68
Xoossay Ba Morketa Laallana
Zammaareta Halaqaas Yexetida Dawita Mazmure.
1 Xoossay dendo; iya morketi laaleto;
Iya ixeysati iya sinthafe baqato.
2 Cuyay carkora dendidi dhaysiya mela,
muqaadi taman til7eysada,
iitati Xoossaa sinthafe dhayo.
3 Shin xilloti hashshu go;
Xoossaa sinthan ufayto;
ufaysan ililo.
4 Xoossaas yexite; iya sunthaa sabbite;
shaaran beysas oge kessite;
iya sunthay Godaa; iya sinthan ufaytite.
5 Xoossay ba de7iya geeshsha bessan,
yi7otas aawa; am7etas daynna.
6 Xoossay bizzatas soo asi immees;
qasho keethan de7eyisata birshidi, duretethan wothees;
shin makallanchoti qaaqa biittan de7oosona.
7 Abeeti Xoossaw, neeni ne asaa kaalethida wode,
ne entara mela biitta kanthida wode,
Salaha
8 Siina Xoossaa yuussaninne,
Isra7eele Xoossaa qoncethan
biittay qaaxis; saloy ira immis.
9 Abeeti Xoossaw neeni ira darsada bukisadasa;
laddida biitta zaarada oorathaasa.
10 Ne asay yan duussu oykis;
abeeti Xoossaw, ne keehatethan manqotas
koshshiyaba giigisada immadasa.
11 Goday kiittis;
daro Maccasati he kiitaa markatidosona.
12 Kawotinne enta olanchoti
baqatidi guye simmidosona;
son attida maccasati di7o shaaketidosona.
13 Phooliya worqa qefera de7iya,
birape medhetida holle misile di77idi demmiya wode
hinte dorsa kelen ayis zin7ideti?
14 Ubbaa danda7iya Xoossay kawota laallida wode,
Xalmoona zumaa bolla shacha bukisis.
15 Baasane zumaw,
daro xeeri de7iya Baasane zumaw,
16 Daro xeerati de7iya zumato,
Xoossay doorida zumaa
hinte ayis qanaatidi xeelleetii?
Goday iyan merinaw daana.
17 Xoossaa ola para gaareti
tammu mukulu toho tammu mukulan taybetees;
Goday Siina zumaape ba geeshsha bessaa yis.
18 Di7etida darota ekidi, dhoqa keyis;
asaape, hari attoshin makallanchotape imo ekis;
Goday Xoossay yan daana.
19 Gallas gallas nu toohuwa tookiya Goday galatetto;
Xoossay nuna ashsheysa.
Salaha
20 Nu Xoossay nuna ashshiya Xoossaa gidennee?
Hayqope ashshiya Xoossay iya.
21 Xoossay tuma ba morketa huuphiya tinchana;
nagara ogen hemetiya asa,
binaanan kametida enta liiphiya menthana.
22 “Taani hinte morketa
Baasanepe zaarada ehana;
ta enta ciimmo abbafe kessada guye ehana.
23 Hessika, ne morketa suutha ne tohoy yedhana melanne
ne kanatika morke suuthaafe banta gishuwa laaccana melasa” yaagees Goday.
24 Abeeti Xoossaw, ne salpey,
ta Xoossay ta kawoy salpey,
Xoossa keethi geliya wode ubbaas bentees.
25 Yexeysati sinthana; diixeysati guyena;
qassi karaabo baqiya geela7oti giddona.
26 Hinte “Xoossa gita shiiqon galatite;
hinteno, Isra7eele asaw, Godaa galatite” yaagosona.
27 He salpiyan ubbaafe kaalo gidida
Biniyaame kochay koyro taybetoosona.
Kaallidi Yihuda halaqati banta cugan de7oosona;
wursethan Zabloona halaqatinne
Niftaaleme halaqati taybetoosona.
28 Abeeti Xoossaw, ne wolqaa qoncisa;
kase ne nuus oothidaysada,
ne minotetha bessa.
29 Hessa gisho, Yerusalaamen de7iya
ne keetha kawoti yidi,
new imota immana.
30 Do7ada maqa giddon de7iya Gibxe asata neeni seera;
boorunne mara wude daaniya kawotethata ne hanqeta.
Enti gulbatidi, banta bira new immana gakanaw,
neeni enta seera; oletanaw yeemotiya asata laalla.
31 Kiitetida halaqati Gibxefe yaana;
Tophey ba kushiya Xoossako miccana.
32 Hinteno, sa7aa kawotethato,
Xoossas yexite.
Salaha
33 Benipe de7iya salotape bollara beyisas;
ba wolqaama girsan ba guntha sisseysas yexite.
34 Xoossaa wolqaaba awaajite;
iya gitatethay Isra7eele bollana;
iya wolqayka salona.
35 Xoossay ba geeshsha asaa bolla malaalsees;
Isra7eele Xoossay ba asas
minotethinne wolqa immees.
Xoossay galatetto.