7
Meto Wode Xillo Asa Woosa
Biniyaame kocha Kuuzaba Dawiti Godaas yexida mazmure.
1 Abeeti Godaw ta Xoossaw, ta nenan qosetayis;
tana yedethiya ubbaafe tana ashsha.
2 Neeni tana ashshonaba gidiyako,
enti tana gaammoda zaazana;
ashshiya asi bayna mentherethanashin.
3 Abeeti Godaw ta Xoossaw,
ta haysa melaba oothidaba gidiko,
taani ase naaqidaba gidiko,
4 ta laggetas lo77o gisho iitaa zaaridaba gidiko,
gaasoy bayna ta morkiya bonqidaba gidiko,
5 ta morkey tana yedethidi oyko;
tana sa7an yeggidi yedho;
tana baanan gondorsidi kawusho.
Salah
6 Abeeti Godaw, ne hanquwan dendada,
eexiya ta morketa hanquwa bolla eqa;
ta Xoossaw, ta gisho barka;
neeni xillo pirda koyaasa.
7 Asay ne yuushon shiiqo;
neeni entafe bollara haara.
8 Goday kawotethata bolla pirdees;
abeeti Godaw, ta xillotethaadanne
ta suuretethaada pirda.
9 Qofanne wozanaa shaakada eriya xillo Xoossaw,
iitata geella hanota neeni teqa;
shin xilluwa saron naaga.
10 Wozana suureta ashshiya,
Xoossay taw gondalle.
11 Xoossay xillo pirdeysa;
I ubba wode iitata bolla hanqetiya Xoossaa.
12 Iitati banta iitatethaafe simmonna ixiko,
Xoossay ba mashsha leefes;
ba dongiya giigisees.
13 I ba wodhiya ola miisheta giigisees;
laxiya ba donge toora pitees.
14 Iitati qoho qanthatidi,
gene wodexidi,
wordo yeloosona.
15 Hara asas olla bookida asi
ba bookida ollan baw kundees.
16 Iya geney iya huuphen simmees.
Iya geellatethay iya mees.
17 Iya xillotethaa gisho taani Godaa sabbana;
Ubbaafe Dhoqa Godaa sunthaas
taani galata mazmure yexana.