1 ಮನ್ಹುನ್ ಸಗ್ಳ ಬುರ್ಸ ಫನ್, ಸಗ್ಳಾ ಮೊಸ್, ಕಪಟ್ಪನ್, ಖೊಟಪನ್, ಸಗ್ಳೆ ತರಚಾ ನಿಂದಾ ಸುಡುನ್‍ ದೆವಾ. 2 ನವಿನಿ ಜ಼ಲಾಮಲ್ಯಾಲ್ಯಾ ಮುಲಾಂಚೆಗತ್ ತುಮಿ ದೇವಾಚಿ ವಾಕ್ಯಾ ಮಂಥ್ಯಾಲ ನಿರ್ಮಳ ಆತ್ಮೀಕ್ ದುದಾಚಿ ಆಶಾ ಕರಾ. ತ್ಯನಿ ರಕ್ಷನೆತ್ ವಾಡ್ಸಿಲಾ. 3 ಕಾ ಮಂಜೆ ಪ್ರಭು ದಯಾ ಆಸ್ನಾರಾ ಮನ್ಹುನ್ ತುಮಾನಾ ಆನ್‌ಭವ್ ಜಾ಼ಲ್ಯಾ.

4 ತುಮಿ ಜೀವಾಚಾ ದೊಂಡ್ಯಾಪ ಆಲ್ಯಾಸಾ. ತ್ಯೊ ದೊಂಡಾ ಲೊಕಾನಾ ನಕೊಜಾ಼ಲಾ ಫನ್ ತ್ಯೊ ದೇವಾನಿ ನಿವಡ್‌ಲ್ಯಾಲಾ ಆನಿ ತ್ಯಲಾ ಕಿಮ್ತಿಚಾ಼ ಜಾ಼ಲ್ಯಾ. 5 ತುಮಿ ಸಾಯಿತ್ ಜೀವಾಚಾ಼ ದೊಂಡಾ ವ್ಹವುನ್ ಆತ್ಮೀಕ್ ದಿವುಳ್ ವ್ಹಯಾ ಬ್ಯಾಂತ್ಯಾಲಿ ಹಾಸಾ. ಯೇಸು ಕ್ರಿಸ್ತಾಸ್ ಲಾಗುನ್ ದೇವಾಲಾ ಪಾಯ್ಜೆತ್ಯ ಆತ್ಮೀಕ್ ಯಜ್ಞ ದಿಯಾ ಪವಿತ್ರ ಯಾಜಕಾಚೆಗತ್ ಹಾಸಾ. 6 ಬಗಾ, ಚೀಯೊನಾತ್ ಕೊನ್ಯಾಚಾ಼ ದೊಂಡಾ ಥೆವ್ತೊ.

7 ಮನ್ಹುನ್ ಇಸ್ವಾಸ್ ಥೆವ್ನಾರ‍್ಯಾ ತುಮಾನಾ ಹ್ಯೊ ದೊಂಡಾ ಕಿಮ್ತಿಚಾ಼. ಫನ್ ಇಸ್ವಾಸ್ ನಸ್ನಾರ‍್ಯಾನಾ,

8 ಆನಿ ಪವಿತ್ರ ಗ್ರಂಥಾತ್ ಆನಿ ಯಕಿಕ್ಡ ಲಿವ್‌ಲ್ಯಾಲ ಕ್ಯಾ ಮಂಜೆ,

9 ತುಮಾನಾ ಆಂದಾರಾತ್ನಿ ಆಪ್‌ಲ್ಯಾ ಮೊಟ್ಯಾ ಉಜೀಡಾತ್ ಹಾಕಟ್‍ಲ್ಯಾಲ್ಯಾಚಿ ಚಾ಼ಂಗ್ಲಿ ಕಾಮ ಸಾಂಗಾಯಾ ತುಮಿ ದೇವಾಪ್ನಿ ನಿವಡ್‌ಲ್ಯಾಲಿ ಲೊಕ ರಾಜಾಚಾ ವಂಶಾತ್ಲ ಯಾಜಕ್, ನಿರ್ಮಳ್ ಲೊಕ, ದೇವಾಚಿ ಸ್ವತಾಚಿ ಪೊರ ಜಾ಼ಲ್ಯಾಸಾ. 10 ಆಂದಿ ತುಮಿ ದೆವಾಚಿ ವ್ಹವುನ್ ನವ್ತಾಸಾ. ಆತಾತರಿ ತುಮಿ ದೇವಾಚಿ ಲೊಕ ಜಾ಼ಲ್ಯಾಸಾ. ಆಂದಿ ತುಮಿ ಕರ್ನಾ ನಸ್‌ಲ್ಯಾಲಿ ಜಾ಼ಲ್ತಾಸಾ. ಆತಾತರಿ ಕರ್ನಾ ಗೆತಲ್ಯಾಲಿ ಜಾ಼ಲ್ಯಾಸಾ.

