119
Ne Higgey Ta Tohuwas Poo7o
Aleef
1 Banta ogiyan borey baynaysatinne
Godaa wogaada hemeteysati anjetidaysata.
2 Iya kiitaa naageysatinne
banta kumetha wozanan
iya koyeysati anjetidaysata.
3 Enti bala oothidi erokona;
Godaa ogiyan hemetoosona.
4 Ne kiita ammanetidi naagana mela,
neeni nuna kiittadasa.
5 Ne wogaa naagada
ta ogey minnana mela koyayis.
6 Ne kiita ubbaa akeekada,
ta polo yeellatike.
7 Ne xillo pirdaa ta tamaarida wode,
ta nena suure wozanan galatana.
8 Ta ne higgiya naagana;
tana polo yeggofa.
Beet
9 Yalagay ba ogiya waatidi,
geeshshatethan naaganaw danda7ii?
Ne qaala kiitetiko danda7ees.
10 Ta kumetha wozanan nena koyas;
ne kiitaape kare keyonnaada tana naaga.
11 Taani ne bolla nagara oothonna mela
ne qaala ta wozanan qosas.
12 Abeeti Godaw, ne galateta;
ne awaajuwa tana tamaarsa.
13 Ne doonape keyiya pirda ubbaa
taani ta inxarsan odana.
14 Duretethan ufayteysafe aathada,
ta ne higgiyan ufaytayis.
15 Ne wogata zaara zaarada qopayis
ne ogiya loythada akeekayis.
16 Taani ne higgiyan ufaytayis;
ne qaala dogike.
Gaamel
17 Taani de7on daana melanne ne qaala kiitetana mela
taw ne aylliyas lo77oba ootha.
18 Ne higgiyan de7iya malaalsiya tumatethaa
ta be7ana mela ta ayfiya dooya.
19 Taani ha sa7an imathe;
ne kiita taape genthofa.
20 Ta shempiya ubba wode
ne pirdaa laamotashe hayqasu.
21 Otoreyisata, baadetidaysatanne,
ne kiitaape kare keyeyisata ne seerasa.
22 Taani neeni odidaysa oothida gisho,
enta cashshaanne boriya ta bollafe digga.
23 Hari attoshin halaqati shiiqidi,
ta bolla maqetikoka,
taani, ne oosanchoy,
ne awaajuwa zaara zaarada qopana.
24 Ne markatethay tana ufaysees;
I tana zorees.
Daalet
25 Taani hayqana hanayis;
ne gida qaalada tana ashsha.
26 Taani ta ogiyaba new odin,
ne tana si7adasa;
hiza ne awaajuwa tana tamaarsa.
27 Ne wogaa tana akeekisa;
malaalsiya oosuwa
taani zaara zaarada qopana.
28 Azzanoy darida gisho ta shempoy daaburis;
neeni gida qaalada tana minthetha.
29 Wordo oge taape haassa;
ne keehatethan ne higgiya tana tamaarsa.
30 Taani tuma oge dooras;
ne pirdaa hayzas.
31 Abeeti Godaw, ta ne higgiya minthada oykas;
hiza tana yeellayopa!
32 Ta wozanaa la77a kessida gisho,
taani ne higgiya ogiyan woxayis.
He
33 Abeeti Godaw,
ne awaajuwa birshethaa tana tamaarsa;
taani wursethi gakanaw iya naagana.
34 Taani ne higgiya naagana malanne
ta kumetha wozanaape iyaw kittaatan mela,
ne taw akeeka imma.
35 Taani iyan ufaytiya gisho,
ne kiita ogiyan tana kaaletha;
36 Ta wozanaa amuwako gidonashin,
ne higgiyako tana zaara.
37 Pathonnaba xeellonna mela,
ta ayfeta teqa;
ne ogiyan ta de7uwa ooraxisa.
38 New yayyana mela,
ne gelida qaala, taw ne aylliyas, pola.
39 Tana yashshiya cashsha taape digga;
ne pirday ay mela lo77o!
40 Taani ne wogaa naaganaw amottayis;
neeni xillo gidiya gisho,
ta de7uwa ooraxisa.
Waw
41 Abeeti Godaw, ne siiquwa tana bessa;
neeni gelida qaalada tana ashsha.
42 Taani ne qaalan ammanetiya gisho,
tana cayeyisata zaaranaw danda7ayis.
43 Taani ne pirda ufaysi oothida gisho,
ta inxarsaafe tumatethaa qaala dhaysofa.
