1 Wursethan, ta ishato, hinte Godaaba gidiya gisho, ufaytite. Taani kase xaafidaysa zaarada xaafanaysi tana waaysenna, shin hintena balape naagana.

2 Iitabaa oothiya kanatape, qassi qaxaretanaw koshshees giya iita asatape naagetite. 3 Nuuni Xoossaa Geeshsha Ayyaanan goyinniya gishonne nu de7uwan Kiristoos Yesuusan ceeqetiya gisho, tuma qaxaro qaxaretidaysata. Nuuni kare asatethaa bolla oosetiyaban ceeqetoko.

4 Ta kare asatethan ceeqetanaw koshshiko ta daroban ceeqetanaw danda7ayis. Ay asika ba kare asatethan ceeqetiyabay baw de7ees gidi qopiko, taani iyape daro aadhada ceeqetiyabay de7ees. 5 Taani yeletida saamintara qaxaretas. Taani yeletan Isra7eele; taani Biniyaame koche; taani walaki bayna Ayhude ase. Ayhude higge naagon gidiko taani Farsaawe.Hawa 23:6; 26:5; Roome 11:1. 6 Ayhude ammanuwas mishetethan gidiko taani woosa keethaa yedethas. Issi asi higge naagidi xilliyaba gidiko, tanan borey bentibeenna.Hawa 8:3; 22:4; 26:9-11.

7 Shin kase tana maaddees gada qopidaba ubbaa, Kiristoosa gisho gada maaddonnaba oothada taybas. 8 Hessa xalaala gidonashin, taani ta Godaa Kiristoos Yesuusa ereysi haraba ubbaafe daro aadhiya gisho, he ubbaa wodhey baynabaada taybas. Taani iya gisho ubbaba dhayas. Kiristoosa demmanaw ubbaba wora holetida buureda taybayis. Taani Yesuusara issino gidas. 9 Taani higges kiitetada demmiya ta huuphe xillotethi taw baawa. Kiristoosa ammanin bentiya xillotethay, Xoossaa matape yaa xillotethay ha77i taw de7ees. 10 Taani Kiristoosanne iya dendo wolqaa eranaw koyayis. Taani iya metuwa iyara shaaketanawunne iya hayquwan iya daananaw amottayis. 11 Hessadaka, hayqope dendada merinaw de7on daanaysa ufaysi oothayis.

12 Taani ha77i gaxa gakas woyko tanan bali baawa giike. Shin Kiristoos Yesuusi tana oykida gisho taani ta sinthan de7iya woytuwa oykanaw woxaysinne butetayis. 13 Ta ishato, taani hessa demmas gada qopike, shin taani issiba oothayis. Taape guyera de7eysa dogada sinthan de7eysa oykanaw zaaturayis. 14 Hessa gisho, taani gaxa gakanaw woxayis. Xoossay Kiristoos Yesuusa baggara salo de7uwas xeegida woytuwa ekanaw daaburayis.

15 Hiza, nuuni Ayyaanan gashtida ubbay hessa qopanaw bessees. Hintefe baggatas dummatiya qofi de7iko, hessaka Xoossay hintew qoncisana. 16 Gidikoka, nuuni hanno gakanaw de7ida de7uwan, ane sinthe boos.

17 Ta ishato, tana daanite; hessadaka, nu leemisuwa kaalliya asata akeekidi be7ite.2 Qoro 4:16; 11:1. 18 Taani hessa hintew kase daro toho odas, shin ha77ika zaarada afuthan odayis. Kiristoosa masqaliyas bantana morke oothida daro asati de7oosona. 19 Enta wursethay dhayo; enta uloy entaw xoosse. Yeellatanaw bessiyaban enti ceeqetoosona; qassi ha sa7aba xalaala qopoosona. 20 Nu biittay saluwana. Salope yidi nuna ashshiya Godaa Yesuus Kiristoosa naagoos. 21 Kiristoosi ubbaba ba maatape garsan oothanaw danda7iya ba wolqan nu daaburancho asatethaa laammidi ba boncho asatethaa daanisana.