1 ಸರ್ತ್ಯಾನಿ, ಬನ್ಹಿ ಬಾವ್ಹಾನು, ಆಮ್ಚಿ ಸಾಟಿ ಮಾಗ್ನ ಕರಾ ಪ್ರಭುಚ಼ ಸಬಾತ್ ಸಗ್ಳಿಕ್ಡ ಪಗಾಳ್ಯಾ ಶಾರ್ಕ ಕುಠ ಕುಠಬಿ ಚಾ಼ಟಕ್ಯಾನಿ ಪಗಳುನ್ ನಾವ್ ಗೆಥ್ಯಾ ಶಾರ್ಕ 2 ದೇವಾನಿ ಆಮಾನಾ ಬುದ್ದಿ ನಸ್‌ಲ್ಯಾಲ್ಯಾ ಬುರ್ಶಾ ಲೊಕಾಂಚಾ ಹಾತಾತ್ನಿ ಚು಼ಕ್ವಿ ಶಾರ್ಕ ಮಾಗ್ನ ಕರಾ ಸಗ್‌ಳ್ಯಾಂಚಿಪ ಕ್ರಿಸ್ತಾಚಾ಼ ಇಸ್ವಾಸ್ ನಾಹಿ ನವ್ಹ.

3 ಖರ ಪ್ರಭು ಇಸ್ವಾಸಾಚಾ಼ ತ್ಯೊ ತುಮಾನಾ ಘಟ್ ಕರುನ್ ತುಮಿ ಬುರ್ಶಾಚಾ ಹಾತಾತ್ ಗಾಹುನಾಹಿ ಆಸ ರ‍್ಯಾಕ್ನಾರ್ 4 ಆಮಾನಾ ಪ್ರಭುವ ಖುಬ್ ಇಸ್ವಾಸ್ ಹಾ ಆನಿ ಪುರಿ ಖಾತ್ರಿ ಹಾ ಆಮಿ ಕ್ಯಾ ತುಮಾನಾ ಸಾಂಗ್‌ಲ್ಯಾ ತುಮಿ ತಸಸ್ ಕರ್ತ್ಯಾಸಾ ಆನಿ ಕರೀತುಸ್ ರಾನ್ಹಾರ್.

5 ಪ್ರಭು ತುಮಾನಾ ದೆವಾಚೆ ಮಾಯೆತ್ ಕ್ರಿಸ್ತಾಚಾ ಥಂಡ್ಪನಾತ್ ರಾಹಿಸಾರ ಚಾ಼ಲ್ವುನಿ.

6 ಆಮ್ಚಾ ಬನ್ಹಿ ಬಾವ್ಹಾನು, ಆಮಿ ಸಿಕಿವ್‌ಲ್ಯಾಲ್ಯಾ ಸಿಕ್ಷನಾ ಶಾರ್ಕ ಆಂದಿ ಆಡ್ವ ವ್ಹವುನ್ ಚಾ಼ಲತ್ಯಾಲ್ಯಾ ಬಾವ್ಹಾಲಾ ತುಮಿ ದುರ್ ರಾಹ್ಯಾ ವ್ಹಯಿ ಮನ್ಹುನ್ ಆಮಚಾ಼ ಪ್ರಭು ಜಾ಼ಲ್ಯಾಲ್ಯಾ ಯೇಸು ಕ್ರಿಸ್ತಾಚಾ ನಾವಾನಿ ತುಮಾನಾ ಸಾಂಗತ್ಯಾವ್. 7 ತುಮಿ ಆಮ್ಚಿಗತ್ ಕಸ ಚಾ಼ಲಾಯಾ ವ್ಹಯಿಸಾ ಮನ್ಹುನ್ ತುಮಾನಾಸ್ ಠಾವ ಹಾ. ಆಮಿ ತುಮ್ಚಿಗತ್ ಆಸ್ಥಾನಾ ಆಳ್ಸಿ ನವ್ಥಾಸಾ. 8 ಆಮಿ ಕುನಾಪ್ನಿ ಪೈಸ ಗೇತ್ಲ ನಾಹಿತ ಆನಿ ಪೈಸ ದಿಯಾಚೆ ಆಂದಿ ಕುನಾಪ್ನಿ ಜೆವಾನ್ ಖಾಲ ನಾಹಿ ಕಾ ಮಂಜೆ ತುಮ್ಚಾತ್ ಯಕಾಲಾಬಿ ವಜ಼ ವ್ಹವುನಾಹಿ ಮನ್ಹುನ್ ರ‍್ಯಾತ್ ದೀಸ್ ಕಾಮ್ ಕೇಲ. 9 ತುಮ್ಚಿಪ್ನಿ ಮಜ಼ತ್ ಕರುನ್ ಗಿಹ್ಯಾ ಆಮಾನಾ ಹುಕುಮ್ ನಾಹಿ ಮನ್ಹುನ್ ತಸ ಕೆಲ್ಯಾಲ ನವ್ಹ ತುಮಿ ಆಮ್ಚಿಗತ್ ವ್ಹಯಾ ವ್ಹಯಿಸಾ ಮನ್ಹುನ್ ತುಮಾನಾ ಸಮಜಾ಼ಯಾ ಕೇಲ. 10 ಯವ್ಡಸ್ ನವ್ಹ ಆಮಿ ತುಮ್ಚಿ ಸಂಗ ಆಸ್ಥಾನಾ ಕಾಮ್ ಕರಿನಸ್ನಾರ‍್ಯಾನಿ ಖಾವುನಾಹಿ ಮನ್ಹುನ್ ತುಮಾನಾ ಸಾಂಗ್‌ಲ್ಯಾ.

