13
Kanaane Wochanaw Kiitetida Asata
1 Goday Museko, 2 “Taani Isra7eeletas immana Kanaane biitta wochana mela tammanne nam7u Isra7eele kochaafe issi issi asi halaqa oothada kiitta” yaagis.
3 Yaatin Musey Goday kiitidaysada Paarana mela biittafe Isra7eele kochaafe tammanne nam7u halaqata kiittis. 4 Enta sunthay haysafe kaallidi xaafetidaysata.
Robeela kochaafe Zakura na7aa Samu7a;
5 Simoona kochaafe Hoora na7aa Shaafaxa;
6 Yihuda kochaafe Yoofona na7aa Kaaleba;
7 Yisakoora kochaafe Yoosefa na7aa Yigi7aala;
8 Efreema kochaafe Nawe na7aa Awuse;
9 Biniyaame kochaafe Raafu na7aa Falxa;
10 Zabloona kochaafe Sooda na7aa Gadi7eela;
11 Yoosefa na7aa Minaase kochaafe Suusa na7aa Gaade;
12 Daane kochaafe Gamaala na7aa Ami7eela;
13 Aseera kochaafe Mika7eela na7aa Satura;
14 Niftaaleme kochaafe Waafisa na7aa Nahiba;
15 Gaade kochaafe Maka na7aa Ge7u7eela.
16 He biitta wochana mela Musey kiitida asata sunthay haysata. Musey Nawe na7aa Awuse sunthaa Iyyasu gidi sunthaa laammis.
17 Musey enta, “Negebe mela biitta kanthidi pude derey dariya biitta keyte. 18 Biittay ay mela biittako, asay ay mela minookonne taybon guutheko daroko be7ite. 19 Enti de7iya biittay lo77oko iiteko, enta katamati diretidaakonne mela de7iyako, 20 biittay araddeko laddeko, biittay woran kametidaakonne quu7eko be7ite. Minnite; he biittan de7iya katha ayfiyape ekonna yoopite” yaagis. He wodey woyney teeridi maxetiya wode.
21 Enti keyidi Siina mela biittafe doomidi, Lebo-Hamaata matan de7iya Rehooba gakanaw de7iya biitta wochidosona. 22 Negebe mela biitta kanthidi, Kebroona gakidosona. He bessan Akmaana, Sesayanne Talmaya geetetiya Enaaqa kochati de7oosona. Kebrooni Gibxen de7iya Xo7aane katamaape laapun laythi koyrottidi keexetis.
23 Yaara kanthidi, Eshkola Zangaara bidi gakiya wode teera woyne tashiyara qanxidosona. He tashey deexo gidiya gisho nam7u asi kaso aathidi tookidosona. Iya bolla gujidi oromaanenne balase mithaa ayfe ekidi yidosona. 24 Isra7eele asay he bessaafe woyne tashiya qanxida gisho he bessaa Eshkola Zangaara gidi xeegidosona.
25 Enti he biitta oytamu gallas wochidi guye simmidosona. 26 Paarana mela biittan Qaadesan de7iya Museko, Aaronakonne Isra7eele maabara ubbaako yidosona. Enti be7idaba asa ubbaas odidosona; he biittafe ekidi yida ayfiyaka enta bessidosona.
27 Enti Museko, “Neeni nuna yeddida biitta bida; he biittan maathinne eessi goggees; he biitta ayfiyaka haysa be7a. 28 Shin he biittan de7iya asay wolqaama; enta katamatika gimbe dirsan diretidaysatanne gita. Nuuni ubbaafe aathidi Enaaqa kochata yan be7ida. 29 Amaaleqati Negebe mela biittan; Hitetinne, Yaabuseti derey dariya Amooreta biittan; qassi Kanaaneti Medetiraane Abbaa doonaninne Yordaanose shaafa gaxan de7oosona” yaagidosona.
30 Yaatin Kaalebi asaa Muse sinthan si77i oothidi, “Nuuni xoonanaw danda7iya gisho, ha77i keyidi he biitta yegisidi ane oykoos” yaagis.
31 Shin Kaalebara bida asati, “He biitta asay nuupe aadhidi minniya gisho, nuuni enta xoonanaw danda7oko” yaagidosona. 32 Enti yuuyidi wochida biittaba Isra7eele asaas haysada yaagidi iita oda odidosona. “Nuuni wochida biittay yan de7iya asaaka miya biitta; yan de7iya asayka daro adusse. 33 Nuuni yan Enaaqa koche gidida Nifilime asata be7ida. Enta be7ida ayfen nuna xeelliya wode nuuni xaqo mela; entika nuna hessada be7oosona” yaagidosona.