1 शाउल जो अब तक प्रभु का चेलाहोन खे धमकानो अरु घात करण की धुन मे थो, महायाजक का पास गयो. 2 अरु ओकासे दमीश्क का आराधनालयहोन का नाम पर या अभिप्राय की चिटिहोन मागी कि, का अदमी, का बय, जेने उ या पथ पर पाये उनका बाधीखे यरुशलेम ली आया.

3 पन चलता चलता जब उ दमीश्क का पास पहुच्या, ते एक-एक बद्दल से ओका चारो तरफ ज्योति चमकी. 4 अरु उ जमीन पर गिरी पड्यो अरु यो अवाज सुनी, हे शाउल, हे शाउल, तु मेखे क्यु सतास हइ?

5 “ओने पूछ्यो,” हे प्रभु तू कोन हइ?

ओने बोल्यो, “मी यीशु हइ,” जेखे तू सतास हइ. 6 “पन अब उठीखे नगर मे जा, अरु जो तोखे करणो हइ उ तरा से बोल्‍या जाये.”

7 जो इन्सान ओका साथ थो, वे अवाक्य र्‍हि गयो क्युकि बोल ते सुनता था पन कोय, देखतो नी थो. 8 तब शाउल जमीन पर से उठौ, पन जब आखहोन खोल्या ते ओखे कुछ दिखइ नी दियो, अरु वे ओका हाथ पकडी खे दमीश्क मे लि गया. 9 उ तीन दिन तक देखी नी सक्यो, अरु नी खायो अरु नी पीयो.

10 दमीश्क मे हनन्याह नाम को एक चेलो थो का ओकासे प्रभु ने दर्शन मे बोल्यो, हे हनन्याह ओने बोल्यो, का “हा प्रभु.”

11 तब प्रभु ने ओकासे बोल्यो उठीखे , “वा गल्ली मे जा जो सीधी बोलीजास हइ, अरु यहूदा का घर मे शाउल नाम को एक तरसुस वासी खे पूछ्यो. देख उ प्रार्थना करी र्‍हो हइ. 12 अरु ओने हनन्याह नाम को एक इन्सान का अंदर आते अरु अपना उपर हाथ रखता देख्यो हइ. ताकि फिर से नजर पाये.”

13 हनन्याह ने जवाब दियो, “ हे प्रभु मे ने यो इन्सान का बारे मे भोत सो सुन्यो हइ कि येने यरुशलेम मे तरा पवित्र दुन्या का साथ बडी बुराइहोन करी हइ. 14 अरु ह्या भी येका प्रधान याजकहोन का तरफ से अधिकार मील्यो हइ कि जो दुन्या तरो नाम लेस हइ, उन सब खे बाधी ले.”

15 पन प्रभु ने ओकासे बोल्यो, तू चली जा. क्युकि उ ते गैरयहूदिहोन अरु राजाहोन अरु इस्त्राएलिहोन का सामने मरो नाम प्रगट करन का लिये मरो चुन्यो हुयो पात्र हइ. 16 अरु मी ओखे बतायु कि मरा नाम का लिये ओखे कसो कसो दुख उठानु पड्ये.

17 तब हनन्याह उठीखे उ घर मे गयो, अरु ओका पर अपनो हाथ रखी खे बोल्यो हे भैइ शाउल प्रभु मंनजे यीशु जो उ रस्ता मे जेका से तू आयो तोखे दिखइ दियो थो, ओ ने मेखे भेज्यो हइ कि तू फिर नजर पाये अरु पवित्र आत्मा से परिपूर्ण हुइ जाये. 18 अरु जल्दी ओकी आखहोन से छिलका से गिर्या अरु उ देखन लग्यो, अरु उठीखे बपतिस्मा लियो. 19 फिर भोजन करीखे बल पायो. उ कइ दिन वे चेलाहोन का साथ र्‍हियो जो दमीश्क मे थो.

20 अरु उ जल्दी आराधनालयहोन मे यीशु को प्रचार करण लग्या कि उ परमेश्वर को बेटो हइ.

21 सब सुननआला चकित हुइ खे बोलन लग्या, का योही उ इन्सान नी हइ जो यरुशलेम मे उनका जो यो नाम खे लेता था, खत्म करता था. अरु ह्या भी येका लिये आयो थो कि उनका बाधी खे प्रधान याजकहोन का पास लि जाये?

22 पन शाउल अरु भी सामर्थी होतो गयो, अरु या बात को प्रमाण दि दि, कि मसीह योही हइ, दमीश्क का र्‍हेनआला यहूदीयाहोन को मुडो बन्द करतो र्‍हियो.

