ಪೌಲನು ಕೊಲೊಸ್ಸೆದವರಿಗೆ ಬರೆದ ಪತ್ರಿಕೆ
ಪೌಲಾನಿ ಕೊಲೊಸ್ಸೆತ್‌ಲ್ಯಾನಾ ಲಿವ್‌ಲ್ಯಾಲ ಪತ್ರ
ವಳಕ್
ಕೊಲೊಸ್ಸೆನಾ ಲಿವ್‌ಲ್ಯಾಲ ಪತ್ರ ಅಪೊಸ್ತಲ್ ಜಾ಼ಲ್ಯಾಲಾ ಪೌಲ್ ಲಿವ್ತೊ1:1ತ್ಯನಿ ಹ್ಯ ಪತ್ರ ಕ್ರಿಸ್ತ ಜ಼ಲಾಮ್‌ಲ್ಯಾ ನಂತರ್ ಲ ಕರುನ್ 60 ವರ್ಸಾತ್ ಲಿವ್‌ಲ್ಯಾ ಹ್ಯಾ ಯಳಾತ್ ತ್ಯೊ ಲ ಕರುನ್ ರೊಮಾಚಾ ತುರುಂಗಾತ್ ಹುತ್ತಾ. ಕೊಲೊಸ್ಸೆತ್‌ಲ್ಯಾನಾ ಲಿವ್‌ಲ್ಯಾಲ ಪತ್ರ, ಎಪೆಸಾತ್‌ಲ್ಯಾನಾ ಲಿವ್‌ಲ್ಯಾಲ ಪತ್ರ ಆನಿ ಪಿಲೊಮೊನಾಲಾ ಲಿವ್‌ಲ್ಯಾಲ್ಯಾ ಪತ್‌ರ‍್ಯಾನಾ ತುರುಂಗಾತ್ಲಿ ಪತ್ರಿ ಮನ್ಹುನ್ ಹಾಕಟ್ಯಾತ ಕಾ ಮಂಜೆ ಹಿ ಪತ್ರಿ ಲಿವ್ತಾನಾ ತುರುಂಗಾತ್ ಹುತ್ತಾ. ಹ್ಯ ಪತ್ರ ತ್ಯನಿ ಕೊಲೊಸ್ಸೆ ಪೆಠತ್ಲೆ ಸಬೆಲಾ ಲಿವ್ತೊ. 2:1ಸಾಂಗ್‌ಲ್ಯಾ ಸಾರ ಕೊಲೊಸ್ಸೆ ಸಬೆ ಪೌಲಾನಿ ಸುರ್ವಾತ್ ಕಿಲಿ ನಾಹಿ, ಫನ್ ತ್ಯಚೆ ಗುಶ್ಟಿತ್ ಥುಡಿ ಜವಾಬ್ದಾರಿ ತ್ಯನಿ ಗಿತ್ಲಿ ಎಪಪ್ರೊದ್ ಕೊಲೊಸ್ಸೆತ್ಲಾ ಜಾ಼ಲ್ಥಾ ಮನ್ಹುನ್ ತ್ಯನಿಸ್ ಹಿ ಸಬೆ ಬಾಂದಾಯಾ ಸಾದ್ಯ ಹಾ.