44 Taani merii merinaw
ne higgiya kiitetana.
45 Taani ne woga poliya gisho,
aahon hemetana.
46 Taani kawota sinthan eqada,
neeni gidaba odashe yeellatike.
47 Taani ne kiitata dosayis,
entan ufaytayis.
48 Taani dosiya ne kiita bonchayis;
ne awaajuwa zaara zaarada qopana.
Zaw
49 Neeni taw, ne aylliyas,
immida qaala qopa;
ne qaalan taani ufaysi oothayis.
50 Ne qaalay tana de7on wothees;
I meto wode tana minthethees.
51 Otoranchoti tana likefe aathidi cayoosona;
shin taani ne higgiyafe sher7i giike.
52 Abeeti Godaw,
benipe de7iya ne pirda taani hassayayis;
hessan taani minettayis.
53 Iitati ne higgiya kiitetonaysa be7in,
tana yiloy wodhis.
54 Taani de7iya allaga biittan
ne awaajoy taw yethi gidis.
55 Abeeti Godaw,
taani qamma ne suntha qopayis;
ne higgiya naagayis.
56 Ta Ne woga naagana;
I taw ooso gidis.
Heet
57 Abeeti Godaw, ta saamay nena;
ta ne higgiya naaganaw qanxas.
58 Ta kumetha wozanan nena woossayis;
ne gelida qaalada taw qadheta.
59 Taani ta ogiya akeeka xeellada,
ne higgiya kaallanaw simmas.
60 Taani ne kiita naaganaw,
eesotanaape attishin, gam7ike.
61 Iitati taw xihe yeggikoka,
taani ne higgiya dogike.
62 Ne xillo pirda gisho, nena galatanaw,
taani gidi bilahe dendayis.
63 Taani new yayyeyisata ubbaasinne
ne wogaa naageysata dabbo.
64 Abeeti Godaw, sa7i ne siiquwan kumis;
ne awaajuwa tana tamaarsa.
Xeet
65 Abeeti Godaw, ne gelida qaalada
taw ne aylliyas keehaba oothadasa.
66 Taani ne kiitatan ammanetiya gisho,
lo77o pirdanne eratethi tana tamaarsa.
67 Taani seeretanaape kase kare hemetas;
shin ha77i ne qaalas kiitetayis.
68 Neeni keeha; neeni keehaba oothaasa;
ne awaajuwa tana tamaarsa.
69 Otoranchoti ta sunthaa wordon iissoosona;
shin ta ne wogaa ta kumetha wozanan naagana.
70 Enta wozanay kumthi doccis;
shin taani ne higgiyan ufaytayis.
71 Ne higgiya tamaarana mela
ne tana seeridaysi taw lo77o gidis.
72 Daro worqafenne birape,
ne doonape keyiya higgey taw aadhees.
Yood
73 Tana ne kushey medhis; ne kushey giigisis;
ne kiita tamaarana mela taw akeeka imma.
74 Taani ne qaalan ufaysi oothida gisho,
nena boncheysati tana be7idi ufayto.
75 Abeeti Godaw, ne pirday xillo gideysa eras;
ne tana seeriday ammanetethan gideysa ta akeekas.
76 Taw ne aylliyas gida qaalada,
ne siiqoy tana minthetho.
77 Ne higgey tana ufaysiya gisho,
taani de7on daana mela taw qadheta.
78 Otoranchoti tana wordon mootiya gisho yeellato;
taani ne wogaa zaara zaarada qopayis.
79 New yayyeysatinne
ne markatethaa ereysati taako yo.
80 Ta yeellatonna mela,
ta wozanay ne higgiyan borey baynaysa gido.
Kaaf
81 Neeni tana ashshana mela,
taani naagashe daaburas;
taani ne qaalan ufaysi oothayis.
82 Neeni gida qaalay poletin
be7anaw naagishin ta ayfey teljumis.
“Ne tana awude minthethane” yaagas.
83 Cuyan kaqetida ogoroda gundas;
gidoshin ne awaajuwa balabiike.
84 Taani ne aylley awude gakanaw naago?
Tana yedetheyisata ne awude pirdanee?
85 Ne higgiya naagonna otoranchoti
tana oykanaw olla bookosona.
86 Ne kiita ubbay ammantheyisata;
gaasoy bayna asay tana yedethiya gisho
tana maadda.
87 Enti tana wodhi diggidi aggidosona;
shin ta ne wogaa aggabike.
88 Ne siiquwan ta de7uwa naaga;
ta ne kiitaa naagana.
