1 Taani, “Yayqooba kochata halaqatonne Isra7eele asaa kaaletheysato, si7ite! Hinte suure pirdaa eranaw besseneyee? 2 Hinte lo77o ixidi, iita doseeta. Ta asaa galbaa qaareta; enta ashuwa enta meqethafe shaaketa. 3 Hinte ta asaa ashuwa meeta; enta galbaa qaaridi; enta meqethaa qanxeretheta; asho disten yegganaw muxeysada enta ashuwa muxeretheta. 4 Enti iita ooso oothida gisho, he wode enti Godaako waassana, shin I entaw zaarenna; I ba som7uwa he wode entafe qottana” yaagas.

5 Goday wordo nabetako, “Hinte miyaba immiya wode, ‘New sa7i saro’ yaageeta; shin hintena muzonna ixiko iya bolla ola awaajeta. 6 Hessa gisho, hintew gallas qamma gidana; qoncethi be7eketa. Sa7i hintew dhumana; zaaridi murunneketa; nabetas awii wullana; gallasi dhumana. 7 Qoncethi be7eysati yeellatana; murunneysati kawuyana. Godaa matape entaw zaaroy bayna gisho, enti yeellatidi, ubbay banta doona oykana” yaagees.

8 Shin taani Yayqooba zerethaas enta nagara, Isra7eele asaas enta nagaraa odana mela wolqan, Godaa Ayyaanan, suure pirdaaninne minotethan kumas. 9 Hinte suure pirdaa ixeysatinne lo77oba geellayiya Yayqooba kochata halaqatinne Isra7eele asaa kaaletheysati haysa si7ite. 10 Hinte Xiyoone katamaa suuthi gussidi keexeta; Yerusalaame katamaa geellatethan gimbeta. 11 Iya halaqati wodhaafen pirdoosona; kahineti miishen tamaarsoosona; nabeti miishey bayna murunnokona. Shin he ubbaa oothidi, “Goday nu giddon de7iya gisho, nu bolla iitabay yeenna” yaagidi iya ammanetosona. 12 Hessa gisho, hinte gaason Xiyoone katamay gadeda goyetana; Yerusalaame katamay laaletha doore gidana. Xoossa keethay keexetida derey wora gidana.