1 Goday Museko, 2 “Isra7eele asaa haysada yaagada kiitta; xuugetiya sawiya katha yarsho woden woden taw yarshite. 3 Godaas taman xuugetidi yarshetiya yarshoy haysa; kumetha bollara de7iya issi laythi kumida nam7u marazeta wonta wonta xuussa yarsho oothidi yarshite. 4 Marazetape issuwa wonta issuwa qassi omarsi yarshite. 5 Qassi he maraziyara issi litiro shamaho zayten munuqetida issi kilo giraame lo77o giste dhiille katha yarsho yarshite. 6 Haysi Godaa ufaysiya xuussa yarsho. Ika Siina zuma bolla yarshetida koyro xuussa yarsho. 7 Koyro maraziyara issi litiro caala woyne ushsha yarsho oothidi yarsho bessan Godaas gussite. 8 Omarsi nam7antho maraziya yarshiya wode koyroysa mela katha yarshuwanne ushsha yarshuwa gujidi yarshite. Ika Godaa ufaysiya sawo yarsho gidana.”

9 “Sambaata gallas borey bayna issi laythi kumida nam7u marazeta zayten munuqetida nam7u kilo giraame lo77o giste dhiille ekidi katha yarshonne ushsha yarsho oothidi yarshite. 10 Gallas gallas yarshetiya xuussa yarshuwa bolla Sambaatan Sambaatan hinte yarshana xuussa yarshoynne ushsha yarshoy haysa.”

11 “Ageeni xeeriya koyro gallas nam7u wofaanota, issi marazenne issi laythi kumida borey bayna laapun dorsa urgeta xuussa yarsho oothidi Godaas yarshite. 12 Issi issi wofaanuwara shamaho zayten munuqetida heedzu kilo giraame gidiya lo77o giste dhiillera katha yarsho oothidi yarshite. Qassi shamaho zayten munuqetida nam7u kilo giraame gidiya lo77o giste dhiilliya maraziyara wolla yarsha. 13 Laapun marazetape issi issi maraze shamaho zayten munuqetida issi kilo giraame lo77o giste dhiillera xuugetiya sawiya katha yarsho oothada Godaas yarishsha. 14 Qassi ushsha yarshuwa issi issi wofaanuwas nam7u litiro woyne, issi maraziyas issi litironne bagga woyne ushshaanne issi issi dorsa urgiyas issi litiro gidiya woyne ushshi shiishite. Haysi laytha giddon ageeni xeeriya koyro gallasan oosetiya xuussa yarsho. 15 Gallas gallas yarshetiya xuussa yarshuwa bollanne ushsha yarshuwa bolla issi kole nagara yarsho oothidi Godaas yarshite.”

16 “Koyro ageenan tammanne oyddantho gallasay Godaa Paasika bonchiya gallas gido. 17 Qassi he ageenan tammanne ichashantho gallasan Uytha ba7aaley bonchetees; he gallasaape doomidi laapun gallas gakanaw irshoy geliboonna uytha miite. 18 He gallasatape koyro gallasan goyinnanaw shiiqite; he gallasan ay oosoka oothopite. 19 Borey bayna nam7u wofaanota, issi marazenne issi laythi kumida laapun dorsa urgeta xuussa yarsho oothidi Godaas yarshite. 20 Issi wofaanuwara shamaho zayten munuqetida heedzu kilo giraame lo77o giste dhiille, issi maraziyara nam7u kilo giraame dhiillenne 21 laapun dorsa urgetape issi issi dorsaara issi kilo giraame dhiille yarshite. 22 Qassi issi deeshi deriya nagaraas atotethi gidana mela nagara yarsho oothidi yarshite. 23 Hessa ubba wode gallas gallas yarshetiya yarshuwa bolla gujidi yarshite. 24 Ubba wode oosetiya xuussa yarshuwa bollanne ushsha yarshuwa bolla gujidi laapun gallasi Godaas sawiya katha yarsho oothidi yarshite. 25 Laapuntha gallasan goyinnoos shiiqite; he gallas ay oosoka oothopite.”

26 “Katha Shiisho Ba7aale saamintan koyro gallas goyinnoos shiiqiya wode hinte ooratha kathaafe yarsho yarshite; he wode ay oosoka oothopite. 27 Nam7u wofaanota, issi maraziyanne issi laythi kumida laapun dorsa urgeta Godaas sawiya xuussa yarsho oothidi yarshite. 28 Issi issi wofaanuwara shamaho zayten munuqetida heedzu kilo giraame lo77o giste dhiille, issi dorsa urgiyara nam7u kilo giraame dhiillenne 29 laapun dorsa urgetape issi issi urgiyara issi kilo giraame giste dhiille ekidi yarshite. 30 Iya bolla gujidi issi kole nagara atothetha yarsho oothidi yarshite. 31 Gallas gallas yarshetiya yarshuwa bollanne ushsha yarshuwa bolla katha yarsho yarshite. Hinte yarshiya meheti borey baynaba gido.”