80
Xoossaw, Nuna Ooratha
Asaafi Zammaareta Halaqaas Xaafida Mazmure
“Ciishsha cuudhethi” geetetiya markatetha mazmure
1 Yoosefa dorsa wudeda kaaletheyso,
Isra7eele henthanchuwaw nuna si7a.
Kiruubeta bolla de7iya araatan uttidayso,
ne poo7uwan qonca.
2 Efreema, Biniyaamenne Minaase sinthan benta;
ne wolqaa qaathada nuna ashshanaw haaya.
3 Xoossaw nuna zaara;
nu attanaada ne som7uwa nuus poo7isa.
4 Ubbaafe Wolqaama Godaw Xoossaw,
ne asaa woosa bolla awude gakanaw shenetay?
5 Neeni enta yeeho kathada muzadasa;
afuthu haathada ushshadasa.
6 Nu shooroti nu biitta ekanaw
banta giddon oyaana mela oothadasa;
nu morketi nu bolla miicidosona.
7 Ubbaafe Wolqaama Xoossaw nuna zaara;
nu attanaada ne som7uwa nuus poo7isa.
8 Gibxefe woyne ehadasa;
kawotethata yedethada,
enta biittan iya tokadasa.
9 Neeni biitta qeexadasa;
I xapho yeddidi, daayidi biitta gakis.
10 Dereti iya kuyan,
Libaanose zigati iya tashiyan kametidosona.
11 Ba tasheta Medetiraane Abbaa gakanaw,
ba xeerata Efraxiisa shaafa gakanaw yeddis.
12 Yaatin, ogera aadhiya ubbay
iya ayfiya duuthanaada,
iya yuushon de7iya gimbiya ayis laalladii?
13 Bazzo gudunthoy iya bolla gupis;
wora do7ati iya midosona.
14 Ubbaafe Wolqaama Xoossaw nuuko simma;
salora duge xeellada; ha woyniya naaga.
15 I ne ushacha kushey tokida xapho;
neeni new dichida puute.
16 Ne morketi ne woyniya qanxidosona;
taman xuuggidosona;
enta ne hanquwan dhaysa.
17 Ne kushey ne ushachan de7iya asaa,
neeni new dichida asaa naago.
18 Hiza nuuni guye simmoko;
Nuna paxa wotha; ne sunthaa galatana.
19 Ubbaafe Wolqaama Godaw Xoossaw, nuna zaara;
nu attanaada ne som7uwa nuus poo7isa.