15
1 Nuuni ammanon minnidaysati daaburanchota toohuwa tookanaw bessees. Nuuni nuna ufaysanaw bessenna. 2 Nuuni nu ishaa ammanon minthanaw iya maaddanawunne ufaysanaw bessees. 3 Kiristoosi bana ufaysibeenna. Shin Geeshsha Maxaafan, “Asay nena cayida cashshay tana gakis”Maz 69:9. geetetidi xaafetidaysada hanis. 4 Geeshsha Maxaafay immiya gencaninne minthethuwan nu ufaysaa ekana mela Geeshsha Maxaafan xaafetida ubbay nuna tamaarsanaw xaafetis.
5 Gencanne minotethi immiya Goday hinte Kiristoos Yesuusa kaalliya wode issifetethi hintew immo. 6 Hessika, nu Godaa Yesuus Kiristoosa Aawa, Xoossaa, issi wozananinne issi qaalan hinte bonchana melasa.
Wongeli Asa Ubbaasa
7 Kiristoosi hintena ekidaysada Xoossaa bonchoos issoy issuwa ekite. 8 Xoossay beni aawatas immida ufaysay poletana melanne iya tumatethay eretana mela Kiristoosi Ayhudeta aylle gididi yidaysa ta hintew odayis. 9 Kiristoosi Ayhudeta aylle gidida hara gaasoy qassi Ayhude gidonna asati Xoossaa iya maarotethaa gisho galatana melasa. Geeshsha Maxaafan,
“Ta nena Ayhude gidonna asaa giddon galatana;
ne sunthaa sabbana”2 Same 22:50; Maz 18:49.
geetetidi xaafetidaysada hanis.
10 Qassi,
“Ayhude gidonna asato,
Xoossaa deriyara ufaytite”Zaare 32:43.
yaagetis.
11 Qassi zaaridi,
“Ayhude gidonna asato,
Godaa galatite;
kawotetha ubbay iya sabbite”Maz 117:1.
yaagetis.
12 Hessada Isayaasi,
“Isseye kochaafe yeletiya issoy yaana;
I kawotetha ubbaa haarana.
Enti banta ufaysaa iya bolla wothana”Isa 11:10.
yaagees.
13 Geeshsha Ayyaana wolqan hinte diccana mela ufaysi immiya Xoossay, hinte ammanuwa gaason hintew ufaysinne sarotethi kumethi immo.
Phawuloosi Kiita Xaafida Gaaso
14 Ta ishato, hintenan lo77otethinne eratethi kumidaysa qassi issoy issuwa zoranaw danda7eysa ta geeshshada erayis. 15 Taani hintena issi issiba guja akeekisanaw koyada yayyonna ha dabdaabiya hintew xaafas. 16 Taani Kiristoos Yesuusa aylle gidada, Ayhude gidonna asaas kahineda oothada, Wongela odana mela Xoossay taw aadho keehatetha immis. Ayhude gidonna asay Geeshsha Ayyaanan geeyidi, Xoossaa ufaysiya yarsho gidana mela Xoossay hessa oothis.
17 Taani Kiristoos Yesuusan gidada Xoossaas oothiya oosuwan ceeqetayis. 18 Ayhude gidonna asay Xoossaas kiitetanaada, Kiristoosi ta qaalanne ta oosuwa baggara oothida oosuwape attishin, hari ta ceeqetiyabay baawa. 19 Xoossay hessa malaataninne Geeshsha Ayyaana wolqan waati oothidaako ta hintew odana. Taani Yerusalaamepe doomada, Iliwarqoone gakanaw Kiristoosa Wongela sabbakas. 20 Taani hara asi baasida bessan keexanaw koyke. Kiristoosa sunthay xeegetiboona bessan Wongela odanaw amottayis. 21 Geeshsha Maxaafan,
“Iyabay odetiboonna asati iya be7ana;
iyabaa si7iboona asati akeekana”Isa 52:15.
geetetidi xaafetis.
22 Hessa gaason, taani hinteko yaanaw danda7abike.Roome 1:13. 23 Shin taani ha77i ha heeran ta oosuwa ongida gishonne daro laythafe doomada hintena be7anaw laamotida gisho, 24 taani Ispeene bashe hintena be7anaw qopas. Qassi guutha wode hintera ufaytidaape guye, Ispeene biya wode hinte ta ogiyas tana maaddana mela koyayis.
25 Shin ha77i taani Xoossaa asata maaddanaw Yerusalaame bayis. 26 Maqedoonenne Akayan de7iya Xoossa asati, Yerusalaamen de7iya manqota miishen maaddanaw koyida gishosa. 27 Enti manqota maaddanaysi entaw attonnaba gidida gisho banta huuphen hessa oothanaw qofa qachidosona. Ayhudeti Ayhude gidonaysatara ayyaana anjuwa shaaketiko, enti qassi bantaw de7iyaban Ayhudeta maaddanaw bessees.2 Qoro 9:11. 28 Hessa gisho, taani he shiiqida miishiya entaw immidaape guye, Ispeene bashe hinte matara aadhana. 29 Taani hinteko biya wode Kiristoosa anjuwan kumada baanaysa erayis.
30 Ta ishato, taw Xoossaa woossishe ta baaxiyan taara eqana mela Godaa Yesuus Kiristoosaninne Geeshsha Ayyaana siiquwan hintena woossayis. 31 Xoossay tana Yihudan de7iya ammanonna asatape ashshanaadanne Yerusalaamen ta oothana oosoy Xoossaa asata matan eketana mela taw woossite. 32 Qassi Xoossay giiko, taani hinteko bada ufaysan hintera shempana mela taw woossite. 33 Sarotethaa Xoossay hinte ubbaara gido. Amin7i.