahaamepe Dawita gakanaw tammanne oydda. Dawitape bidi Babiloone di7uwa gakanaw tammanne oydda. Babiloone di7uwape bidi Kiristoosa gakanaw tammanne oyddu yeletethi gidees.
Yesuus Kiristoosa Yeletethi
(Luqa 2:1-7)
18 Yesuus Kiristoosa yeletethaa taarikey haysafe kaalleysa. Iya aayiya Mayraama Yoosefas oysheta de7ashe Yoosefara gahetonna Geeshsha Ayyaanape qanthatasu.Luqa 1:27. 19 Yoosefi Xillo asi gidida gisho iyo asan kessanaw koybeenna. Yaaniya gisho qosan iyo agganaw qopis. 20 I he qofan de7ishin Xoossaa kiitanchoy amuhon qoncidi, “Dawita na7aw, Yoosefa, Mayraama qanthatiday Geeshsha Ayyaanape gidiya gisho iyo ekanaw yayyofa” yaagis. 21 Iya adde na7a yelana, I ba deriya enta nagaraape ashshiya gisho iya sunthaa ne Yesuusa gada xeegana.Luqa 1:31.
22 Goday nabiya Isayaasa doonan, 23 “Heko geela7iya qanthatana; adde na7a yelana; iya sunthay Amanu7eela” geetetana goysi poletana mela ha ubbay hanis. Amanu7eela geysas birshethay “Xoossay nuura de7ees” guussu.Isa 7:14.
24 Yoosefi dhiskofe barkidi Godaa kiitanchoy kiittidaysa mela Mayraamo ba soo efis. 25 Shin ba bayra na7a yelana gakanaw iyo bochibeenna;*Iyo bochibeenna: Machira azinara aqeysada issife aqibookona guussu. yeletida na7aka Yesuusa gidi xeegis.Luqa 2:21.

1:11 2 Kawo 24:14-15; 2 Taari 36:10; Ermi 27:20.

1:18 Luqa 1:27.

1:21 Luqa 1:31.

1:23 Isa 7:14.

*1:25 Iyo bochibeenna: Machira azinara aqeysada issife aqibookona guussu.

1:25 Luqa 2:21.