86
Xoossa Siiqoy Gita
Dawita Woosa
1 Godaw, taani manqonne metootancho gidiya gisho,
ta woosa si7ada tana alla.
2 Ta new dummatida asi gidiya gisho, tana de7on wotha;
nenan ammanetiya tana, ne aylliya ashsha;
neeni ta Xoossa.
3 Godaw, gallas kumethi ta neeko waassiya gisho,
taw qadheta.
4 Godaw, ta shempoy neeko waassiya gisho,
tana, ne aylliya ufaysa.
5 Godaw, neeni keehanne atto geysa;
nena xeegiya ubbaas ne siiqoy daro.
6 Abeeti Godaw, ta woosa si7a;
ta waasuwa hayza.
7 Ne ta woosaas zaaro immiya gisho,
ta metuwa gallasan ta neeko waassana.
8 Godaw, xoossata giddon ne meli baawa;
ne oosuwara giney baawa.
9 Godaw, neeni medhida kawotethati yidi,
ne sinthan gulbatana; ne sunthaa bonchana.
10 Neeni gita; ne malaalsiya ooso oothiya gisho
Xoossi ne xalaala.
11 Godaw, ta ne tuman hemetana mela,
tana ne ogiya tamaarsa.
Taani ne sunthaas yayyana mela,
taw issi wozanaa imma.
12 Godaw ta Xoossaw,
taani nena ta kumetha wozanan galatana;
ne sunthaa merinaw bonchana.
13 Ne siiqoy taw daro;
tana duufope ashshadasa.
14 Xoossaw, otoranchoti ta bolla dendidosona;
iita asata cugay tana wodhanaw koyees;
enti nena wuda gookona.
15 Shin abeeti Godaw,
neeni qadhetiyanne maariya Xoosse.
Neeni hanqetanaw gam7aasa;
siiqoynne ammanetethi daridaysa.
16 Taako simmada taw qadheta;
ne aylliyas wolqa imma;
ne gadhinde na7aa tana ashsha.
17 Godaw, ne keehatetha malaata tana bessa;
ne tana maaddeysanne minthetheysa be7iya wode,
ta morketi yeellatana.