139
Ta Wozana Pilgada Be7a
Dawita Mazmure
1 Godaw, neeni tana pilgada eradasa.
2 Neeni ta utethaanne ta equwa eraasa;
ta qofa ubbaa haahon akeekasa.
3 Taani biya bessaanne shempiya bessaa xomoosasa;
ta ogeta ubbaa eraasa.
4 Godaw, taani ta inxarsan
issi qaala odetanaape sinthe,
ta qofa ubbaa eraasa.
5 Neeni ta yuushuwan de7aasa;
ne kushiya ta bolla wothaasa.
6 Ne eratethay tana daro malaalsees;
ta akeekape dhoqa.
7 Ta ne Ayyaanape aw baqatanee?
ne sinthafe aw baanee?
8 Pude salo keyiko ne yan de7aasa!
Duge Si7oole wodhikoka ne yan de7aasa.
9 Doloha bagga paallada biiko,
woyko wuloha baggan haakada de7iko,
10 yan ne kushey tana kaalethees;
ne ushacha kushey tana zempisees.
11 “Dhumaw tana gentha;
gallasaw qamma laameta” yaagiyakoka,
12 sakana dhumi new dhumenna;
qammi gallasada poo7ees;
new dhumi poo7o mela.
13 Neeni ta giddo asatethaa medhadasa;
ta aaye ulon tana neeni tiladasa.
14 Neeni tana malaalsiyabanne
yegelsi oothada medhida gisho,
taani nena galatayis.
Ne oosoti malaalsees!
taani hessa loythada erayis.
15 Taani geema bessan medhetiya wode,
ta meqethay neepe geemmibeenna.
Ta asatethay ta aaye ulon ciimmo giddon
hiillan alleeqetidi oosetiya wode,
16 ne ayfeti giigonna ta asatethaa be7idosona.
Buroo issoyka doometonna de7ishin,
ne taw buzoyida gallasa ubbay
ne mazgaben xaafetidosona.
17 Xoossaw, ne taw qopiya qofay
waanida boncho!
Enta tayboy waanidi daride!
18 Taani enta taybiyako shafepe daro;
taani barkiya wode ha77ika neera de7as.
19 Xoossaw, neeni iitata wodhiyako aybe!
Suuthu gussiya asati taape haako!
20 Enti ne bolla iitabaa haasayoosona;
ne morketi ne suntha iissoosona.
21 Godaw, nena ixeyisata ta ixikina?
Ne bolla dendeyisata ta shaatetikina?
22 Taani enta kumethi ixayis;
enta taani ta morkeda taybayis.
23 Xoossaw, tana pilgada ta wozanaa era;
tana un7ethida ta qofaa be7a.
24 Tanan iitabay de7iko xeella;
merina ogiyan tana kaaletha.