1 Usupun gallasape guye Yesuusi, Phexroosa, Yayqoobanne iya ishaa Yohaanisa baara ekidi bantarka gidanaw zuma bolla keyis.2 Phex 1:17-18. 2 Yan enta sinthan Yesuusa malay kumethi laametis; iya som7oyka awada xolqis. Iya ma7oyka daro booxis. 3 Heko, Museynne Eeliyaasi iyara odetishin be7idosona. 4 Phexroosi Yesuusako, “Nuuni haysa hashshu yida. Ne koyko issino new, issino Muses, issino Eeliyaasas haysan heedzu shaqara shaqarana” yaagis. 5 Phexroosi hessa buroo odishin bootha shaaray entana kammis. Shaara giddora, “Tana ufaysiya, ta dosiya na7ay haysa, iya si7ite!” giya qaalay yis.Medhe 22:2; Maz 2:7; Isa 42:1; Maato 3:17; 12:18; Mar 1:11; Luqa 3:22; Zaare 18:15. 6 Yesuusa tamaareti hessa si7ida wode dagammidi banta som7uwara sa7an kundidosona. 7 Shin Yesuusi entako shiiqidi enta bochidi, “Dendite, yayyofite!” yaagis. 8 Enti dhoqu gidi be7iya wode Yesuusape hara oonaka be7ibookona.

9 Enti zumaa bollafe wodhishin Yesuusi entako, “Asa Na7ay hayqope dendana gakanaw ha hinte be7idaba oodeska odopite” gidi kiittis. 10 Yesuusa tamaareti, “Yaatin, higge astamaareti Eeliyaasi Kiristoosape kasetidi yaana giday aybisee?” yaagidi oychidosona.Milki 4:5.

11 Yesuusi zaaridi, “Ee! Eeliyaasi kaseti yidi ubbaba giigisana. 12 Shin ta hintew tuma odayis; Eeliyaasi kasetidi yis. Entika iya bolla koydaba oothidosonape attishin, iya shaaki eribookona. Hessada Asa Na7ay enta kushen waayetana” yaagis.Maato 11:14.

13 He wode Yesuusi giday Xammaqiya Yohaanisaba gideysa akeekidosona.

14 Enti deriyape asaako simmiya wode issi asi Yesuusa sinthan gulbatidi, 15 “Godaw, hayyana ta na7aas qadhetarki; iya shocidi yeggiya hargey daro un7ethidi tamaninne haathan yeggees. 16 Ne tamaaretako ehas, shin enti pathanaw danda7ibookona” yaagis.

17 Yesuusi zaaridi, “Hinteno, ammanonna geella yeletethaw awude gakanaw ta hintera daanee? Awude gakanaw ta hintena danda7anee? Ane na7aa haa eki yiite” yaagis. 18 Yesuusi tuna ayyaana hanqin, tuna ayyaanay na7aape keyis; he saatenka na7ay paxis. 19 Hessafe guye, Yesuusa tamaareti bantarka iyako shiiqidi, “Nuuni tuna ayyaana kessanaw danda7iboonay aybisee?” yaagidi oychidosona. 20 I entako, “Hintew ammanoy laafida gishosa. Ta hintew tuma odayis; gaashe ayfe mela ammanoy hintew de7iko ‘Ha zumaa haysafe dendada gede aadha’ giiko hintew kiitetana. Hintew danda7etonabay deenna. 21 [Shin hessa melay woosapenne xoomape attishin, haran keyenna”] yaagis.Maato 21:21; Mar 11:23; 2 Qoro 13:2.*Issi issi beni maxaafatan paydo 21 deenna.

22 Yesuusa tamaareti Galilan shiiqidi de7ishin Yesuusi entako, “Asa Na7i asa kushen aadhidi imetana. 23 Enti iya wodhana, shin I heedzantho gallas hayqope dendana” yaagis.

Iya tamaaretika daro qiirotidosona.

24 Yesuusaranne iya tamaaretara Qifirnahooma katama gakida wode Xoossa Keetha giira qanxiseysati Phexroosako yidi, “Hinte astamaarey Xoossa Keetha giira giirii?” yaagidi oychidosona.Kessa 30:13.

25 Phexroosi zaaridi, “Giirees” yaagis. Phexroosi soo geliya wode Yesuusi kasetidi, “Phexroosa, new ay daanii? Ha sa7aa kawotethati qaraxanne giira oope ekona? Gade asapeye woyko asa gade asapee?”†Gade asapeye woyko asa gade asapee: He wode kawotethati banta gade asape giira ekokona. yaagidi oychis.

26 Phexroosi “Asa gade asape” gidi zaaris.

Yesuusi zaaridi, “Gade asay giira giirokona guussu. 27 Shin enti dhubetonna mela abba bada molo oykanaw manxaqo yegga. Koyro ne oykiya moluwa doona dooyada giiras gidiya miishe ne gishonne ta gisho efada giira” yaagis.