1 यीशु ने या बातहोन बोली अरु अपनी आखहोन बद्दल का तरफ उठैइखे बोल्यो, “हे बाप, वा घडी अय पहुची, अपना बेटा की महिमा कर, कि बेटो भी तरी महिमा कर्ये 2 क्युकी तोने ओखे सब जनवरहोन पर अधिकार दियो, कि जिन खे तोने ओखे दियो हइ, उन सब खे उ अनन्त जिवन दे. 3 अरु अनन्त जिवन यो हइ, कि वे तोखे एकी सच्ची परमेश्वर खे अरु यीशु मसीह खे, जेखे तोने भेज्यो हइ, जाने. 4 जो काम तोने मेखे करण खे दियो थो, ओखे पूरो करीखे मेने पृथ्वी पर तरी महिमा करी हइ. 5 अरु अब हे बाप, तू अपना साथ मरी महिमा कर जो जगत की सृष्टि पैयले, मरा तरा साथ थी.

6 “मेने तरो नाम वे इन्सानहोन पर प्रगट कर्यो जिन खे तोने जगत मे से मेखे दियो वे तरा था अरु तोने उनने मेखे दियो अरु उनने तरा वचन खे मानी लियो हइ. 7 अब वे जानी गया हइ, कि जो कुछ तोने मेखे दियो हइ, सब तरा तरफ से हइ. 8 क्युकी जो बातहोन तोने मेखे पहुचैइ दी, मेने उनखे पहुचैइ दि अरु उनने उनखे ग्रहण कर्यो अरु सच्ची सच्ची जानी लियो हइ, कि मी तरा तरफ से आयो हइ, अरु यो विश्वास कर्यो हइ की तोने ही मेखे भेज्यो.

9 “मी उनका लिये प्रार्थना करुस हइ, जगत का लिये प्रार्थना नी करुस हइ पर उन्ही का लिये जिन खे तोने मेखे दियो हइ, क्युकी वे तरा हइ. 10 अरु जो कुछ मरो हइ उ सब तरो हइ. अरु जो तरो हइ उ मरो हइ. अरु इनसे मरी महिमा प्रगट हुय हइ. 11 मी अब जगत मे नी र्‍हियु, पर ये जगत मे ऱ्‍हियेका अरु मी तरा पास अउस हइ. हे पवित्र बाप, अपना उ नाम से जो तोने मेखे दियो हइ, उनकी रक्षा कर, कि वे हमारा जसो एक समान हो. 12 जब मी उनका साथ थो, ते मेने तरा उ नाम से, जो तोने मेखे दियो हइ, उनकी रक्षा करी मेने उनकी देख-रेख करी अरु विनाश का बेटा खे छोड उनमे से कोय नाश नी हुयो, येका लिए कि पवित्रशास्त्र की बात पूरी हुये. 13 पर आब मी तरा पास अउस हइ, अरु या बातहोन जगत मे बोलुस हइ, कि वे मरी खुशी अपना मे पूरा पाये. 14 मेने तरो वचन उनखे पहुचैइ दियो हइ, अरु जगत ने उनसे बैर कर्यो, क्युकी जसो मी जगत को नी, ओसो ही वे भी जगत का नी. 15 मी या प्रार्थना नी करु, कि तुम उनखे जगत से उठै ले, पर यो कि तुम उनखे उ दुष्ट से बचैइ रख. 16 जसो मी जगत को नी, ओसो ही वे भी जगत नी. 17 सच्चाइ का वजेसे उनखे पवित्र कर तरो वचन सच्ची हइ. 18 जसो तोने जगत मे मेखे भेज्यो, ओसो मे मेने भी उनखे जगत मे भेज्यो. 19 अरु उनका लिये मी अपना आप खे पवित्र करुस हइ ताकि वे भी सच्चाइ का वजेसे पवित्र कर्या जाये.

20 “मी फक्त इन का लिये प्रार्थना नी करु, पर उनका लिये भी जो इन, वचन खे वजेसे मरा पर विश्वास कर्ये 21 कि वे सब एक हो. जसो तू हे बाप मरा मे हइ, अरु मी तरा मे हइ, ओसो ही वे भी हम मे हुये खे येका लिए कि जगत विश्वास कर्ये का कि तोने ही ने मेखे भेज्यो. 22 अरु वा महिमा जो तोने मेखे दी, मेने उनखे दी हइ कि वे असो ही एक हो जसा कि हम एक हइ. 23 मी उनमे अरु तू मरा मे कि वे सिद्ध हुइखे एक हुय जाये अरु जगत जान कि तोने मेखे भेज्यो, अरु जसो तोने मरासे प्रेम रख्यो, ओसो ही उनसे प्रेम रख्यो.

24 “हे बाप, मी चाहुस हइ कि जिन खे तोने मेखे दियो हइ, झा मी हइ, व्हा वे भी मरा साथ हो कि वे मरी वा महिमा खे देख्ये जो तोने मेखे दी हइ, क्युकी तोने जगत की उत्पत्ति से पैयले मरासे प्रेम रख्यो. 25 हे धर्मी बाप, जगत ने मेखे नी जान्यो, पर मेने तोखे जान्यो अरु येने भी जान्यो कि तोने ही मेखे भेज्यो. 26 अरु मेने तरो नाम उनखे बतायो अरु बतातो र्‍हियु कि जो प्रेम तोखे मरासे थो, उ उनमे र्‍हिये अरु मी उनमे र्‍हियु.”