5
Wonta Woosa
Zammaareta Halaqaas Xaafetida Dawita Mazmure
Suusul7en yexetiya mazmure.
1 Abeeti Godaw, ta qaala si7a;
ta ooliya qopa.
2 Ta kawaw, ta Xoossaw ta waasuwa si7a;
ta maade koyada woossiya woosaa hayza.
3 Abeeti Godaw, wonta wonta
ta qaala si7aasa.
Wonta wonta ta woosa ne sinthe shiishayis;
ta ne zaaruwa naagayis.
4 Neeni iitatethan ufaytonna Xoosse;
iitabay neera deenna.
5 Otoranchoti ne sinthan eqokona;
iitabaa oothiya ubbaa ne ixaasa.
6 Wordo odeteyisata ne dhaysaasa;
Goday suuthu gusseysatanne
cimmeyisata ixees.
7 Shin ta ne gita maarotethan ne keethaa gelana;
ne geeshsha bessaako simmada nena bonchon goyinnana.
8 Abeeti Godaw, ta morketa gisho gada,
tana ne xillotethan kaaletha;
ne ogiya ta sinthan suurisa.
9 Enta mettershan tumi baawa;
enta wozanan dhaysoy kumis.
Enta doonay dooyetida duufo mela;
enti banta inxarsan cimmoosona.
10 Enti ne bolla makallida gisho,
abeeti Xoossaw, enta pirda;
Enta tobbay enta ekidi boo;
enta daro nagaraa gisho enta yedetha.
11 Shin neeko baqatidi attida ubbay ufayto;
enti merinaw ufaysan yexo.
Ne sunthaa dosiya ubbay nenan ufaytana mela;
neeni enta merinaw naaga.
12 Abeeti Godaw, neeni xillota anjaasa;
gondallen ashsheysada ne keehatethan iya ashsha.