16
Yesuusa Hayqope Denduwa
(Maato 28:1-8; Luqa 24:1-12; Yoha 20:1-10)
1 Sambaati aadhidaape guye, Magdela Mayraama, Yayqooba aayiya Mayraamanne Salooma bidi, Yesuusa aha tiyanaw shitto shammidosona. 2 Wogga wode wonta daro guura xalqey caarishin, duufo bidosona. 3 Enti banta giddon issoy issuwara, “Duufuwa doonape nuus shuchaa oonee gondorsidi digganay?” yaagidi odetidosona.
4 Enti xeelliya wode he daro gita shuchay gondoretidi kichidaysa be7idosona. 5 Yesuusi moogetida duufuwa giddo geliya wode issi pantha addey bootha ma7o ma7idi, ushacha baggara uttidaysa be7idi dagammidosona.
6 Shin I entako, “Dagammofite; masqaliya bolla kaqetida, Naazirete Yesuusa hinte koyeysa taani erayis. I haysan deenna, hayqope dendis. Enti iya moogida bessa haysa be7ite. 7 Ha77i bidi Yesuusa tamaaretasinne Phexroosas, ‘Yesuusi hintefe sinthatidi Galila bees. I, hintew odidaysada hinte iya yan be7ana’ yaagidi odite” yaagis.Maato 26:32; Mar 14:28.
8 Maccasati yashshan kokorishe duufope keyidi baqatidosona. Qassi enti yayyida gisho, hessa oodeska aykoka odibookona.*Issi issi beni maxaafati Marqoosa Wongela paydo 8 bolla essoosona. Qassi issi issi maxaafati paydo 9-20 gakanaw de7iya qofaa gujokona. Gidoshin, paydo 8 kaallidi de7iya gujoosona. Hessika [Maccasati bidi, kiitanchoy odidaba ubbaa Phexroosasinne iyara de7eysatas qanthan odidosona. Hessafe guye, Yesuusi ba tamaareta geeshshinne merinaa atotetha Wongela kiitaa dolohape wuloha gakanaw kiittis.]
Yesuusi Magdela Mayraamis Qoncis
(Maato 28:9-10; Yoha 20:11-18)
9 Yesuusi hayqope dendidaape guye, wogga gallas wonta, laapun tuna ayyaanata kessida Magdela Mayraamis koyrottidi bentis. 10 Iya bada kase iyara de7eysatas, enti azzanishenne yeekishe de7ishin odasu. 11 Shin Yesuusi paxa de7eysanne iw bentidaysa enti si7ida wode iya geysa ammanibookona.
Yesuusi Nam7u Tamaaretas Qoncis
(Luqa 24:13-35)
12 Hessafe guye, entafe nam7ati katamaape keyidi bishin, oge bolla Yesuusi kasepe dummatidi entaw bentis. 13 Enti guye simmidi, haratas odidosona, shin haratika enta odaa tuma gibookona.
Yesuusi Tammanne Issi Tamaaretas Qoncis
(Maato 28:16-20; Luqa 24:36-49; Yoha 20:19-23; Hawa 1:6-8)
14 Guyepe tammanne issi iya tamaareti kathi mishin, Yesuusi entaw bentis. Entaw ammanoy bayna gishonne hayqope I dendidaysa be7ida asay odin, enti ammanonna ixida gisho I enta boris.
15 I entako, “Biitta ubbaa bidi asa ubbaas wongela odite.Hawa 1:8. 16 Ammaneynne xammaqetey attana, shin ammanonay pirdetana. 17 Ammaneysatas ha malaatati imetana. Enti ta sunthan tuna ayyaanata kessana, ooratha doonan odetana. 18 Enti shooshu oykikoka woyko wodhiyaba uyikoka enta qohenna. Qassi enti banta kushiya harganchota bolla wothidi enta pathana” yaagis.
Yesuusi Pude Salo bis
(Luqa 24:50-53; Hawa 1:9-11)
19 Goday Yesuusi tamaaretara odetidaape guye, pude salo keyis; Xoossafe ushacha baggara uttis.Hawa 1:9. 20 Iya tamaareti bida bessa ubban qaala odidosona. Godayka entara issife oothees. Enti odiya qaalay tuma gididaysa Xoossay entaw immiya malaatatan erisis.
16:7 Maato 26:32; Mar 14:28.
*16:8 Issi issi beni maxaafati Marqoosa Wongela paydo 8 bolla essoosona. Qassi issi issi maxaafati paydo 9-20 gakanaw de7iya qofaa gujokona. Gidoshin, paydo 8 kaallidi de7iya gujoosona. Hessika [Maccasati bidi, kiitanchoy odidaba ubbaa Phexroosasinne iyara de7eysatas qanthan odidosona. Hessafe guye, Yesuusi ba tamaareta geeshshinne merinaa atotetha Wongela kiitaa dolohape wuloha gakanaw kiittis.]
16:15 Hawa 1:8.
16:19 Hawa 1:9.