11 ಆಮಿ ಕಾ ಹ್ಯ ಸಾಂಗ್ತಾವ್ ಮಂಜೆ ತುಮ್ಚಾತ್ಲ ಥೊಡ ಜಾ಼ನ್ ಕಾಯ್ ಕಾಮ್ ಕರಾಚೆ ಆಂದಿ ದುಸ್‌ರ‍್ಯಾಂಚಾ ಕಾಮಾತ್ ಡುಯಿ ಗಾಲ್ಹುನ್ ಆಳ್ಸೊಟ ವ್ಹವುನ್ ರಾಥ್ಯಾತ ಮನ್ಹುನ್ ಬಾತ್ನಿ ಐಕ್ಲೆ. 12 ಆಸ್‌ಲ್ಯಾ ಲೊಕಾನಾ ಆಮಿ ಪ್ರಭು ಯೇಸು ಕ್ರಿಸ್ತಾಚಾ ನಾವಾನಿ ಆಮಿ ತಾಕಿತ್ ದಿವುನ್ ಆಜ್ಞೆ ದೆತಾವ್ ತೇ ಆಪ್ಲೆ ರಾಬ್ನುಕಿನಿ ಆಪ್ಲ ಆನ್ ಆಪ್ನುಸ್ ಕಮ್ವಾಯಾ ಸಾಂಗ್ತಾವ್.

13 ಮಾಜಾ ಬನ್ಹಿ ಬಾವ್ಹಾನು ತುಮಿ ತರಿ ಚಾ಼ಂಗ್ಲ ಕರ್ತ್ಯಾಲ್ಯಾತ್ ಠಕು ನಕೊಸಾ 14 ಹ್ಯಾ ಪತ್‌ರ‍್ಯಾನಿ ಸಾಂಗ್‌ಲ್ಯಾಲ್ಯಾ ಹ್ಯಾ ಸಬ್ದಾಂಚಿಗತ್ ಕೊನ್ತರಿ ಚಾ಼ಲ್ಲಾ ನಾಹಿತ ತ್ಯಚಿ ವಳಕ್ ಥಿವುನ್ ತ್ಯಲಾ ಲಾಜ಼್ ಯಯಿಜೊ಼ಗ ತ್ಯಚಿ ಸಂಗತ್ ಕರು ನಕೊಸಾ 15 ಫನ್ ತ್ಯಚಿಪ ವಾದಿ ಶಾರ್ಕಾ ಯವಾರ್ ಕರುನಕೊಸಾ ಹ್ಯಚಿಸ್ ಲಾಗುನ್ ಆಪ್ಲಾ ಇಸ್ವಾಸಿ ಬಾಹು ಮನ್ಹುನ್ ಸಮಜು಼ನ್ ಗಿಹುನ್ ಬುದ್ದಿ ಸಾಂಗಾ

16 ಥಂಡ್ಪನಾಚಾ಼ ಪ್ರಭು ಆಪ್ನುಸ್ ಸರ್ವ್ಯಾ ಕಾಲಾತ್ ಸಗ್ಳೆ ತರನಿ ತುಮಾನಾ ಶಾಂತಿ ದಿವುನಿ ಪ್ರಭು ತುಮ್ಚಿ ಸಂಗ ರಾಹುನಿ.

17 ಮಿ ಪೌಲ್ ಸ್ವತಾ ಮಾಜಾ ಹಾತಾನಿ ತುಮಾನಾ ವಂದನ್ ಲಿವ್‌ತ್ಯೊ. ಸಗ್‌ಳ್ಯಾ ಪತ್‌ರ‍್ಯಾತ್ನಿ ಹಿಸ್ ಮಾಜಿ ವಳಕ್, ಆಸಸ್ ಮಾಜ಼ ಲಿವ್ನ. 18 ಆಮ್ಚಾ ಪ್ರಭು ಜಾ಼ಲ್ಯಾಲ್ಯಾ ಯೇಸು ಕ್ರಿಸ್ತಾಚಿ ಕ್ರಪಾ ತುಮ್ಚೆ ಸಗ್‌ಳ್ಯಾಂಚೆ ಸಂಗ ರಾಹುನಿ.