4
Yesuusa Paacetetha
(Mar 1:12-13; Luqa 4:1-13)
Hessafe guye, Xalahey Yesuusa paacana mela Geeshsha Ayyaanay Yesuusa mela biitta efis.Ibra 2:18; 4:15. Oytamu qammanne oytamu gallas xoomidaape guye koshatis. Xalahey Yesuusako yidi “Neeni Xoossaa na7a gidiko, ane ha shuchati uythi gidana mela kiitta” yaagis.
Yesuusi zaaridi, “ ‘Asi Xoossaa doonape keyiya qaala ubban de7eesipe attishin, uytha xalaalan deenna’ geetetidi Xoossaa qaalan xaafetis”Zaare 8:3. yaagis.
Kaallidika, Xalahey Yesuusa geeshsha katamaa efidi, Xoossaa keetha huuphiya kessidi, “Neeni Xoossa na7a gidiko, ane duge sa7an kunda.Maz 91:11.
“ ‘Ne tohoy shuchan dhubetonna mela,
banta kushiyan nena denthana mela,
Xoossay ba kiitanchota ne gisho kiittana’
geetetidi Xoossaa qaalan xaafetis” yaagis.
Yesuusi iyako, “Qassika, ‘Xoossaa qaalan ne Godaa, ne Xoossaa paacofa’ yaagetidi xaafetis” gidi zaaris.Zaare 6:16.
Wursethan Xalahey Yesuusa issi wolqaama zuma huuphe kessidi alamiya kawotethata enta bonchuwara issife bessidi, “Ne taw kundada goyinniko ta new ha ubbaa immana” yaagis.
10 Yesuusi zaaridi, “Ha Xalahiyaw, taape haaka! ‘Ne Godaa, ne Xoossaa goyinna, iya xalaala haggaaza’ geetetidi Xoossaa qaalan xaafetis” yaagis.Zaare 6:13.
11 Hessafe guye, Xalahey aggidi bis; kiitanchoti yidi iya haggaazidosona.
Yesuusa Tamaarso Doometha
(Mar 1:14-15; Luqa 4:14-15)
12 Yesuusi, Yohaanisi qashetoysa si7ida wode Galila biitta bis.Maato 14:3; Mar 6:17; Luqa 3:19-20. 13 Naazirete katamaa aggidi Zabloonaninne Niftaaleme heeran, abba matan de7iya Qifirnahooma katamaa bidi yan de7is.Yoha 2:12. 14 Hessi haniday nabiya Isayaasa doonan,
15 “Zabloona biittan, Niftaaleme biittan,
Yordaanose Shaafape hefinthan,
abba ogiya gaxan de7iya,
Ayhude gidonna derey de7iya Galilan,Isa 9:1-2.
16 dhuman de7iya derey,
wolqaama poo7o be7is.
Hayqo kuya biittan,
de7eysatas poo7oy keyis”
yaagidi odetida qaalay poletana melasa.
17 He wodepe doomidi Yesuusi, “Xoossaa kawotethay matatida gisho hinte nagaraape simmite” yaagidi qaala sabbakees.Maato 3:2.
Koyro Tamaareta Xeegethaa
(Mar 1:16-20; Luqa 5:1-11)
18 Yesuusi Galila Abbaa matara aadhishe nam7u ishata, Phexroosa geetetiya Simoonanne iya ishaa Indiriyasa be7is. Enti molo oykeyisata gidida gisho banta gitiya abban yeggoosona. 19 Yesuusi entana, “Haa yiite; tana kaallite; taani hintena ase oythi tamaarsana” yaagis. 20 Entika, ellesidi banta gitiya yeggi aggidi Yesuusa kaallidosona.
21 Yesuusi yaape buroo gede sinthe aadhishe hara nam7u ishata, Zabdiyoosa nayta, Yayqoobanne Yohaanisa be7is. Banta aawa Zabdiyoosara issife wogoluwa giddon banta gitiya giigiseyisata xeegis. 22 Entika, ellesidi banta wogoluwanne banta aawa aggidi Yesuusa kaallidosona.
Yesuusi Harganchota Pathis
(Luqa 6:17-19)
23 Yesuusi ayhude woosa keethatan tamaarsishe, salo kawotethaa Wongela odishenne dumma dumma hargiyafe asaa pathishe Galila biitta ubban yuuyis.Maato 9:35; Mar 1:39.
24 Hessafe dendoysan iya sunthay Soore biitta ubban keyis. Dumma dumma hargen oyketidaysatanne waayeteyisata, tuna ayyaanan oyketidaysata, shoci yeggiya hargen oyketidaysatanne, gundata iyako ehidosona; ika entana pathis.
25 Asay Galilape, Tammu Katamatape, Yerusalaamepe, Yihudapenne Yordaanose Shaafa hefinthan de7iya biittafe yida daro asay iya kaallidosona.

4:1 Ibra 2:18; 4:15.

4:4 Zaare 8:3.

4:6 Maz 91:11.

4:7 Zaare 6:16.

4:10 Zaare 6:13.

4:12 Maato 14:3; Mar 6:17; Luqa 3:19-20.

4:13 Yoha 2:12.

4:15 Isa 9:1-2.

4:17 Maato 3:2.

4:23 Maato 9:35; Mar 1:39.