ಪೌಲಾನಿ ಸಭೆತ್ ಥೊಡ ಲಬಾಡ್ ಸಾಂಗ್ನ ಚಾ಼ಲತ್ಯಾ ಮನ್ಹುನ್ ಕ್ಯಾಳ್ಜಿ ಗೆತಲ್ಯಾಲಾ ಜಾ಼ಲ್ಥಾ. ಹ್ಯಾ ಪತ್‌ರ‍್ಯಾತ್ ಲ ತ್ಯ ಹೆ ಗುಶ್ಟಿತ್ ಲಿವ್‌ಲ್ಯಾ. ತಿಥ ಜ಼ುನ್ಯಾ ಕರಾರಾತ್‌ಲ್ಯಾ ಯೆಹುದಿಂಚ಼ ನ್ಯಾಮ್ ಇಸ್ವಾಸಿಂಚಾನಿ ಪಾಳಾಯಾ ವ್ಹಯಿ ಮನ್ಹುನ್ ಖುಬ್ ಕರುನ್ ಮುಂಜಿ ಕರಾಯಾ ವ್ಹಯಿ ಮನ್ಹುನ್ ಜು಼ಲ್ಮಿ ಕರ್ತ್ಯಾಲಾ ಯೆಹುದಿ ಇಸ್ವಾಸಿಂಚಾ಼ ಯೊಕ್ ತಂಡಾ ಹುತ್ತಾ. ಪೌಲಾನಿ ಖಾತ್ರಿ ಕರುನ್ ಇಸ್ವಾಸಿನಾ ದೇವಾಪ್ನಿ ಗಿಹ್ಯಾಲಾ ಕ್ರಿಸ್ತಾ ಸಿವಾರ್ ಕುನಾಚಿ ನಾಹಿತ ಕಶಾಚಿ ಗರಜ಼್ ನಾಹಿ ಆನಿ ತ್ಯ ಸಾಂಗ್ನ ಮನ್ಸಾಂಚೆ ಉಪೇಗ್ ನಸ್‌ಲ್ಯಾಲ್ಯಾ ಕಾರನಾವ ಆಸ್ಥ ಮನ್ಹುನ್ ಲಿವ್ತೊ 2:8
ಪಿಠಿಕೆ
1. ಪೌಲ್ ಕೊಲೊಸ್ಸೆಚೆ ಸಭೆಲಾ ನಮಸ್ಕಾರ್ ಸಾಂಗಿತ್ ಪತ್ರ ಸುಪಿವ್ತೊ.1:1-2
2. ನಂತರ್ ತ್ಯೊ ಕ್ರಿಸ್ತಾಚಿ ಸ್ರೆಶ್ಟತೆಚೆ ಗುಶ್ಟಿತ್ ಖುಬ್ ಕರುನ್ ಕೊಲೊಸ್ಸೆತ್ ಆಸ್ಲ್ಯಾಲ್ಯಾ ಲಬಾಡ್ ಸಾಂಗ್‌ನ್ಯಾಲಾ ಪ್ರತಿ ಉತ್ತರ್ ದೆತ್ಯಾಲ್ಯಾಚೆ ಗುಶ್ಟಿತ್ ಲಿವ್ತೊ 1:3—3:4
3. ತ್ಯಚಾ ಖುಬ್ ಪತ್‌ರ‍್ಯಾಚೆಗತ್ ಪೌಲ್ ಆಪ್ಲ ಅರ್ದ್ಯಾತ್ಲ ಅರ್ದ ಪತ್ರ ಇಸ್ವಾಸಿ ಜೀವ್ನಾ ಕರಾಯಾ ವ್ಹಯಿ ಜಾ಼ಲ್ಯಾಲ ಖಾತ್ರಿಚಾ ಸುಸ್ನಾ ದೆತೊ 3:5—4:6
4. ಪೌಲ್ ನಮಸ್ಕಾರ್ ಕರ್ತ್ಯಾಲ್ಯಾಸ್ ಲಾಗುನ್ ಆನಿ ಪತ್ರ ದುಸ್ರೆ ಸಬೆತ್ ಜೊರಾನಿ ವಾಚ಼್ವಾಯಾ ಸುಸ್ನಾ ದಿಯಿತ್ ಪೌಲ್ ಪತ್ರ ಸುಪಿವ್ತೊ 4:7-18
1
1 ದೇವಾಚಾ ಮನಾಚೆಗತ್ ಕ್ರಿಸ್ತ ಯೇಸುಚಾ಼ ಅಪೊಸ್ತಲ್ ಜಾ಼ಲ್ಯಾಲಾ ಪೌಲ್ ಆನಿ ಬಾಹು ಜಾ಼ಲ್ಯಾಲಾ ತಿಮೊಥಿ,
2 ಕೊಲೊಸ್ಸೆತ್ ಆಸ್ಲ್ಯಾಲ್ಯಾ ದೇವಾಚಾ ಲೊಕಾನಾ ಆನಿ ಕ್ರಿಸ್ತಾಪ ಇಸ್ವಾಸ್ ಆಸ್ಲ್ಯಾಲ್ಯಾ ಬನ್ಹಿ ಬಾವ್ಹಾನಾ ಲಿವಾಚ಼ ಕ್ಯಾ ಮಂಜೆ, ಆಮ್ಚಾ ಬಾಪ್ನಿ ತುಮಾನಾ ಕ್ರಪಾ ಆನಿ ಶಾಂತಿ ಗಾವುನಿ.
