8
Yesuusi nu kahine halaqaa
1 Nuuni haasayiya gitabay hessa. Saluwan Ubbaafe Bolla Xoossaa araatappe ushachcha baggan uttida hayssa mela kahine halaqay nuus de7ees.Maz 110:1 2 I asan gidonnashin, Godan eqqida tuma dunkkaaniyan Xoossa Keethan oothees.
3 Kahine halaqa ubbay imonne yarshsho yarshshanaw shuumettees. Hessa gisho, ha kahiney yarshshanaw issibay daanaw koshshees. 4 Higgey kiiteyssada yarshshiya kahineti de7iya gisho, Kiristtoosi sa7an de7iyabaa gidiyakko kahine gidenna. 5 Entti kahinetethan oothiya dunkkaaney salon de7eyssas leemisonne kuya. Musey dunkkaaniya essiya wode Xoossay iyaakko, “Taani nena deriya bolla bessida leemisuwa kaallada ootha” yaagis.Kessa 25:40 6 Shin Yesuusi giddo gididi sigethiya caaqoy, koyro caaquwappe aadhdheyssada I ekkida oosoy enttayssafe aadhdhees. Hessi eqqiday aadhdhiya caaqo qaalana.
7 Koyro caaquwan bali baynaba gidiyakko nam77antho caaqo koshshenna. 8 Shin Goday entta boridi, hayssada yaagis:
“Taani Isra7eele asaaranne Yihuda asaara
ooratha caaqo caaqqiya wodey yaana.Er 31:31-34
9 He caaqoy ta entta aawata Gibxe biittaafe kushiya oykkada,
goochcha kessida wode enttara caaqqida caaquwa mela gidenna.
Entti ta caaquwan ammanettiboonna gisho,
taani entta yegga aggas yaagees Goday.
10 Shin hizappe guye Isra7eele asaara
ta caaqqana caaqoy hayssa yaagees Goday.
Taani ta higgiya entta guugiyan wothana;
entta wozanan xaafana.
Taani entta Xoossaa gidana;
enttika ta ase gidana.
11 Enttafe oonikka ba shooruwa woykko ba ishaa,
‘Godaa era’ yaagidi tamaarssenna.
Entti guuthafe gita gakkanaw
ubbay tana erana.
12 Taani entta naaquwa atto gaana;
entta nagaraa zaara qoppike” yaagees.
13 Xoossay ha caaquwa “Oorathi” gidi xeegishe koyroyssa gal77isis. Hiza, gal77aynne ceegay dhayiya wodey gakkis.