11 ಮಾಯೆಚಾನು, ಪ್ರವಾಸಿ ಆನಿ ದುಸರೆ ದೇಶೆಚಿ ಜಾ಼ಲ್ಯಾಲಿ ತುಮಿ ತುಮ್ಚಾ ಆತ್‌ಮ್ಯಾಚೆ ಆಡ್ವ ಲಡ್ನಾರ ಶಾರೀರಿಕ್ ಬುರ್ಸೆ ಆಶೆತ್ನಿ ದುರ್ ರಾಹ್ಯಾ ವ್ಹಯಿಸಾ ಮನ್ಹುನ್ ಮೀ ತುಮ್ಚಿಪ ಮಾಕ್ತೊ. 12 ತುಮಚ಼ ವಾಗ್ನ ದುಸ್‍ರ್ಯಾ ಲೊಕಾಂಚೆ ಮೊರ‍್ಹ ಚಾ಼ಂಗ್ಲ ರಾಹುನಿ, ತವಾ ತೀ ಕಚೆ ಗುಸ್ಟಿಸ್ಲಾಗುನ್ ತುಮಾನಾ ಬುರ್ಸಿ ಮನ್ಹುನ್ ನಿಂದಾ ಕರ್ತ್ಯಾತ ತೇ ತುಮ್ಚೆ ಗುಸ್ಟಿತುಸ್ ತುಮ್ಚಿ ಚಾ಼ಂಗಲಿ ಕಾಮ ಡೊಳ್ಯಾನಿ ಬಗುನ್ ತ್ಯಚಾ ಯಯಾಚಾ ದಿಸಾತ್ ತೀ ದೇವಾಲಾ ವವ್ಯಾಳ್ನಾರ್.

13 ಮಾನ್ಸಾನಿ ನಿವಡ್‌ಲ್ಯಾಲ್ಯಾ ಪರ್ತೆಕ್ ಅಧಿಕಾರಾಲಾ ಪ್ರಭುಸ್ ಲಾಗುನ್ ತುಮಿ ಐಕಾ. ಸರ್ವಾ ಅಧಿಕಾರ್ ಆಸ್‌ಲ್ಯಾಲ್ಯಾ ರಾಜಾಲಾ ವ್ಹವುನಿ 14 ನಾಹಿತ ರಾಜಾಪ್ನಿ ಬುರ್ಸಿ ಚಾ಼ಲ್ನಾರ‍್ಯಾನಾ ಶಿಕ್ಷಾದಿಯಾ ಚಾ಼ಂಗ್ಲಿ ಚಾ಼ಲ್ನಾರ‍್ಯಾನಾ ಉಮೇದ್ ದಿಯಾ ಲಾವುನ್ ದಿಲ್ಯಾಲಾ ಅಧಿದತಿ ವ್ಹವುನಿ ತುಮಿ ತ್ಯಚ಼ ಐಕಾ. 15 ಸಮಜಾ಼ಚೆ ಆಂದಿ ಬೊಲ್ನಾರ‍್ಯಾ ಖುಳ್ಯಾ ಲೊಕಾಂಚ಼ ಥ್ವಾಂಡ್ ತುಮಿ ಚಾ಼ಂಗಲ್ಯಾ ಚಾ಼ಲನ್ಯಾನಿ ಆವ್ಡಾಯಾವ್ಹಯಿ ಮನ್ಹುನ್ ದೇವಾಚ಼ ಮನ್. 16 ಸ್ವತಂತ್ರಾಚೆಗತ್ ಚಾ಼ಲಾ, ಫನ್ ಬುರ್ಸ ಫನ್ ಆಡಶಾ ಕರಾಯಾ ತುಮಿ ಸ್ವತಂತ್ರ ವಾಪ್ರು ನಕೊಸಾ, ಫನ್ ತುಮಿ ದೇವಾಚಾ ಗುಲಾಮಾಚೆಗತ್ ಚಾ಼ಲಾ. 17 ಸಗ್‌ಳ್ಯಾನಾ ಮರ‍್ಯಾದ್ ದೇವಾ. ಬನ್ಹಿ ಬಾವ್ಹಾಚಿ ಮಾಯಾ ಕರಾ. ದೇವಾಲಾ ಭೀವಾ. ರಾಜಾಲಾ ಮರ‍್ಯಾದ್ ದೇವಾ.

