13
Xoossa Keethay Laaletonna Attenna
(Maato 24:1-2; Luqa 21:5-6)
1 Yesuusi Xoossa Keethafe keyishin, iya tamaaretape issoy, “Astamaariyaw, ha lo77o shuchaanne ha lo77o shucha keethaa be7ay!” yaagis.
2 Yesuusi zaaridi, “Ha gita shucha keethaa be7ay? Ha keethay shuchi shucha bolla gimbetida mela laaletonna attenna; issi shuchika attonna ubbay laaletana” yaagis.
Wode Wursetha Malaatata
(Maato 24:3-14; Luqa 21:7-19)
3 Yesuusi Xoossa keethafe hini baggara Shamaho zuma bolla uttidashin, Phexroosi, Yayqoobi, Yohaanisinne Indiriyasi bantarka iyako yidi, 4 “Haysi awude hananeeko nuus oda; ha ubbay poletana wodiya erisiya malaatay aybee?” yaagidi oychidosona.
5 Yesuusi qassi entako haysada yaagidi odis. “Hintena oonika balethonna mela naagetite. 6 Daro asati ta sunthan, ‘Taani Kiristoosa’ yaagidi tamaarsishe yidi, daro asaa balethana. 7 Matan de7iya olaanne haahon de7iya ola wore hinte si7iya wode hirgofite. Hessa melabay hananaw bessees, shin wursethay buroona. 8 Issi biitta asay hara biitta asaara oletana; qassi issi kawotethay hara kawotethatara oletana; biitta qaaxoy ubba bessan hanana; koshay daana, shin hessi ubbay yelo iqethas zooke mela.
9 “Shin hinte, hinte huuphen naagetite. Ayis giiko, asi hintena oykidi, pirda keethas aathidi immana; qassi ayhude woosa keethatanka hintena lisson garaafana; deriya haareyisata sinthaninne kawota sinthan ta gisho hinte markatanaw eqana.Maato 10:17-20; Luqa 12:11-12. 10 Wursethay gakanaape sinthe wongelay koyro dere ubbaas odetanaw bessees. 11 Enti hintena pirda keethi ehiya wodenne aathidi immiya wode, woygidi odaneko koyro hirgofite; he saatiyan Xoossay hintew immiyaba odite. Hintenan Geeshsha Ayyaanay odeteesipe attishin, hintena gideketa.
12 “Ishay ba ishaa, aaway ba na7aa wodhisana. Nayti bantana yelidaysata bolla dendidi, enta wodhisana. 13 Asa ubbay hintena ta suntha gisho ixana, shin wursethi gakanaw minniday attana.Maato 10:22.
Yaana Iita Metuwa
(Maato 24:15-28; Luqa 21:20-24)
14 “Shin dhayo tunatethay eqanaw bessonna bessan eqidashin hinte be7ana.” (Akeekiso: Hessi woy guusseko nabbabeysi akeeko!) “Yihuda biittan he wode de7eysati deriyako baqato.Zaare 9:27; 11:31; 12:11. 15 Keetha huuphen de7iya urayka issiba ekanaw duge wodhidi, ba soo gelopo.Luqa 17:31. 16 Gaden de7eysi ba ma7uwa ekanaw guye simmofo. 17 He wode qanthatida maccasatasinne dhanthiya maccasatas daro un7a gidana. 18 Shin haysi ubbay haniya wodey balgo gidonna mela, Xoossaa woossite. 19 Ayis giiko, Xoossay alamiya medhida wodiyape doomidi, ha77i gakanaw haniboonna metoynne sinthafeka hanonna metoy asa bolla he wode hanana.Zaare 12:1; Qon 7:14. 20 Goday he gallasata taybuwa guuthonnaako, ase gidida oonika attenna. Shin I ba doorida asa gisho, he gallasata taybuwa guuthees.
21 “He wode oonika hintena, ‘Heko, Kiristoosi haysan de7ees woyko Kiristoosi hinin de7ees’ yaagiko, hessa ammanopite. 22 Wordancho Kiristoosatinne wordo nabeti dendidi bantaw danda7etiko, hari attoshin Xoossay dooridaysataka balethanaw malaatatanne malaalsiyabata bessaana. 23 Shin hinte naagetite; taani hintew ubbaba kasetada odas.
Asa Na7a Yuussaa
(Maato 24:29-31; Luqa 21:25-28)
24 “Shin he wode he waayiyape guye,
away dhumana;
ageenay poo7uwa aggana.Isa 13:10; Ermi 2:10.
25 Xoolintoti salope kundana;
qassi salon de7iya wolqatika qaaxana.Isa 34:4; Qon 6:13; Ermi 2:10.
26 He wode Asa Na7ay, gita wolqaranne bonchuwara shaara giddora yishin enti be7ana.Zaare 7:13; Qon 1:7. 27 He wode I kiitanchota sa7a oyddu bagga kiittana; sa7a gaxape salo gaxa gakanaw, Xoossay doorida asaa shiishana.
Balase Mithafe Tamaarite
(Maato 24:32-35; Luqa 21:29-33)
28 “Leemisuwa balase mithafe akeekite; balasiya aaciya wodenne I haythay cil7iya wode, torchey matatidaysa hinte ereeta. 29 Hessadaka, hinte he ubbabay haneysa be7iya wode, I matidi penge gakidaysa erite. 30 Taani hintew tuma odayis; ha ubbabay hanana gakanaw haysan de7iya asa ubbay hayqenna. 31 Saloynne sa7i aadhana, shin ta qaalay aadhenna.
Yesuusi Yaana Galasay Eretenna
(Maato 24:36-44)
32 “Shin he gallasaanne he saatiya Aawa xalaalape attishin, hari attoshin salon de7iya kiitanchota gidin woyko Na7aa gidin oonika erey baawa.Maato 24:36. 33 He wodey awude gidaneeko, hinte eronna gisho, naagetitenne minnite. 34 Ta yuussay, ba keetha aggidi, oge biya asa mela. Uray ba aylletas huuphen huuphen ooso immidi enta ba oosuwa bolla aawa oothis; qassi naageysi minthidi naagana mela kiittis.Luqa 12:36.
35 “Hessa gisho, minnite. Ayis giiko, goday omarsi gidin woyko giddi bilahe gidin woyko kutto waaso gidin woyko wonti maathe gidin awude yaaneko, hinte ereketa. 36 Hinte akeekona I yidi hinte dhiskidi de7ishin demmonna mela minnite. 37 Taani hintew odeysa asa ubbaas odayis; minnite” yaagis.