1 Goday Isra7eele asaas odeysa si7ite.

Abeeti Godaw, dendada dhoqa dereta sinthan pirdeta; neeni odiyaba zumati si7o. 2 Hinte dereti, hinte mino sa7aa baasoti, Goday mootiya mootuwa si7ite. Goday ba asaara mootetees; Isra7eele asaara palamees.

3 Goday, “Ta asaw, taani hintena ay qohadinaa? Taani hintew waanada tooho gidadina? Ane taw odite! 4 Taani hintena Gibxe biittafe kessas; ta hintena aylletetha biittafe wozas. Hintena kaalethana mela Muse, Aaronanne Mayraamo hintew immas. 5 Ta asaw, Moo7abe kawa Balaaqi new qopidabaanne Bi7oora na7ay Balaami iyaw woygidi zaaridaako akeekite. Neeni Seeximape Galgala biya wode, ogen hanidaba ane qopite. Hessa hinte qopiko taani Goday hintena ashshanaw oothidaba ubbaa hinte akeekana” yaagees.

6 Godaa, dhoqa bessan de7iya Xoossaa sinthan goyinnanaw yashe taani ay ekada shiiqo? Iyaw xuussa yarsho gidana mela issi laytha wofaano ekada yo? 7 Goday mukulu dorsa marazetan woyko tammu mukulu shaafan de7iya haatha mela shamaho zayten ufaytandee? Ta naaquwa gisho, ta bayra na7aa, ta shempuwa nagaraa gisho ta yeluwa immo?

8 Asa na7o, Goday new lo77oba odi wothis. Goday neepe koyey aybee? Neeni suure pirdana mela, maarota dosana melanne ashketethan ne Xoossara daana mela gidennee?

9 Goday, “Yerusalaame katamaa xeegidi, ‘Iya sunthaas yashetethi cincatethi’ Seera xam7anne iya giigisiday ooneko akeekite. 10 Nagaranchoy genen ba son shiishida shaluwanne ixetida wordo maka miisheta taani doganeyee? 11 Yaatin, taani wordo mizaanen wordo maka miisheta waatada atto go? 12 He katamaa dureti geellatethan kumidaysata. Iyan de7iya asa ubbay wordancho; enta inxarsay iita. 13 Hessa gisho, taani hinte nagaraa gisho hintena dhaysanaw dendas. 14 Hinte maana, shin kalleketa; koshi hintefe duuxenna. Hinte buuridi shiishana, shin hintew aadenna; hinte dagayaba taani mashshan dhaysana. 15 Hinte kathi zerana, shin cakeketa; shamaho teera gum7ana, shin go7eteketa; woyne teera gum7ana, shin iya uyeketa. 16 Hinte kawa Omira wogaa, iya na7aa kawa Akaaba soo iita oosuwanne enta zoriya kaallida gisho, taani hintena dhaysana; hintena asi ubbay boronna mela oothana. Asay hintena cayiya cashshaa hinte tookana” yaagees.