Mikiyaasa Maxaafa
Gaatha Qofa
Nabey Mikiyaasi, Yihuda biittan de7iya Moreseet-Gaate geetetiya guta ase (1:1). I Isayaasinne (Isa 1:1), Hosey (Hose 1:1) de7ida woden de7is. Iya kiitay Isayaasa shempo 1-39 gakanaw de7iya kifiliyara qofan matees. Isayaasada, Mikiyaasika leemiso odata daro go7etis (1:1-5; 2:4, 6, 11; 3:2-3; 4:3-4, 12-13).
Mikiyaasi K.Y.S. 740-710 laythi gakanaw de7iya wodetan, hessika Yihuda kawota Iyo7atama, Akaazanne Hizqiyaasa woden tinbite odis (shem 1:1). I, Samaarey kundanaape sinthe Isra7eelesinne Yihudas, nam7aas tinbite odis (1:5-7). Hizqiyaasa kawotetha wode, Asoorey, Isra7eele dhaysiya wodenne Goday Yerusalaame malaalsiya ogen ashshiya wode Mikiyaasi de7ees (2 Kawo 15—20; Isa 36—39; 2 Taari 27—32).
Mikiyaasi, Xoossa kiita asaas odees (3:8); Samaarenne Yerusalaame enta nagara gisho mootees (1:2-7). He nagarati, laymatethi (1:7; 5:12-14); asa biitta bonqe (2:2, 9); biitta ayseysati, haymaanote kaaletheysati, nabetinne zal7anchoti, xillotethi dhaysidosona; wodhaafe ekoosona; asaa qohoosonanne; dumma gene oothosona (3:1-3; 7:3, 5-7, 11; 6:6-7, 10-12).
Hessa gisho, Xoossi Isra7eele asaa pirdanaw Asoorenne Babiloone (4:10; 5:5-6) denthanaw de7eysa Mikiyaasi odis. Wursethan Mikiyaasi ba qofa kuuyishe, “Asa na7o, Goday new lo77oba odis. Goday neepe koyey aybee? Neeni suure pirdana mela, maarota dosana melanne ne Xoossara ashketethan daana mela gidennee?” (6:8) yaagidi asaa Xoossako xeegees.
Maxaafa Ayfe Qofata
Isra7eelenne Yihuda bolla yaana pirda (1:1—3:12)
Ooratha Isra7eelen ooratha Xoossa keethi (4:1—5:15)
Xoossay Isra7eelera mootetees (6:1—7:7)
Kawotethati xoossaako simuwa (7:8-20)
1
1 Iyo7atami Akaazinne Hizqiyaasi kaalli kaallidi Yihudan kawotida wode Mooreseeta katama asi gidida Mikiyaasako yida Godaa qaalay haysa: I Samaarebanne Yerusalaameba qoncethi be7is.
2 Hinte, asa ubbay si7ite;
sa7inne iya de7iya ubbay haysa hayzidi si7ite.
Ubbaa Haariya Goday,
ba geeshsha keethaafe hinte bolla markatees.
Yerusalaamenne Samaare Dhayo
3 Heko, Goday ba de7iya bessaafe yees;
biitta dhoqa bessata bolla hemetees.
4 Muqaadi taman til77eysada,
haathi derepe duge goggeysada,
dereti iya tohuwape garsan til7ana;
zangaarati phalqetana.
5 Hessi ubbay haniday Yayqooba qohuwa gishonne Isra7eele nagaraa gishosa. Yayqoobi baletana mela gaaso gididay oonee? Enta katamaa Samaare gidenneyee? Yihuda asay eeqa goyinnana mela gaaso gididay oonee? Yerusalaame gidenneyee? 6 Hessa gisho, Goday, “Taani Samaare, denban keeletida shuchinne woyney tokiya bessa mela oothana. Taani iya shuchaa zangaaran holana; iya baasuwa kalloyana. 7 Iya eeqa misileti ubbay tinchetana; iya eeqa keethan oothiya laymatas imetida gatey ubbay xuugetana; taani iya eeqata ubbaa dhaysana. He gate ubbay layman demmidaba gidiya gisho, ika simmidi, hara laymas imetana” yaagees.
Waasonne Yeeho
8 Hessa gisho, taani yeekananne waassana; xire kallonne mela tohon hemetana. Workanada waassana; qassi yanchoda yii gaana. 9 Samaare madunthay paxanaw danda7enna. He waayey Yihuda biitta gakis; ta asay de7iya Yerusalaame katamaa pengiyako gakis.
10 Gaate kataman de7iya nu morketas hessa odopite; enta sinthan yeekofite. Beet-Ofiira kataman baanan gondoretidi yeekite. 11 Hinteno, Shafira kataman de7eysato, kallo yeellatishe, di7etidi biite. Xanaana kataman de7eysati yaape keyanaw xaalokona. Beet-Exela katamay yeehoy de7iya bessi gidiya gisho, I hintew attiya bessi gidanaw danda7enna. 12 Metoy Godaape Yerusalaame penge gakanaw yida gisho, Marootan de7iya asay, “Lo77obay yandeesha!” gidi naagishe daaburis.
13 Xiyoone asaa nagaray koyro hinte bolla bentida gishonne Yerusalaame asaa nagaray hintenan bentida gisho, hinteno, Laakiso kataman de7eysato, gaare parata koorite. 14 Hessa gisho, hinteno Yihuda asato, hinte bidi, Moreseet-Gaate katama asas imota immana. Akziiba katama asay Isra7eele kawota cimmana.
15 Hinteno, Maaresha kataman de7eysato, Goday hintena olidi oykiya olanchota hinte bolla ehana; bonchetida Isra7eele halaqati Adulaama gongoluwan qosetana. 16 Hinteno, Yihuda asato, hinte dosiya nayti hintefe di7etidi baanaw de7iya gisho, hinte huuphiya meedetite; hinte huuphiya qoorase huupheda borooqo oothite.