116
Hayqope Attida Asa Galata
1 Goday ta waasuwanne ta woosa si7ida gisho,
taani iya dosayis.
2 I ba haytha taako zaarida gisho,
ta de7o laytha ubban iya xeegana.
3 Hayqoy xiheda tana teqis;
duufo hirgay tana oykis;
un7inne metoy tana qachis.
4 He wode, “Abeeti Godaw, tana ashsha”
yaagada Godaa suntha xeegas.
5 Goday keehanne xillo;
nu Xoossay qadhetees.
6 Goday ashketa naagees;
ta metootida wode tana ashshis.
7 Goday new keeha gidiya gisho,
hiza ta shempe, wopu ga.
8 Goday ta shempuwa hayqope,
ta ayfiya afuthafe,
ta tohuwa dhubepe ashshis.
9 Taani de7on de7eyisata giddon,
Godaa sinthan hemetayis.
10 Taani, “Daro waayetas” gida wode,
ta ammanuwa aggabike.
11 Taw sa7i haddirida wode,
“Asi ubbay wordancho” yaagas.
12 I taw keehida keehatetha gisho
Godaas ay qanxanaw danda7iyana?
13 Goday tana ashshida gisho galatana,
xuu7a woyne ushsha yarsho oothada shiishana.
14 Iya asaa ubbaa sinthan
ta qangetha Godaas gathana.
15 Geeshshata hayqoy
Godaa sinthan, daro al7o.
16 Abeeti Godaw, taani ne aylle;
taani ne aylle, ne gadhinde na7aa;
tana qashope ne birshadasa.
17 Godaw, ta galata yarsho new yarshana;
ne sunthaa xeegana.
18 Asa ubbaa sinthan
ta qangetha Godaas gathana.
19 Yerusalaamen de7iya Xoossa keethaa dabaaban,
ta qangetha gathana.
Godaa galatite.