144
Xoossay Taw Miixa
Dawita Mazmure
1 Goday, ta zaallay, galatetto!
Ta kushiya ola tamaarsees;
ta biradheta tooras giigisees.
2 I ta siiqo Xoossaanne ta qosetta attiya besse;
ta miixanne tana ashsheysa.
Ta gondallenne taani baqatada attiya besse;
I kawotethati taw haaretana mela oothis.
3 Godaw, neeni iyaw qopanaw asi aybee?
Ne wozanan iyaw besse immanaw asa na7i aybee?
4 Asi issi toho carkiya carko mela;
iya gallasati aadhiya kuya mela.
5 Godaw, saluwa phalqada duge wodha!
dereta bocha; enti cuyo!
6 Wol7anthi yeddada ne morketa laalla;
ne dongiya yiishshan dukada enta yedetha.
7 Bollara ne kushiya yeddada,
tana wolqaama haathaafe goochada kessa;
allaga asata kushepe tana wosisa.
8 Enti tuma haasayidi erokona;
banta ushacha kushiya denthidi
wordon caaqoosona.
9 Xoossaw taani new ooratha mazmure yexana;
tammu shayan waaxetida diithan yexana.
10 Kawotas xoono immaasa;
ne aylliya Dawita ashshaasa.
11 Tana iita mashshafe ashsha;
allaga asata kushepe tana wosisa.
Enta doonay wordon,
enta ushacha kushey cimon kumis.
12 Nu adde nayti banta na7atethan,
lo77o dicciya mitha mela gido.
Nu macca nayti kawo gadho alleeqisanaw,
oosetida tuuqe mela gido.
13 Nu shaaleti dumma dumma katha qommon kumo;
heemetiya bessan de7iya nu dorsati
mukulaninne tammu mukulan yelo.
14 Nu miizati birayso;
awucayona yeletidi daro;
nu ogetan waasoy si7etofo.
15 Ha anjoti gakiya asati tuma anjetidaysata;
Xoossay entaw Godaa gidida asati anjetidaysata.