23 जब भोत दिन बीती गया ते यहूदीयाहोन ने मीलिखे ओका मारी डालन को षड्यन्त्र रच्यो. 24 पन उनको षड्यन्त्र शाउल खे मालुम हुइ गयो. वे तो ओखे मारी डाल्यो का लिये रात दिन फाटकहोन पर घात मे लग्या र्‍हेता था. 25 पन रात खे ओका चेलाहोन ने ओखे टोपला मे बठाड्यो, अरु शहर दिवाल छेद मे से लटकि खे उतारी दियो.

26 यरुशलेम मे पहुची खे ओने चेलाहोन का साथ मीली जान को कोशिश कर्यो. पन सब ओकासे डरता था, क्युकि उनका विश्वास नी होतो थो, कि उ भी चेलो हइ. 27 पन बरनबास ने ओका अपना साथ प्रेरितहोन का पास लि जैइ खे उनखे बतायो कि येने कोय रीति से मार्ग मे प्रभु खे देख्यो, अरु ओने येका से बातहोन करी. फिर दमीश्क मे येने कसो हिम्मत से यीशु का नाम से प्रचार कर्यो. 28 उ प्रभु उनका साथ यरुशलेम मे आता जाते र्‍हियो 29 अरु नी धडक हुइ खे प्रभु का नाम से प्रचार करतो थो. अरु यूनानी भाषा बोलनआला यहूदीयाहोन का साथ बातचित वाद विवाद करतो थो. पन वे ओखे मारी डालन कि कोशिश करण लग्या. 30 यो जानीखे भैइ ओखे कैसरिया लि आयो, अरु तरसुस खे भेजी दियो.

31 यो प्रकार पुरा यहूदीया, अरु गलील, अरु सामरिया मे मंडली खे चैन मील्यो, अरु ओकी उन्नती होती गइ. अरु उ प्रभु को डर अरु पवित्र आत्मा की शांती मे चलती अरु बडती गइ.

32 फिर असो हुयो कि पतरस हर जगा फिरतो हुयो, उन पवित्र दुन्या का पास भी पहुच्या जो लुद्दा मे र्‍हेता था. 33 वहा ओका एनीयास नाम को लखवा को रोगी एक इन्सान मील्यो, जो आठ साल से खटिया पर पड्यो थो. 34 पतरस ने ओकासे बोल्यो, “ हे एनीयास! यीशु मसीह तोखे अच्छो करस हइ. उट अपनो बिछानो बिछा.” तब उ जल्दी उठी खडो हुयो. 35 तब लुद्दा अरु शारोन को सब र्‍हेनआला ओका देखी खे प्रभु की तरफ फिर्या.

36 याफा मे तबीता मंनजे दोरकास नाम की एक विश्वासिनी र्‍हेती थी. वाभोत सा अच्छो अच्छो काम अरु दान कर्या करती थी. 37 उ दिनहोन मे वा बीमार हुइ खे मरी गइ. अरु उनने ओको आंग धोलय खे अटारी पर रखी दियो. 38 येका लिये कि लुद्दा याफा का पास थो, चेलाहोन ने यो सुनी खे कि पतरस वहा हइ, दो इन्सान भेजी खे ओका से प्रार्थना करी खे हमारा पास आना मे देर नी करणु. 39 तब पतरस उठी खे उनका साथ हय लियो, अरु जब उ पहुच्यो ते वे ओका उ अटारी पर लि गया. सब विधवाहोन रोती हुइ ओका पास अय खडी हुइ अरु जो कुर्ता अरु कपडा दोरकास ने उनका साथ र्‍हेता हुया बनायो थो, दिखान लगी. 40 तब पतरस ने सब खे बाहेर करी दियो, अरु घुटना टेकीखे प्रार्थना करी अरु लास का तरफ देखी, बोल्यो, “ हे तबीता, उट” तब ओने अपनी आखहोन खोली दी. अरु पतरस खे देखीखे उठ बठी. 41 ओने हाथ दिखे ओखे उठाय खे अरु पवित्र दुन्या अरु विधवाहोन खे बुलैइ खे ओखे जिन्दो दिखइ दियो. 42 या बात पुरा याफा मे फैली गइ. अरु भोतझन ने प्रभु पर विश्वास कर्यो. 43 अरु पतरस याफा मे शमौन नामको कोय चामडा को धंदो करणआला का ह्या भोत दिन तक र्‍हियो.