Laamed
89 Abeeti Godaw, ne qaalay merinaasa;
I salon minnidi de7ees.
90 Yeletape yeletaa gakanaw ne ammanetaasa;
ne ha sa7aa minthada essadasa; ika minnidi de7ees.
91 Ubbay ne aylle gidiya gisho,
hachi gakanaw ubbay ne kiittada minnidi de7ees;
92 Ne higgey tana ufaysonnaba gidiyako,
ta waayan ta dhayanashin.
93 Taani ne wogaa kumethi dogike;
neeni iyan tana de7on wothadasa.
94 Taani nebaa gidiya gisho tana ashsha;
taani ne wogaa naaganaw koyayis.
95 Iitati tana dhaysanaw zugidi naagoosona;
shin taani neena qopayis.
96 Polo geetetidaba ubbaas zawi de7eysa ta be7as;
shin polo gidida higgiyas zawi baawa.
Meem
97 Taani ne higgiya waanada dosiyana!
kumetha gallas taani iya qopayis.
98 Ne kiitay ubba wode taara de7iya gisho,
ta morketape aathidi tana akeeka kessoosona.
99 Taani nee higgiya qopiya gisho,
ta astamaaretape aadhida cincatethi taw de7ees.
100 Taani ne wogaa kiitetiya gisho,
cimatape aathada akeekayis.
101 Taani ne qaala kiitetanaw koyiya gisho,
ta tohuwa iita oge ubbaafe naagas.
102 Neeni tana tamaarsida gisho,
ta ne higgiyafe gaxa keyike.
103 Ne qaalay waanidi mal7i!
ililo eessafe aadhidi mal7ees.
104 Ne wogaape akeeka demmas;
hessa gisho, geella oge ubbaa ixas.
Non
105 Ne qaalay ta tohuwas xompe,
ta ogiyas poo7o.
106 Ne xillo pirdada daanaw,
ta caaqida caaquwa minthana.
107 Abeeti Godaw, ta waayey daro;
ne ufaysa qaalada tana de7on wotha.
108 Abeeti Godaw,
ta galataa yarshuwa eka;
tana ne pirdaa tamaarsa.
109 Ta shempoy ubba wode meton de7ees;
shin taani ne higgiya dogike.
110 Iitati taw gite yeggidosona;
shin taani ne wogaape kare keyabike.
111 Ne higgey taw merinaa shalo;
I ta wozanaas ufaysi immees.
112 Ta hayqana gakanaw
ne awaajuwada oothanaw qofa qachas.
Samket
113 Taani nam7u qofi de7iya asaa ixayis;
shin ne higgiya dosayis.
114 Ne taw gondallenne qosetada attiya besse
taani ne qaalan ufaysi oothayis.
115 Taani ta Xoossaa kiita naagana mela,
hinteno, iita oothiya ubbay taape haakite.
116 Taani de7on daana mela
ne ufaysa qaalada tana minthetha;
ta ufaysaa dhumisopa.
117 Ta saro daana mela tana zempisa;
ta ubba wode ne awaajuwa si7ana.
118 Ne awaajuwafe haakeyisata ne koyaka;
enta cimoy hada.
119 Iitata ubbaa ne pitoda taybaasa;
hessa gisho, taani ne kiitaa dosayis.
120 Ta asatethay yashshan new kokorees;
ta ne higgiya daro yayyayis.
Ee
121 Ta suurenne xillo oothas;
tana ta morketas aathada immofa.
122 Tana ne aylliya maaddanaw caaqa;
tana otoranchoti un7ethana mela oothofa.
123 Ne tana ashshana gada ta xeellishin,
ne xillo qaala ta naagishin,
ta ayfey teljumis.
124 Taw ne aylliyas, ne siiquwada ootha;
ne higgiya tana tamaarsa.
125 Tana ne aylliya ne siiquwa bessa;
ne wogaa erana mela taw akeeka imma.
126 Abeeti Godaw, asay ne higgiya menthida gisho,
ne pirdana wodey ha77i gakis.
127 Taani ne kiita worqafe aathada dosay;
ee, walahi bayna worqafe aathada dosayis.
128 Hessa gisho, ta ne wogata ubbaa kaallayis;
geella oge ubbaa ixas.
Pe
129 Ne woga ubbay malaalsiyaba;
hessa gisho, ta iya kiitetayis.
130 Ne qaala birshethay poo7o immees;
cincatethi pacidaysatas akeeka immees.
131 Taani ne kiitaa saamotada,
ta doona dooyas.
