1 “Xoossaa kawotethay ba woyne gaden une oothiya asi oosisanaw wonta guura keyida ura daanees. 2 I he une oothiya asa hachi hachi issi dinaare*Issi dinaare: Issi asi issi gallas oothi pee7idi ekiya miishe. qanxanaw entara giigidi, enta ba woyne gadiya giddo yeddis.

3 “Qassi wontafe heedzu saate gidishin keyidi ooso dhayidi giya bolla eqida hara asata demmis. 4 I entako, ‘Hinteka ta woyne gadee giddo bidi oothite, taani hintew bessiya gatiya qanxana’ yaagis. 5 Entika bidosona. Qassika I usupun saateninne uddufun saaten keyidi hessada oothis. 6 Tammanne issi saate gidishin I keyiya wode harati yan eqidaysata demmidi, ‘Hinte ooso oothonna gallas kumethi haysan ayis eqidi pee7idetii?’ yaagis.

7 “Enti zaaridi, ‘Nuna une oosisiya asi dhayida gishosa’ yaagidosona.

“Ika, ‘Hinteka ta woyne gadiya giddo bidi oothite’ yaagis.

8 “Sa7i omarsin, woyne gadiya goday oosanchota halaqaako, ‘Oosanchota xeegada wursethan ooso gelidaysatape doomada koyro gelidaysata gakanaw enta gatiya qanxa’ yaagis.Leewe 19:13; Zaare 24:15. 9 Tammanne issi saaten ooso oykidaysati yidi, huuphen huuphen issi issi dinaare ekidosona. 10 Koyro ooso oykidaysati yidi, bantaw daro imetana gidi qopidosona. Shin entika huuphen huuphen issi issi dinaare ekidosona. 11 Banta miishiya eki simmidi godaa bolla zuuzumidosona. 12 ‘Haysati guyepe yidi issi saate xalaala oothidosona. Shin gallas kumethi awa suulan daaburidi pee7ida nuura enti waanidi issino gidoona’ yaagidosona.

13 “Woyniya goday oosanchotape issuwako, ‘Ta ishaw, taani nena qohabike; ne taara giigiday issi dinaaresa gidennee? 14 Ne miishiya ekada ne soo ba. Ta omarsi yidaysaska neysa mela immanaw koyayis. 15 Taani ta miishiyan koydaba oothanaw taw maati baawee? Woyko taani keeha gidida gisho neeni qanaatay?’ yaagis.

16 “Hessada ha77i dethan guye gididaysati sinthatana, sinthatidaysati qassi guyetana” yaagis.Maato 19:30; Mar 10:31; Luqa 13:30.

17 Yesuusi Yerusalaame bishe, tammanne nam7u tamaareta dumma gaxa kessidi entako yaagis: 18 “Heko, nuuni ha77i Yerusalaame buussaa bolla de7oos. Yan Asa Na7ay kahine halaqatasinne higge astamaaretas aadhidi imetana. Enti iya bolla hayqo pirda pirdana. 19 Iya Ayhude gidonna deriyas aathidi immana. Enti iya kawushana, garaafana, yaatidi iya masqaliya bolla kaqana. Shin I heedzantho gallas hayqope dendana” yaagis.

20 He wode Zabdiyoosa machiya ba nam7u adde naytara Yesuusako yada, iya sinthan gulbatada issiba iya woossasu.

21 Yesuusi iiko, “Ne ay koyay?” yaagis.

Iya zaarada, “Ne kawotethan ha ta nam7u nayti issoy ne ushachan issoy ne haddirsan utto garki!” yaagasu.

22 Shin Yesuusi naytako zaaridi, “Hinte ay woossiyako ereketa; taani uyanaw de7iya waaye xuu7aa uyanaw danda7eetii?” yaagis.

Entika, “Ee danda7oos” yaagidosona.

23 Yesuusi, “Tumaka taani uyanaw de7iya xuu7ape hinte uyana. Shin ta ushachaninne haddirsan uttanayisata doorey tana gidike. He bessay imetey, ta aaway immanaw giigisida asatasa” yaagis.

24 Attida tammu iya tamaareti hessa si7ida wode nam7u ishata bolla hanqetidosona. 25 Shin Yesuusi enta ubbaa xeegidi haysada yaagis. “Ayhude gidonna asaa haareysati banta asaa bolla godateysanne enta kaaletheysati wolqan haareysa hinte ereeta. 26 Shin hinte giddon hessada gidopo. Hintefe gitatanaw koyiya oonika hintew aylle gido.Maato 23:11; Mar 9:35; Luqa 22:26. 27 Hinte giddon ubbaafe bolla gidanaw koyiya oonika hintew aylle gidanaw bessees. 28 Hessadaka, Asa Na7ay ase haggaazanawunne daro asaa wozanaw ba shempuwa immanaw yisipe attishin, asan haggaazetanaw yibeenna” yaagis.

29 Hessafe guye, Yesuusi ba tamaaretara Iyaarkofe keyidi bishin, daro asay entana kaallidosona. 30 Oge gaxan uttida nam7u qooqeti Yesuusi yaara aadheysa si7idi, “Godaw, Dawita Na7aw, nuus qadhetarki” yaagidi waassidosona. 31 Daro asay entana, “Hayzite” yaagidi kaccidosona. Shin enti, “Godaw, Dawita na7aw, nuus qadhetarki” gidi guji waassidosona.

32 Yesuusi eqidi, enta xeegidi, “Ta hintew ay oothana mela koyeetii?” yaagidi oychis.

33 Entika, “Godaw, nu ayfey xeellana mela koyoos” yaagidosona. 34 Yesuusi entaw qadhetidi, enta ayfiya bochis. Ellesidi enta ayfey xeellis; enti iya kaallidi bidosona.