1 येका लिये हे मरा भैइ प्रभु.मे खुश र्हेनु. उ हि बातहोन तुम बार बार लिखना मे मेखे ते कोय मैनत नी होय, अरु येमे तुम्हारी कुशलता हइ, 2 कुत्ताहोन से हुशार र्हेनु वे बुरा काम करणवाला से हुशार र्हेनु वे काट कुट करणवाला से हुशार र्हेनु 3 क्युकि खतनो करणआला ते हम भी हइ जो परमेश्वर कि आत्मा कि बड्यी से उपास करस हइ, अरु मसीह यीशु पर घमण्ड करस हइ अरु शरीर पर भरोसो नी रख्ये. 4 पर मी ते आंग पर भी भरोसो रखी सकुस हइ अगर कोय दुसरा को आंग पर भरोसो रखन को खयाल हुये खे ते मी ओकसे भी बडी खे रखी सकुस हइ. 5 आठवा दिन मरो खतनो हुयो,इस्राएल, बंस अरु बिन्यामीन का गोत को हइ. इब्रानीहोन को इब्रानी हइ. व्यवस्था का बारे मे अगर बोल्ये ते फरीसी हइ. 6 उत्साह का बारे मे अगर बोल्ये ते मंडली खे सतानआला. अरु व्यवस्था कि धार्मीकता, बारे मे अगर बोल्ये ते नीर्दोष थो. 7 पन जो जो बातहोन मरा लाभ की थी, उनने खे मेने मसीह करण नुकसान समझी लियो हइ. 8 क्युकी मी अपना प्रभु मसीहा यीशु खे पैछान खे उत्तमता को करण सब बातहोन को नुकसान समझस हइ.जेकरण मे ने सब चिजहोन खे नुकसान उठैइ, अरु उनका कुडो समझस हइ, जेकासे मी मसीह खे हासील कर्यु. 9 अरु ओने पायो जायु. नी कि अपना वा धार्मीकता का साथ का जो व्यवस्था से हइ क्युकी वा धार्मीकता का साथ जे मसीह पर विश्वास करण हइ अरु परमेश्वर का तरफ से विश्वास करणा पर मीलस हइ. 10 ताकि मी ओखे अरु उनखे कि सामर्थ्य खे अरु ओका साथ दुखहोन मे हिस्सेदार होना को मर्म खे जान्यु, अरु ओको पुनरुत्थान की समानता कि मील्हे कर्यु. 11 कि मी कोय भी रीति से मर्या हुयो मे से जी उठन का पद तक पहुच्यो.

12 यो मतलब नी कि मी परय चुक्यो हइ, यो सिध्द हुइ चुक्यो हइ, पर उ चीजखे पकडना का लिये भागीखे जय जास हइ. जेका लिये मसीह यीशु ने मेखे पकड्यो थो. 13 हे मसीह भैइ मरी भावना या नी कि मी पकडय चुक्यो हइ. पन फक्त यो एक काम करस हइ कि जे बातहोन पिच्छे र्र्‍ही गइ हइ उनका भुलि खे आगे कि बातहोन का तरफ बढतो हुयो. 14 नीशाना का तरफ दौवडी चलि जास हइ, ताकि यो इनाम पाये जेका लिये परमेश्वर ने मेखे मसीह यीशु मे उपर बुलायो हइ.

15 हम मे से जेत्ता सिध्द हइ, यो बिचार रख्ये अरु अगर कोय बात मे तुम्हारा अरु ही बिचार हुये ते परमेश्वर ओखे भी तुम पर प्रगट करी दिये. 16 येका लिये जहा तक हम पहुच्या हइ, ओका जसो चलनु.

17 हे मसीह भैइ अरु भैइन तुम सब मीलिखे मरी जसी चाल चलनु, अरु उनका परछानी खे रखनु जो या रीति पर चलस हइ जेको उदाहरण तुम हम मे पास हइ. 18 क्युकि भोत सी अशी चाल चलस हइ, जेकी चर्चा मे ने तुम से बार बार करी हइ अरु अब भी रोइ खे बोलुस हइ कि वे अपनी चाल चलन से मसीह का क्रुस का दुशमन हइ. 19 उनको आखरी अविनाश हइ, उनको इश्वर पेट हइ, वे अपना लाज की बातहोन पर घमण्ड करस हइ अरु पृथ्वी कि चिजहोन पर मन लगैइ र्हेस हइ. 20 पर हमारो स्वदेश स्वर्ग पर हइ. अरु हम एक उद्धारकर्ता प्रभु यीशु मसीह खे वहा से आना कि रस्ता देखी रा हइ. 21 उ अपनी‍ शक्ति का प्रभाव का जसो जेका वजेसे उ सब चीजहोन खे अपना कब्जा मे करी सकस हइ, हमारी दीन-हीन आंग को रुप बदली, अपनी महिमा की आंग को अनुकूल बन्यी दिये.