ದನ್ಯವಾದಾಚ಼ ಮಾಗ್ನ
3 ತುಮ್ಚಿಸಾಟಿ ಆಮಿ ಮಾಗ್ನ ಕರ್ತಾನಾ ತುಮ್ಚಿಸ್ ಲಾಗುನ್ ಆಮ್ಚಾ ಪ್ರಭು ಯೇಸು ಕ್ರಿಸ್ತಾಚಾ ಬಾ ದೇವಾಲಾ ದನ್ಯವಾದ್ ಕರ್ತಾವ್. 4 ಕಾ ಮಂಜೆ ತುಮಿ ಕ್ರಿಸ್ತ ಯೇಸುವ ಥೆವ್‌ಲ್ಯಾಲಾ ಇಸ್ವಾಸ್ ಆನಿ ದೇವಾಚಾ ಲೊಕಾಂಚಿವ ಥೆವ್‍ಲ್ಯಾಲೆ ಮಾಯಾಚೆ ಗುಶ್ಟಿತ್ ಆಮಿ ಐಕ್‍ಲ್ಯಾ. 5 ಸ್ವರ್ಗಾತ್ ತುಮ್ಚಿ ಸಾಟಿ ರ‍್ಯಾಕ್‌ಲ್ಯಾಲೆ ಆಸೆಚೆ ಗುಶ್ಟಿತ್ ಬರೆ ಖಬ್ರಿಚಾ ಖರ‍್ಯಾ ವಾಕ್ಯಾ ತುಮಿ ಆಂದಿಸ್ ಐಕ್‍ಲ್ಯಾಸಾ. 6 ತುಮಿ ಖರ‍್ಯಾತ್ ದೇವಾಚಿ ಕ್ರಪಾ ಐಕುನ್ ಸಮಜು಼ನ್ ಗೆತಲ್ಯಾಲ್ಯಾ ದಿಸಾದರ್ನಿ ತುಮ್ಚಿಪ ಆಲ್ಯಾಲೆ ತೆ ಬರೆ ಖಬ್ರಿನಿ ತುಮಾನಾ ಫಳ್ ದಿಲ್ಯಾ ಶಾರ್ಕ ದುನೆತ್ ಸಗ್ಳಿಕ್ಡ ಫಳ್ ದಿವುನ್ ಪಗಾಳತ್ಯಾ
7 ಹೀ ಬರಿ ಖಬರ್ ಕ್ರಿಸ್ತಾಚಾ ಇಸ್ವಾಸಾಚಾ಼ ಸೇವಕ್ ಆಮ್ಚೆ ಮಾಯೆಚಾ಼ ಜು಼ಡಿಚಾ಼ ಜಾ಼ಲ್ಯಾಲ್ಯಾ ಎಪಫ್ರಾಪ್ನಿ ತುಮಿ ಸಿಕ್‌ಲ್ಯಾಸಾ. 8 ಪವಿತ್ರಾತ್ಮಾನಿ ದಿಲ್ಯಾಲೆ ತುಮ್ಚೆ ಮಾಯೆಚೆ ಗುಶ್ಟಿತ್ ಸಾಂಗ್ಲ್ಯಾಲ ತ್ಯನಿಸ್.
