94
Xoossay Ba Asaa Aggenna
1 Godaw, neeni halo keyiya Xoossi;
kushe zaariya Xoossaw, ne bonchuwa bessa.
2 Abeeti sa7aa pirdiya Xoossaw denda;
otoranchotas bessiya seera imma.
3 Godaw, awude gakanaw gam7ay?
Iitati awude gakanaw ufaytanee?
4 Iita ootheysati otoro qaala haasayoosona;
enti coo ceeqetoosona.
5 Godaw, enti ne asaa liiqisoosona;
enti ne laata naaqoosona.
6 Am7etanne betanchota wodhoosona;
aawi bayna nayta muucosona.
7 Enti, “Goday nuna be7enna;
Yayqooba Xoossay akeekenna” yaagosona.
8 Hinteno, asaa giddofe eeyato, akeekite!
hinteno, eeyato hinte cinca gidanay awudee?
9 Haythe oothida Xoossay si7ennee?
Ayfe medhida Goday be7ennee?
10 Kawotethata seeriya Xoossay seerennee?
Ase eratethi tamaarsiya i, erennee?
11 Goday asa qofi pathonnabaanne
hada gideysa erees.
12 Abeeti Godaw, neeni seeriya asinne
ne higgiya tamaarsiya asi anjetidaysa.
13 Iitati kundiya ollay booketana gakanaw,
meto gallas neeni iya shempisaasa.
14 Xoossay ba asaa yeggenna;
I ba laata aggenna.
15 Pirdi simmidi xillotetha bolla eqana;
wozanaa suureti ubbay xillo pirdaa kaallana.
16 Makallanchota bolla ta gisho dendey oonee?
Iita ootheysatara ta gisho eqetey oonee?
17 Goday tana maaddonnaako,
taani eeson duufo gelada attanashin.
18 Taani, “Ta tohoy hallixis” gida wode,
ne siiqoy tana katisis.
19 Ta wozanan un7etethi kumida wode,
neeni tana wopu oothada ufaysaasa.
20 Higge shaariya geella daynnatara
geella asara neeni hashetay?
21 Xillota wodhanaw enti tobboosona;
suureta bolla hayqo pirdoosona.
22 Gidoshin Goday ta miixaa;
ta Xoossay taani qosetada attiya zaalla.
23 Enta iitatethaa gisho I enta seerana;
enta nagaraa gisho I enta dhaysana;
Goday nu Xoossay enta dhaysana.