1 Iyaarkofe hefinthan, Yordaanose shaafa matan de7iya Moo7abe denban, Goday Museko haysada yaagis; 2 “Isra7eeleti banta laatape Leeweti daana katamatanne enta yuushuwan hentha biitta immana mela entaw oda. 3 He katamati entaw duussa bessi gido; hentha biittati enta miizas, enta dorsaasinne enta hara mehetas gido. 4 Hinte entaw immiya hentha biittay ubba baggara katamaa gimbe dirsaafe issi mukulu wadha gido. 5 Katamaa giddo oothidi doloha baggara nam7u mukulu wadha, dugeha baggara nam7u mukulu wadha, wuloha baggara nam7u mukulu wadhanne pudeha baggara nam7u mukulu wadha wadhite. Leeweti he heera banta katamaas hentha biitta ootho.

6 “Leewetas hinte immida katamati, ase wodhida uray baqatidi attiya usupun katamata; hessata bolla gujidika, oytamanne nam7u hara katamata entaw immite. 7 Oytamanne hospun katamata enta hentha biittara issife Leewetas immite. 8 Isra7eele asaa laatape enta laata mela daro kochaafe daro katama, guutha kochaafe guutha katama ekidi Leewetas immite” yaagis.

9 Goday Museko, 10 “Isra7eele asaako haysada yaaga; Yordaanose shaafa pinnidi, Kanaane biitta hinte geliya wode, 11 issi asi qoponna ase wodhidaba gidiko he uray baqatidi attana mela katamata hintew doorite. 12 Yan suuthu zaaranaw koya hayqida uraa dabbotape I attees. Shempo wodhida deriya sinthan pirdas shiiqonna hayqanaw bessenna. 13 Ha hinte immiya usupun katamati hinte baqatidi attiya katama gido. 14 Heedzu katamati Yordaanose shaafape doloha baggan gido; qassi attida heedzati Kanaane biittan gido. 15 Ha usupun katamati eronna ase wodhida Isra7eele asay, betanchotinne guutha wodes hinte giddon de7iya asati baqatidi attiya bessi gido.

16 “Issi asi hara asi birata miishen shocidi wodhiko he uray shempo wodhis; I hayqo. 17 Issi asi wodhanaw danda7iya shuchan hara asi caddidi wodhiko he uray shempo wodhis; I hayqo. 18 Issi asi wodhanaw danda7iya mitha miishen hara asi shocidi wodhiko he uray shempo wodhis; I hayqo. 19 Suuthu zaariya mata dabboy he shempo wodhidaysa demmiko wodho.

20 “Issi asi hara asi ba wozanan morkidi sugi yeggiko woyko hayqo gidi iya bolla issiba holin he uray hayqiko, 21 woyko morkidi ba kushe cuucummidi dechin he uray hayqiko, I shempo wodhis; I hayqo. Suuthu zaariya mata dabboy shempo wodhidaysa demmiko wodho.

22 “Shin morketethi baynan, issi asi hara asi akeekona sugidi woyko qoponna iya bolla issiba holiko, 23 woyko wodhanaw danda7iya shuchu I be7onna iya bolla holin, he uray hayqiko, hessan morketethi bayna gishonne iya qohanaw qopidi dendonna gisho, 24 duulatay iya giddoninne iya suutha zaaranaw koya uraa giddon pirdiya wogay kaallidi de7iya wogaatho gido. 25 Eronna wodhidaysa suuthaa zaaranaw koyeysa kushepe he uraa duulatay ashshidi, I baqatidi attiya katamaa zaaro. He wode de7iya zayten tiyetida kahine halaqay hayqana gakanaw I yan de7o.

26 “Shin eronna wodhidaysi baqatidi attiya katamaa zawape betiko, 27 hayqida uraa dabboy iya demmidi wodhiko, shempo wodhon oyshetenna. 28 He wode de7iya kahine halaqay hayqana gakanaw he eronna wodhida uray baqatidi attiya kataman utto. Shin he kahine halaqay hayqidaape guye eronna wodhida uray ba soo simmanaw danda7ees.

29 “Ha wogaynne higgey hinte de7iya biittan hintewunne hinte zerethaas eqidi de7iya woga gido.

30 “Ase wodhida oonika I shempo wodhidaysa nam7u woyko heedzu marki markatiko hayqo, shin issi asa markatethan oonika hayqanaw bessenna. 31 Qassi shempo wodhida asape aca ekofite; I hayqanaw bessees. 32 Baqatidi attiya katama betida oodefeka kahine halaqay hayqanaape sinthe ba soo simmana mela aca iyape ekofite. 33 Suuthi biitta tunisiya gisho suuthu gussofite. Suuthu gussida uraa suuthaafe attishin, suuthi gukida biitta hara ogera tunatethaafe geeshshiya wogi baawa. 34 Taani, Goday Isra7eele asaa giddon de7iya gisho, hinte de7iya biitta, taani aqiya biitta tunisopite” yaagis.