9 ಆಸ ಆಸ್ತಾನಾ ಹೆ ತುಮ್ಚೆ ಮಾಯೆಚೆ಼ ಗುಶ್ಟಿತ್ ಆಮಿ ಐಕ್‍ಲ್ಯಾಲ್ಯಾ ದಿಸಾದರ್ನಿ ತುಮ್ಚಿಸಾಟಿ ಮಾಗ್ನಕರಾಚ಼ ಥಾಂಬ್ವಾಚೆ ಆಂದಿ, ತುಮಿ ಸಗ್ಳ ಗಿನ್ಯಾನಾನಿ ಬುದ್ದಿನಿ ಆತ್ಮಿಕ್ ಗಿನ್ಯಾನಾನಿ ಆನಿ ಸಮಜು಼ಕಿನಿ ಬರ‍್ಹಾಯಾ ವ್ಹಯಿಸಾ ಮನ್ಹುನ್, 10 ಪ್ರಭುಲಾ ಆವ್ಡಸಾರ ತುಮಿ ಚಾ಼ಂಗ್ಲಾ ಜೀವ್ನಾ ಕರಾಯಾ ವ್ಹಯಿಸಾ ಮನ್ಹುನ್, ಸಗ್‍ಳ್ಯಾ ಚಾ಼ಂಗಲ್ಯಾ ಕಾಮಾತ್ನಿ ಪ್ಯಾಯ್ದಾ ದಿಯಿತ್ ದೇವಾಚಾ ಗಿನ್ಯಾನಾನಿ ಬರುನ್ ರಾಯ್ಹಾವ್ಹಯಿ ಮನ್ಹುನ್, 11 ತ್ಯಚೆ ಮೈಮೆನಿ ಬರ್‌ಲ್ಯಾಚೆಗತ್ ಸಗ್ಳ ಬಳ್‍ ಗಿಹುನ್, ಸಗ್ಳ ಸಮಾಧಾನಾನಿ, ಖುಬ್ ಥಂಡ್ಪನಾನಿ ಸುಸ್ವುನ್ ಗಿಹ್ಯಾವ್ಹಯಿಸಾ ಮನ್ಹುನ್, 12 ದೇವಾಚಾ ಬಕ್ತಾಂಚೆಸಾಟಿ ಉಜೀಡ್‍ ಗೆತ್ಯಾಲ್ಯಾ ಆಮಾನಾ ಚಾ಼ಂಗ್ಲ ಮನ್ಹುನ್ ಕೆಲ್ಯಾಲ್ಯಾ ಬಾ ಜಾ಼ಲ್ಯಾಲ್ಯಾ ದೇವಾಲಾ ಸಂತೊಶಾನಿ ಕ್ರತಜ್ಞತಾಸ್ತುತಿ ಕರಾಯಾವ್ಹಯಿ ಮನ್ಹುನ್ ದೇವಾಪ ಮಾಕ್ತೊ. 13 ದೇವಾನಿ ಆಮಾನಾ ಆಂದಾರಾಚಾ ತಾಬ್ಯಾತ್ನಿ ಸುಡ್ವುನ್ ಆಪ್‌ಲ್ಯಾ ಮಾಯೆಚಾ ಲೆಕಾಚಾ ರಾಜಾತ್ ಆನ್ಲ. 14 ತ್ಯಚಿಪ್ನಿ ಆಮ್ಚಿ ಪಾಪ ಮಾಪ್ ಜಾ಼ಲಿತ ಆನಿ ಆಮಾನಾ ಸುಟ್ನುಕ್ ಮಿಳಾಲಿ.
ಮಾನುಸ್ ಆನಿ ಕ್ರಿಸ್ತಾಚ಼ ಕಾಮ್
15 ಕ್ರಿಸ್ತ ದಿಸತ್ ನಸ್‌ಲ್ಯಾಲ್ಯಾ ದೇವಾಚ಼ ರುಪ್ ಜಾ಼ಲ್ಯಾ, ಉತ್ಪತಿಲಾ ಸಗ್ಳೆ ಪೈಲಾ ಲ್ಯೊಕ್ ಜಾ಼ಲ್ಯಾ. 