21
Arada Xoonetethaa
1 Kanaane biittan, Negebe mela biittan de7iya Arada Kawoy, Isra7eele asay Ataarima efiya ogiyara yeysa si7ida wode Isra7eele asaara oletidi entafe guutha asaa di7idosona. 2 He wode Isra7eele asay, “Neeni ha asaa nu kushen aathada immiko, nuuni entanne enta katamata kumethi dhaysana” yaagidi Godaas qangidosona. 3 Goday Isra7eele asaa woosa si7idi, Kanaaneta enta kushen aathidi immin, enti Kanaanetanne enta katamata kumethi dhaysidosona. Hessa gisho, he bessay Horma*Horma: Kumethi woyko polo dhayso guussu geetetidi sunthetis.
Naase Biratape Oosetida Shooshu
4 Isra7eele asay Hoora zumaape dendidi, Edoome biitta yuushuwara baanaw Zo7o Abbaako efiya ogiyara bidosona; shin oge bolla asaas danda7ay wuris. 5 Asay, “Nuuni mela biitta hayqana mela Gibxefe nuna ayis kessidetii? Kathi baawa; haathi baawa; ha iita kathay nuna shaattis” yaagidi Xoossaa bollanne Muse bolla zuuzumidosona.
6 Yaatin, Goday asaa giddo marzera de7iya shooshi yeddin, Isra7eele asaape daroti duketidi hayqidosona. 7 Asay Museko yidi, “Nuuni Godaa bollanne ne bolla zuuzumidi, nagara oothida. Goday ha shooshata nuupe haassana mela nuus woossarki” yaagidosona. Yaatin, Musey asaa gisho woossis.
8 He wode Goday Museko, “Naase biratape shooshi medhada, enta sinthan mitha bolla kaqa; shooshan duketida oonika iya be7iko paxana” yaagis. 9 Yaatin, Musey naase biratape shooshi medhidi, mitha bolla kaqis. Shooshan duketida asa ubbay naase birata shooshaa be7idi paxidosona.
Hoora Zumaape Moo7abe Gakanaw
10 Isra7eele asay Hoorape dendidi Obota geetetiya bessan dunkaanidosona. 11 Obotape dendidi, Moo7abepe sintha baggan de7iya mela biittan, doloha baggan Abariiman dunkaanidosona. 12 Yaape dendidi, Zareeda Zangaaran dunkaanidosona. 13 Yaape dendidi, Amooreta biitta gaxa gakanaw de7iya mela biittan Arnoona Shaafape hefinthan dunkaanidosona. Arnoona Shaafay Moo7abe biittasinne Amoore biittas giddon de7iya zawa. 14 Hessa gisho, Godaa ola taarikiya odiya maxaafan, “Suufa heeran de7iya Waaheba katamaanne Arnoona Shaafa zangaara, 15 Era katamaanne Moo7abe biitta zawa gakanaw de7iya zangaara” yaagetidi xaafetis.
16 Enti yaape dendidi, Goday Museko, “Asaa shiisha; ta entaw haathe immana” yaagidi odida Beera geetetiya haatha ollaako bidosona.
17 He wode Isra7eele asay ha mazmuriya yexidosona.
“Haatha ollaw, pulta;
Hinteka yexite.
18 Halaqati bookida haatha ollaas,
kaaletheysati kawotetha xam7aninne banta xam7an
bookida haatha ollaas yexite” yaagis.
Enti he mela biittafe dendidi Mataana geetetiya bessaa bidosona. 19 Maatanape Nahili7eela, Nahali7eelape Baamota geetetiya bessaa bidosona. 20 Baamotape dendidi, Moo7aben de7iya zangaara bidosona; he zangaaray Pisga zumaape garsan bazzuwa ginan de7ees.
Sihoonanne Ooge Xoonetethaa
21 Hessafe guye, Isra7eele asay Amoore kawa Sihooneko haysada yaagidi kiita yeddidosona. 22 “Hayyana, nu ne biittara kanthidi aadhana mela ootharki; nuuni ogepe gaxa keyoko; ne goshsha woyko woyne gade giddo geloko; nuuni haatha ollafe haathe uyoko. Nuuni ne biittara kanthidi aadhana gakanaw haddirsi woyko ushachi gooko” yaagis.
23 Sihooney Isra7eele asay ba biittara kanthonna mela diggis. I ba olanchota ubbaa shiishidi, Isra7eele asaa olanaw mela biitta bis; Yahaaxa geetetiya bessaa bidi Isra7eele asaara oletis. 24 Isra7eele asay olan Amooretape darota mashshan wodhidi, Arnoona Shaafape doomidi, Amooneta zawan de7iya Yaaboqa shaafa gakanaw oykis. Amoone asaa biitta zaway gimbetidi de7iya gisho, enti yaa gelibookona. 25 Isra7eele asay Amooreta, Haseboonanne iya yuushuwan de7iya katamata ubbaa xooni ekidi yan uttidosona. 26 Haseboona katamay Amooreta kawa Sihoone uttiya katama. Sihooney kase Moo7abe biitta kawa olidi, Arnoona shaafa gakanaw de7iya biitta ubbaa ekis.
27 Hessa gisho, leemison haysada yaagidosona;
“Haseboonako haayite;
ha katamay zaaridi keexeto;
Sihoone katamay
kase ba bessaa simmo.
28 Tami Haseboonape keyis;
lacoy Sihoona kataman bentis;
Moo7aben de7iya Era dhaysis;
Arnoona dhoqa bessata mis.
29 Moo7abe, nena ayye!
Kamoosha asay dhayideta.
Hinte adde nayti baqatanaada,
hinte macca nayti di7etanaada,
Amooreta kawa Sihoones immis.
30 Nuuni hinte kochata Haseboonape doomidi,
Diboona gakanaw kumethi dhaysida.
Medeba matan de7iya Noofa gakanaw
de7iya ubbaa tami dhaysis” yaagidosona.
31 Yaatidi, Isra7eele asay Amooreta biittan de7idosona. 32 Qassi Musey wocheyisata Ya7izeera katamaa yeddin, Isra7eele asay he katamaanne iya heeran de7iya guutha katamata oykidi, yan de7iya Amooreta kessidi goodidosona.
33 Hessafe guye, Isra7eele asay simmidi, Baasane efiya ogiyara keyidosona. Baasane kawoy Oogey ba olanchotara Edraa7a kataman entara oletanaw keyis. 34 Shin Goday Museko, “Ha uraas babofa; hiza, kawa Ooge, iya asaanne iya biitta ubbaa ne kushen aathada immas. Haseboonan uttidi haarida Amooreta kawa Sihoone bolla ootheysada neeni iya bolla oothana” yaagis. 35 Hessa gisho, Isra7eele asay Ooge, iya naytanne iya asa ubbaa issoy attonna wodhidi iya biitta laattidosona.