26
1 Bone shachi, kathi cakiya wode iri koshshonaysada,
eeyas boncho koshshenna.
2 Kafoti yaanne haanne piradhishe ase qohonnaysada,
gaasoy bayna baaddiya baadethi ase gakenna.
3 Paras lisso, hares bixaala koshsheysada
eeya zokos xam7a koshshees.
4 Eeya asas iya eeyatethaada zaaropa;
zaariko ne iya mela gidana.
5 Eeya asas iya eeyatetha qoncisada zaara;
hessi hanonna ixiko I bana cinca gidi qopana.
6 Eeya asa bolla kiita yedoy,
ba toho qanxi yeggeysa mela
woyko wodhiyaba uyeysa mela.
7 Eeya asa leemisoy,
silida toho mela maaddenna.
8 Eeya asas boncho imoy,
shuchu yambarshan qachi wothidi
yambaranaw paaciya asa mela.
9 Eeya asa leemisoy
mathotida asi ba kushe caddida agunthu
kessanaw baaxeteysa mela.
10 Eeya asa woyko ba oge biya asi
une oosisanaw qaxariya asi
ba toora shaaran xongiya asa mela.
11 Kani ba cooshshako guye simmidi laaceysada,
eeya asi ba eeyatetha zaari zaari qoncisees.
12 Bana cinca oothidi xeelliya asape
eeya asas lo77o qaadi de7ees.
13 “Azalla asi ogen gaammoy de7ees;
yashshiya gaammoy ogen yuuyees” yaagees.
14 Sanqi maxaafe bolla yaanne haanne qaaxeysada,
azalla asi ba hiixan yaanne haanne shiretees.
15 Issi issi azalla asi hari attoshin,
woxen tushidi baaranaw waayetees.
16 Azalla asi markara odiya laapun cincatape
bana aadhida cinca gidi qopees.
17 Bana gathiyabay baynaban palamiya asi
ogera biya kana haythi oykiya asa mela.
18-19 Ba shooruwa, “Taani kaasse gayis”
yaagidi cimmiya asi,
gooyidi bonqo tama holiya,
woyko wodhiya donge toora dukiya asa mela.
20 Mithi wuriko tami to7ees;
zigirsi dhayiko ooshshi attees.
21 Xiifi bonqo darseysadanne
mithi tama darseysada
palama darsiya asi ooshshu darsees.
22 Zigirsa qaali mal7o katha mela
ufaysishe duge ganje bees.
23 Wozanan iitabay de7ishin,
ba inxarsan cimo qaala haasaya asi
biran lanxetida urqa miishe mela.
24 Gene asi ba wozanan de7iya iitatethaa
ba inxarsan genthees.
25 Iya wozanan laapun tunati kumida gisho,
I lo77o qaala haasaykoka iya ammanopa.
26 Ba morketetha I genthikoka,
I oothiya iitay dabaaban qoncana.
27 Haratas olla bookiya asi he ollan baw kundana;
harata bolla shuchu gondorsiya asa bolla
he shuchay simmidi gondoretana.
28 Wordotiya inxarsi ba qohida asata ixees;
cimo odi kundethi kaalethees.