27
Xoossara De7iya Asa Xaalatethi
Dawita Mazmure
1 Goday taw poo7onne tana ashsheysa;
yaatin, ta oona yayiyanee?
Goday, ta de7oy naagetiya miixaa;
yaatin, ta ayis dagammanee?
2 Iita asati, tana ixeysatinne ta morketi
tana wodhanaw hordofiya wode,
bantaw dhubetidi kundana.
3 Morke toori tana teqiko
ta wozanay yayyenna.
Oli ta bolla dendiyakoka,
taani Godan ammanetayis.
4 Ta Godaa issiba oychas;
hessika, ta de7o laytha ubban
Godaa keethan de7anaasa;
Godaa lo77otetha be7anaasanne
iya keethan iya koyanaasa.
5 Meto gallas tana ba de7iya bessan genthana;
ba dunkaaniyan tana qosana;
tana dhoqa zaalla bolla essana.
6 He wode taani tana teqida
ta morketape aadhada,
dhoqu dhoqu gaana.
Taani iya dunkaaniyan
ufaytashe yarsho yarshana;
Godaa mazmuren galatana.
7 Abeeti Godaw,
ta nena xeegiya wode ne taw koya;
taw qadheta; tana si7a.
8 Neeni, “Ta som7uwa koyite” gadasa,
ta wozanay Abeeti Godaw,
“Ta ne som7uwa koyana” yaagis.
9 Ne som7uwa taape genthofa;
tana maaddeyso; ne shenetada
tana ne aylliya guye zaaropa.
Abeeti tana ashshiya Xoossaw,
tana yeggofa; aggofa.
10 Ta aawaynne ta aayiya tana aggikoka
Goday tana shiishidi ekana.
11 Abeeti Godaw, tana ne ogiya tamaarsa;
ta morketa gisho tana suure oge kaaletha.
12 Tana mandiya wordo markati
ta bolla wolqan dendida gisho,
tana ta morketa amuwas aathada immofa.
13 Taani de7on de7ashe,
Godaa keehatetha be7anaysa ammanayis.
14 Godan ufaysi ootha;
minna, yayyofa;
Godan ufaysi ootha.