1 Boshaape guye, Goday Musekonne kahiniya Aarona na7aa Alaazarako, 2 “Laythi laatamanne iyape bolla gidida Isra7eeleta, olanaw danda7eyisata ubbaa, enta keethan keethan taybite” yaagis.

3 Yaatin, Museynne kahiney Alaazari Yordaanose Shaafape hefinthan, Iyaarko matan, Moo7abe denban asaa shiishidi, 4 “Goday Muse kiitidaysada, laythi laatamanne iyape bolla gidida asaa taybidosona.”

Gibxefe keyida Isra7eele asay haysata.

5 Isra7eele bayra na7aa Robeela kochati banta kochan kochan, Hanooka kochaa, Faalu kochaa, 6 Hesiroona kochaanne Karma kochaa; 7 Haysati Robeela kochata; enta kumetha tayboy 43,730. 8 Faalu na7ay Eli7aaba; 9 Eli7aaba adde nayti Nemu7eela, Daatanenne Abeero. Daataninne Abeeroy maabaray dooridaysata, shin enti Qorenne iya kaalleysatara tobbidi Godaa bolla makallidi Muse bollanne Aarona bolla dendidosona. 10 Biittay dooyetidi enta Qorera issife mittis; enta kaalliya 250 asaa tami min hayqidosona. Yaatin, harati enta be7idi naagetana mela malla gididosona. 11 Shin Qore adde nayti ubbay hayqidi dhaybookona.

12 Simoona kochati banta kochan kochan, Nemu7eela kochaa, Yamina kochaa, Yakina kochaa, 13 Zaara kochaanne Saa7ula kochaa. 14 Haysati Simoona kochata; enta kumetha tayboy 22,200.

15 Gaade kochati banta kocha kochan, Xifoona kochaa, Haggi kochaa, Shuuna kochaa, 16 Esina kochaa, Era kochaa, 17 Arooda kochaanne Ari7eela kochaa. 18 Haysati Gaade kochata; enta kumetha tayboy 40,500.

19 Yihuda adde nayti Erinne Onani Kanaane biittan hayqidosona. 20 Yihuda kochati banta kochan kochan, Seela kochaa, Faaresa kochaanne Zara kochaa. 21 Faaresa kochay Hesiroonanne Hamuula. 22 Haysati Yihuda kochata; enta kumetha tayboy 76,500.

23 Yisakoora kochati banta kochan kochan, Toolla kochaa, Puu7a kochaa, 24 Yasuuba kochaanne Shimroona kochaa. 25 Haysati Yisakoora kochata; enta kumetha tayboy 64,300.

26 Zabloona kochati banta kochan kochan, Sareda kochaa, Eloona kochaanne Yahilaala kochaa. 27 Haysati Zabloona kochata; enta kumetha tayboy 60,500.

28 Yoosefa nayta Minaasenne Efreema kochati banta kochan kochan, 29 Minaasey Makira yelis, Makiri Galada yelis. 30 Galada kochati, Izera koche, Kelega koche, 31 Asir7eela koche, Seekema kochaa, 32 Shamida kochenne Hefeera koche. 33 Hefeera na7ay Selophaadi macca na7a xalaala yelis; iyaw adde na7i baawa. Selophaada macca nayta sunthay Mahilo, No7o, Hoglo, Milkonne Tirxo. 34 Haysati Minaase kochata; enta kumetha tayboy 52,700.

35 Efreema kochati banta kochan kochan, Shutula kochaa, Bekera kochaa, Tahana kochatanne 36 Shutula na7aa Erana kochata. 37 Haysati Efreema kochata; enta kumetha tayboy 32,500. Yoosefa kochati banta kochan kochan haysata.

38 Biniyaame kochati banta kochan kochan, Beella kochaa, Asbeela kochaa, Akira kochaa, 39 Shufaama kochaa, Hufama kochaa, 40 Beella na7aa Arada kochaanne Beella na7aa Naamane kochaa. 41 Haysati Biniyaame kochata; enta kumetha tayboy 45,600.

42 Daane kochati Saama kochaa. 43 Shuhaama kochaa kumetha tayboy 64,400.

44 Aseera kochati banta kochan kochan, Yimina kochaa, Yisiwa kochaa, Beri7a kochaa, 45 Beri7a na7a Hebeera kochaanne Beri7a na7aa Malki7eela kochaa. 46 Aseeras Saraho geetetiya macca na7i de7awusu. 47 Haysati Aseera kochata; enta kumetha tayboy 53,400.

48 Niftaaleme kochati banta kochan kochan, Yahixeela kochaa, Guna kochaa, 49 Yexera kochaanne Shileme kochaa. 50 Haysati Niftaaleme kochata; enta kumetha tayboy 45,400.

51 Taybetida Isra7eele adde asaa tayboy kumethi 601,730.

52 Goday Museko, 53 “Ha kochatas enta sunthaa sunthaa taybuwan biitta shaakada laata oothada entaw imma. 54 Taybon dareysatas darsada qassi taybon guuxeysatas guuthada imma. Ubbayka xaafetida banta taybuwa keena eko. 55 Shin biittay saaman shaaketo; issi issi kochay laata ekey ba kochaa sunthan gido. 56 Issi issi laatay taybon darota giddoninne taybon guuthata giddon saaman shaaketees” yaagis.

57 Banta zerthan zerthan taybetida Leewe kochati haysata; Gedisoona kochaa, Qahaata kochaanne Meraara kochaa. 58 Haysatika qassi Leewe kochata; Libina kochaa, Kebroona kochaa, Mohoola kochaa, Muse kochaanne Qore kochaa. Qahaati Amraama yelis. 59 Amraama mache sunthay Yokebeedo; iya Gibxen Leewepe yeletida Leewe na7a. Iya Aarona, Musenne enta michiw Mayraamo yelasu. 60 Aaronas Naadabe, Abyooda, Alaazaranne Itamaara geetetiya oyddu nayti de7oosona. 61 Shin Naadabeynne Abyoodi Godaa sinthan geeshshi gidonna taman yarsho yarshida gisho boshan hayqidosona. 62 Laythi issi ageenanne iyape bolla gidida Leewe adde nayta tayboy laatamanne heedzu mukula. Isra7eele asaa giddon entaw laata biitti imetiboonna gisho enti Isra7eeletara taybetibookona.

63 Yordaanose Shaafape hefinthan, Iyaarko matan, Moo7abe denban Museynne kahiney Alaazari Isra7eele asaa taybida wode taybetida asay haysa. 64 Museynne kahiney Aaroni koyro Siina mela biittan Isra7eele taybida wode taybetida asaape mexi issi asika attibeenna. 65 Goday ha Isra7eeletaba, “Enti ubbay mela biittan hayqana” yaagidi odida gisho, Yoofona na7aa Kaalebapenne Nawe na7aa Iyyasupe attishin, hari issi asika attibeenna.