132 Haa taako simma;
nena doseysatas ne ootheysada taw qadheta.
133 Ne ufaysa qaalada ta hemethaa suurisa;
nagari tana haarana mela oothofa.
134 Ta ne wogaa kiitetana mela
tana un7etheyisata kushepe woza.
135 Ne aylliya ta bolla ne som7uwa poo7isa;
ne higgiya tamaarsa.
136 Asay ne higgiya menthida gisho,
ta afuthay haathada goggees.
Xaade
137 Abeeti Godaw, ne xillo;
ne pirday suure.
138 Ne higgey xillo;
ay wodeka ammanetees.
139 Ta morketi ne qaala toochida gisho,
ta mishay tamada eexidi keyis.
140 Ne ufaysa qaalay daro ammanetees;
ta ne aylley daro dosayis.
141 Taani pathonnanne kadhetida asi;
gidoshin ta ne wogaa dogike.
142 Ne xillotethay merinaw de7ees;
ne higgey tuma.
143 Metoynne un7i tana gakis;
shin ne kiitati tana ufaysoosona.
144 Ne wogay merinaw xillo;
ta de7on daana mela taw akeeka imma.
Qoof
145 Abeeti Godaw, ta kumetha wozanaape
neeko waassas; tana alla;
Ta ne awaajuwa naagana.
146 Ta neeko waassas; tana ashsha;
ta ne higgiya naagana.
147 Xalqey caaronna wonta dendada,
tana maadda gada neeko waassayis;
ne gelida qaalan ufaysi wothayis.
148 Ne qaalaba zaara zaara qopanaw,
qamma utta aqayis.
149 Abeeti Godaw, ne siiquwa gisho, tana si7a;
ne xillo pirdada tana de7on wotha.
150 Tana yedethiya iitati tako matoosona;
shin enti ne higgiyafe haakoosona.
151 Shin abeeti Godaw, ne taw matan de7aasa;
ne kiita ubbay tuma.
152 Taani benipe doomada, ne higgiya tamaaras;
ne iya merinaw minthada essadasa.
Rees
153 Ta ne higgiya dogonna gisho,
ta metuwa be7ada tana ashsha;
154 Ta gisho mootetada tana woza;
ne ufaysa qaalada tana de7on wotha.
155 Ne higgiya enti ekonna gisho,
iitati atotethi demmokona.
156 Abeeti Godaw, ne qadhey daro;
ne xillo pirdada tana de7on wotha.
157 Tana ixeysatinne yedetheysati daro;
shin ta ne higgiyafe gaxa keyike.
158 Enti ne kiita naagonna gisho,
ta nena kaddeyisata be7ada shaatettas.
159 Abeeti Godaw, ta ne wogaa doseysa be7a;
ne siiquwada tana de7on wotha.
160 Ne qaalay tuma;
ne xillo pirday merinaw de7ees.
Saan
161 Halaqati tana coo yedethoosona;
shin ta wozanay ne qaala yayyees.
162 Darobaa di77ida asi ufayteysada,
ne ufaysa qaalan ta ufaytayis.
163 Taani wordo ixayis; shaatettayis;
shin ne higgiya dosayis.
164 Ne xillo pirdaa gisho,
ta nena gallas laapun toho galatayis.
165 Ne higgiya doseysatas polo sarotethi de7ees;
enta aybika dhubethanaw danda7enna.
166 Abeeti Godaw, ta ne atotetha ufaysan naagayis;
ne kiita kaallayis.
167 Taani ne higgiya naagayis;
ta kumetha wozanaape dosayis.
168 Ta oge ubbaa ne be7iya gisho,
taani ne higgiyanne ne wogaa naagana;
Taw
169 Abeeti Godaw, ta waasoy ne sinthe gako;
ne ufaysa qaalada taw akeeka imma.
170 Ta woosay ne sinthe gako;
ne ufaysa qaalada tana ashsha.
171 Neeni ne awaajuwa tana tamaarsiya gisho,
ta doonape galati pultana.
172 Ne kiita ubbay xillo gidiya gisho,
ta inxarsay ne qaalaba yexana.
173 Taani ne wogaa doorida gisho,
ne kushey tana maaddanaw giigidaysa gido.
174 Abeeti Godaw, ne ashshana mela ta laamotayis;
ne higgey tana ufaysees.
175 Taani nena galatana mela,
tana de7on wotha;
ne pirday tana maaddo.
176 Taani dhayida dorsada toylatas;
tana ne aylliya koya;
ta ne kiita dogike.