1 Shin neeni suure timirtiya phalqonna timirte tamaarsanaw bessees. 2 Cima addeti bantana haareyisata, wopu gidaysata, bonchetidaysata, ammanon, siiqoninne danda7an, mino gidana mela zora. 3 Hessadaka, cima maccasay banta duussan geeshshata, zigironnayisata, woyne ushshan haaretonnaysatanne lo77oba tamaarseyisata gidana mela tamaarsa. 4 Enti hessada haniko yalaga maccasay banta azinatanne banta nayta siiqana mela tamaarsanaw danda7oosona. 5 Xoossaa qaalay boretonna mela bantana haareyisata, geeshshata, banta son ootheyisata, keehatanne banta azinatas kiiteteyisata gidana mela yalaga maccasa tamaarsonna.

6 Hessadaka, dondza addeti bantana haarana mela zora. 7 Neeni ne huuphen lo77o ooso ubban entaw leemiso gida. Neeni ne timirtiyan eqidaysanne ammanetidaysa gida. 8 Nu morketi nuna zigiranaw gaasoyabay entaw dhayin enti yeellatana mela neeni boretonna lo77o oda odeeta.

9 Aylleti ubbaban banta godatas kiitetana mela enta ufaysana melanne entara palamonna mela zora. 10 Enti banta godatape kaysotopo. Hessika, nuna ashshiya Xoossaa timirtey, ubba ogen dosetidaysa gidana mela banta oothiya oosuwan ammaneteyisata gideysa bessaana mela enta zora.

11 Ase ashshiya Xoossa aadho keehatethay asa ubbaas qoncis. 12 He aadho keehatethay, nu nagaranne ha alamiya amuwa aggidi, ha wodiyan nuna haaridi, tuma ayyaana de7uwaninne xillotethan daana mela nuna tamaarsees. 13 Nuuni anjetida ufaysaa gidida gita Xoossaanne nuna ashshiya Yesuus Kiristoosa boncho qoncethaa naagoos. 14 Iita ooso ubbaafe nuna wozanawunne lo77oba oothanaw amotiya ba geeshsha asi kessanaw nu gisho bana aathidi immis.Maz 130:8; Kessa 19:5; Zaare 4:20; 7:6; 14:2; 1 Phex 2:9.

15 Neeni haysa tamaarsa; kumetha maatan zora, seera; oonika nena kadhopo.