18 ಸೇವಕಾನು, ತುಮ್ಚಾ ದನ್ಯಾಂಚಾನಿ ಸಾಂಗಲ್ಯಾಲ ಪುರೆ ಮರೆದಿನಿ ಕರಾ. ಚಾ಼ಂಗಲ್ಯಾ ಮನಾಚ಼ ಆಸಲ್ಯಾಲ್ಯಾನಾ ತ್ಯವ್ಡಸ್ ನವ್ಹ ಕಟುರ್ ಮನಾಚಾಂಚ಼ಬಿ ಐಕಾ. 19 ಯಕಾಲಾ ಅನ್ಯಾಯಾನಿ ತರಾಸ್ ವ್ಹತಾನಾ ದೇವ್ ಬಕ್ತೊ ಮನ್ಹುನ್ ಸಮಜು಼ನ್ ತ್ಯೊ ತರಾಸ್ ತ್ಯನಿ ಸುಸ್ವುನ್ ಗೆತಲ್ಯಾವ ತ್ಯ ಬರ. 20 ಚು಼ಕ್ ಕರುನ್ ಮಾರ್ ಖಾತಾನಾ ತುಮಿ ಸುಸ್ವುನ್ ಗೆತಲ್ಯಾವ ತ್ಯಾತ್ ಕ್ಯಾ ಮೊಟಫನ್? ಫನ್ ಬರ ಕರುನ್ ತರಾಸ್ ಯತಾನಾ ತ್ಯೊ ತುಮಿ ಸುಸ್ವುನ್ ಗೆತಲ್ಯಾವ ತ್ಯೊ ದೇವಾಚೆ ಮೊರ‍್ಹ ಮೊಟ ಜಾ಼ಲ್ಯಾ. 21 ಹ್ಯಚಿ ಸಾಟಿಸ್ ತುಮಾನಾ ಹಾಕಟ್‌ಲ್ಯಾತ. ಕ್ರಿಸ್ತ ಸಾಯಿತ್ ತುಮ್ಚಿ ಸಾಟಿ ತರಾಸ್ ಖಾವುನ್ ತುಮಿ ತ್ಯಚೆ ಪ್ಯಾಯಶಾರಿನಿ ಚಾ಼ಲಾಯಾ ವ್ಹಯಿಸಾ ಮನ್ಹುನ್ ವಾಟ್ ದಾವುನ್ ಗೇಲಾ 22 ತ್ಯನಿ ಕಸ್ಲಸ್ ಪಾಪ್ ಕೇಲನಾಹಿ, ತ್ಯಚಾ ತೊಂಡಾತ್ ಕಸ್ಲಸ್ ಕಪಟ್ ಫನ್ ಗಾವ್ಲನಾಹಿ. 23 ಶಿವ್ಯಾದೆನಾರ‍್ಯಾನಾ ತ್ಯನಿ ಪರ್ತುನ್ ಶಿವ್ಯಾದಿಲ್ಯಾನಾಹಿತಾ, ತ್ಯನಿ ತರಾಸ್ ಖಾವುನ್ ಕುನಾಲಾಸ್ ಭ್ಯಾಗಾಲಾಚೆ ಆಂದಿ ಖರ‍್ಯಾನಿ ತೀರ್ಪ ಕರ್ನಾರ‍್ಯಾಲಾ ಆಪ್ಲ ಕಾಮ್ ದಿಲ. 24 ಆಮಿ ಪಾಪಾಸಾಟಿ ಮರುನ್ ನೀಯತಿಚಿ ವ್ಹವುನ್ ಜೀವ್ನಾ ಕರಾಯಾಸಾಟಿ ತ್ಯೊ ಆಮ್‌ಚ಼ ಪಾಪ ಆಪ್ನುಸ್ ಆಪ್ಲಿವ ಗಿಹುನ್ ಶಿಲ್ಬೆವ ಮೇಲಾ. ತ್ಯಚಿವ ಬಸ್‍ಲ್ಯಾಲ್ಯಾ ಮಾರಾನಿ ಆಮಾನಾ ಬರ ಜಾ಼ಲ. 25 ತುಮಿ ವಾಟ್ ಚು಼ಕುನ್ ಗೇಲ್ಯಾಲ್ಯಾ ಮೆಂಡ್ರಾಚೆಗತ್ ಆಸ್‍ಲ್ಯಾಲಿ. ಫನ್ ಆತಾ ತುಮಿ ಪರ್ತುನ್ ತುಮ್ಚಾ ಆತಮ್ಯಾಚಾ಼ ಕುರ್ಬುರ್ ಜಾ಼ಲ್ಯಾಲ್ಯಾಪ ಆಲ್ಯಾಸಾ.