16 ಸ್ವರ್ಗಾತ್ ದರ್ತಿವ ಆಸ್ಲ್ಯಾಲ ದಿಸತ್ಯಾಲ ದಿಸತ್ ನಸ್ಲ್ಯಾಲ ಸಗ್ಳ, ಸಿಂಹಾಸನ್ ವ್ಹವುನಿ, ಪ್ರಭುತ್ವವ್ಹವುನಿ, ರಾಜ಼್‌ಬಾರ್‌ವ್ಹವುನಿ, ಹುಕುಮ್ ವ್ಹವುನಿ, ತ್ಯಚಿಪ್ನಿ ಆಲ್ಯಾಲ. ಸಗ್ಳ ತ್ಯಚಿಪ್ನಿಸ್ ತ್ಯಚಿಸಾಟಿಸ್ ಕೆಲ್ಯಾಲ. 17 ತ್ಯೊ ಸಗ್‌ಳ್ಯಾಂಚೆ ಆಂದಿ ಆಸ್‌ಲ್ಯಾಲಾ, ತ್ಯಚಿಪ ಸಗ್ಳ ಯೆಕ್ ವ್ಹವುನ್ ಹಾ. 18 ಸಬೆ ಮಂಥ್ಯಾಲ್ಯಾ ಶರೀರಾಲಾ ತ್ಯೊ ಡುಯಿಜಾ಼ಲ್ಯಾ, ತ್ಯೊಸ್ ಸುರ್ವಾತ್, ಸಗ್‌ಳ್ಯಾತ್ ತ್ಯೊ ಪೈಲಾ ವ್ಹಯಾಸಾಟಿ ಮೆಲ್ಯಾಲ್ಯಾತ್ನಿ ಪೈಲ್ಯಾನಿ ಉಟುನ್ ಆಲ್ಯಾಲಾ ತ್ಯೊಸ್. 19 ಕಾ ಮಂಜೆ ತ್ಯಚಿಪಸ್ ಸಗ್ಳ ರಾಹ್ಯಾವ್ಹಯಿ ಮನ್ಹುನ್, 20 ಆನಿ ತ್ಯೊ ಶಿಲ್ಬೆವ್‌ಲ್ಯಾ ರಕ್ತಾನಿ ಆಪ್ನು ಸಮಾಧಾನ್ ಕರುನ್, ದರ್ತಿವ ಸ್ವರ್ಗಾತ್ ಆಸ್ಲ್ಯಾಲ ಸಗ್ಳ ಆಪ್‌ಲ್ಯಾ ಲೆಕಾಸ್ ಲಾಗುನ್ ಆಪ್‌ಲ್ಯಾಲಾ ರಾಜಿ಼ ಕರುನ್ಗಿಯಾವ್ಹಯಿ ಮನ್ಹುನ್ ಬಾ ದೇವಾನಿ ಮನ್ಕೆಲ.
21 ಯಕಾ ಯಳಾತ್ ಯವ್ಡಸ್ ನವ್ಹ ತುಮಿ ದೇವಾಪ್ನಿ ದುರ್ ಹುತ್ತಾಸಾ ತುಮ್ಚಾ ಬುರ್ಶಾಕಾಮಾನಿ ಡಾವಾನಿ ತ್ಯಲಾ ವಾದಿಜಾ಼ಲ್ಯಾಸಾ. 22 ಆತಾತರಿ ದೇವ್ ತುಮಾನಾ ಯೇಸು ಕ್ರಿಸ್ತಾಚಾ ಶರೀರಾಚಾ ಮರ್ನಾಸ್ ಲಾಗುನ್ ರಾಜಿ ಕೆಲೆ. ದೇವಾನಿ ಆಪ್ಲಿಪ ತುಮಾನಾ ನಿರ್ಮಳ್, ದೊಸ್ ನಸ್ಲ್ಯಾಲ, ಚು಼ಕ್ ನಸ್ಲ್ಯಾಲ ವ್ಹವುನ್ ಉಬ ಕರಾಯಾಸಾಟಿ ಆಸ ಕೆಲ್ಯಾ. 23 ಆಬ್ಳಾಚೆ ಖಾಲ್ ಆಸ್ಲ್ಯಾಲ ಸಗ್ಳೆ ಉತ್ಪತಿಲಾ ಸಾಂಗ್ಲ್ಯಾಲ ಆನಿ ಐಕ್‌ಲ್ಯಾಲೆ ಬರೆ ಖಬ್ರಿನಿ ಗಾವಲ್ಯಾಲೆ ಆಶೆನಿ ಹಲಾಚೆ ಆಂದಿ ಇಸ್ವಾಸಾತ್ ರಾಯ್‌ಲ್ಯಾವ, ತುಮಿ ಪಾಯಾಜಾ಼ಲ್ಯಾಸಾ ಆನಿ ಘಟ್ ಆಸ್ನಾರಿ ವ್ಹಯಾ ವ್ಹಯಿಸಾ. ಹ್ಯಸ್ ಬರೆ ಖಬ್ರಿಲಾ ಪೌಲ್ ಮಂಥ್ಯಾಲಾ ಮಿ ಸೇವಕ್ ಜಾ಼ಲ್ಯೊ.
ಸಭೆಸಾಟಿ ಪೌಲಾಚ಼ ಸೇವೆಚ಼ ಕಾಮ್
24 ಆತಾ ಮಿ ತುಮ್ಚಿಸಾಟಿ ಖಾತ್ಯಾಲ್ಯಾ ತರಾಸಾತ್ ಮನಾ ಸಂತೊಸ್ ಹಾ. ಕ್ರಿಸ್ತಾಚಾ ದುಖಾತ್ ಕಮ್ಮಿ ಆಸ್ಲ್ಯಾಲ ತ್ಯಚೆ ಸಬೆ ಮಂಥ್ಯಾಲ್ಯಾ ಶರೀರಾಸಾಟಿ ಮಿ ಮಾಜಾ ಶರೀರಾತ್ ಅನ್ಬವಸುನ್ ಪುರ್ನ ಕರ್ತೊ. 25 ದೇವಾಚೆ ಯವಜ್ನಾ಼ಸಾರ ತುಮ್ಚಾ ಪ್ಯಾಯ್ದಾಸಾಟಿ ಮಿ ಸಬೆಲಾ ಸೇವಕ್ ಜಾ಼ಲೊ. ದೇವಾನಿ ಆಪ್ಲ ವಾಕ್ಯಾ ಸಗ್ಳ ಸಾಂಗಾಚ಼ ಕಾಮ್ ಮನಾದಿಲ್ಲ. 26 ಹ್ಯ ಆಡ್‌ಶಾ ಆಸ್ಲ್ಯಾಲ್ಯಾ ಖರ‍್ಯಾ ವಾಕ್ಯಾ ಪೈಲ್ಯಾ ಕಾಲಾದರ್ನಿ, ಪಿಡಿನ್ ಪಿಡಿ ದರ್ನಿ ಆಡಶಾ ಹುತ್ತ. ಫನ್ ಆತಾ ದೇವಾನಿ ತಿ ಆಪ್‌ಲ್ಯಾ ಲೊಕಾನಾ ದ್ಯಾವ್‌ಲ್ಯಾತ. 27 ಹ್ಯಾ ಗುಟಾಚಿ ಮೈಮೆ ಕ್ಯವ್ಡಿ ಮನ್ಹುನ್ ಸಗ್‌ಳ್ಯಾನಾ ಸಾಂಗಾಯಾ ದೇವಾಲಾ ಮನ್‍ ಜಾ಼ಲ್ಹ. ಹ್ಯ ಗುಟ್ ಕ್ಯಾ ಮನ್ಹುನ್ ಮೈಮೆಚೆ ಆಶೆಲಾ ಆಧಾರ್ ಜಾ಼ಲ್ಯಾಲಾ ಕ್ರಿಸ್ತ ತುಮ್ಚಿಪ ಹಾ. 28 ಆಮಿ ತ್ಯಚೆಸ್ ಗುಶ್ಟಿತ್ ಸಾಂಗ್ತಾವ್, ಸಗ್‌ಳ್ಯಾನಾ ಶಾನ್ಫನ್ ಸಾಂಗಿತ್, ಸರ್ವ್ಯಾನಾ ಪುರ‍್ಯಾ ಗಿನ್ಯಾನಾನಿ ಸಿಕ್ವಿತ್, ದೇವಾಚೆ಼ ಮೊರ್ಹ ಸಗ್‌ಳ್ಯಾನಾ ಕ್ರಿಸ್ತಾಪ ಸಗ್‌ಳ್ಯಾತ್ ಮೊರ್ಹ ಉಬ್ಬಿಕರಾಯಾ ಯತ್ನಕರ್ತ್ಯಾವ್. 29 ಹ್ಯಚಿಸಾಟಿ ಮಾಜಿಪ ಕಾಮ್ ಕರ್ನಾರ‍್ಯಾ ದೇವಾಚಾ ಬಳಾನಿ ಜ಼ಠುನ್ ಲಡ್ತೊ.