1 ತುಮಿ ದೇವಾಚಿ ಮಾಯೆಚಿ ಪೊರ ಜಾ಼ಲ್ಯಾಸಾ ಮನ್ಹುನ್ ತುಮಿ ತ್ಯಚೆಗತ್ ಚಾ಼ಲಾಯಾ ವ್ಹಯಿಸಾ. 2 ಕ್ರಿಸ್ತಾನಿ ಆಮ್ಚಿ ಮಾಯಾ ಕಿಲಿ ಆಮ್ಚೆ ಸಗ್‌ಳ್ಯಾಂಚೆ ಸಾಟಿ ಆಪ್‌ಲ್ಯಾಲಾಸ್ ದೇವಾಲಾ ಚಾ಼ಂಗಲ್ಯಾ ವಾಸಾಚಿ ದಿನ್ಗಿ ಯಜ್ಞ ದಿಲ್ಯಾ ಶಾರ್ಕ ತುಮಿ ಮಾಯೆನಿ ಚಾ಼ಲಾ.

3 ವ್ಯಭಿಚಾರ್ ಆನಿ ಕಸ್ಲೆ ತರಸ ಬುರ್ಸ ಪನ್ ನಾಹಿತ ಪೈಶಾಚಿ಼ ಆಶಾ ಹ್ಯಾಂಚಿ ಖಬರ್ ತುಮ್ಚಿಪ ರಾವುನಾಹಿ, ಹ್ಯಾತ್ನಿ ದುರ್ ರಾಹ್ಯಾಚ಼ ದೇವಾಚಾ ಪೊರಾನಾ ಬರ. 4 ಬುರ್ಶಾ ಬೊಲ್ಯಾ, ಖುಳ್ಯಾ ಬೊಲ್ಯಾ, ನಿಂದಾ ಹಿ ನಕೊತ. ಹಿ ದೆವಾಲಾ ಆವ್ಡತ್ನಾಹಿತ ಹ್ಯಂಚೆ ಬದಲ್ ತ್ಯಲಾ ಕ್ರತಜ್ಞತಾಸ್ತುತಿ ಕರಾ. 5 ವ್ಯಬಿಚಾರಿಲಾ , ಬುರ್ಸೆ ಚಾಳಿಚಾಲಾ, ಪಾಶಾನ ಪುಜ಼್‌ತ್ಯಾಲ್ಯಾಲಾ ಕ್ರಿಸ್ತಾಚಾ ಆನಿ ದೇವಾಚಾ ರಾಜಾತ್ ವಾಟ್ನಿ ನಾಹಿ ಮನ್ಹುನ್ ತುಮಾನಾ ಖರ ಟಾವ ರಾವುನಿ.

6 ಆದಾರ್ ನಸಲ್ಯಾಲ್ಯಾ ಬೊಲ್‌ನ್ಯಾನಿ ಕುನಿ ತುಮಾನಾ ಪಸ್ವುನಾಹಿ, ಆಸ್‌ಲ್ಯಾ ಕಾಮಾಸ್ಲಾಗುನ್ ದೇವಾಚಾ಼ ರಾಗ್ ತ್ಯಚ಼ ಐಕ್‌ಲ್ಯಾ ನಸ್‌ಲ್ಯಾಲ್ಯಾವ್ನಿ ಯತೊ. 7 ಮನ್ಹುನ್ ತುಮಿ ತ್ಯಂಚಿ ಸಂಗ ಎಕ್ ವ್ಹವು ನಕೊಸಾ.

8 ಕಾ ಮಂಜೆ ತುಮಿ ಮಾಗ್‌ಲ್ಯಾ ಕಾಲಾತ್ ಆಂದಾರಾತ್ ಹುತಾಸಾ, ಫನ್ ಆತಾ ತುಮಿ ಪ್ರಭುಪ ರಾವುನ್ ಉಜೀಡ್ ಜಾ಼ಲ್ಯಾಸಾ. ಉಜೀಡಾತಲ್ಯಾಂಚೆಗತ್ ಚಾ಼ಲಾ. 9 ಉಜೀಡಾಚ಼ ಪಳ್ ಮಜ಼ತೀತ್ ನೀಯೆತೀತ್ ಖರ‍್ಯಾತ್ ದಿಸುನ್ ಯತ. 10 ಪ್ರಭುಲಾ ಕಶಾನಿ ಸಂತೊಸ್ ವ್ಹಯಿಲ್ ಹ್ಯಚಿ ಪಾರಕ್ ಕರಾ. 11 ಉಪೇಗ್ ನಸ್‌ಲ್ಯಾಲ್ಯಾ ಆಂದಾರಾಚಾ ಕಾಮಾತ್ ವಾಟದಾರ್ ವ್ಹವು ನಕೊಸಾ ತೀ ಉಜಿಡಾಸ್ ಆನಾ. 12 ತೀ ಲೊಕ ಚು಼ರುನ್ ಕರ್ತ್ಯಾಲ್ಯಾ ಕಾಮಾಚ಼ ಸಾಂಗಾಯಾಬಿ ಲಾಜ಼್ವಾಟೆ. 13 ಉಜೀಡಾತ್ ಸಗ್‌ಳ್ಯಾ ಕಾಮಾಚ಼ ಖರ ಘುನ್ ಬಾಹಿರ್ ಪಡ್‌ತ್ಯಾತ.

15 ಮನ್ಹುನ್ ತುಮಿ ಕಸ ಜ಼ಗಾಚ಼ತ್ಯ ಶಾರ್ಕ ಬಗಾ. ಖುಳ್ಯಾಂಚೆಗತ್ ಜ಼ಗು ನಕೊಸಾ ಶಾನ್ಯಾಂಚಿಗತ್ ವ್ಹವಾ. 16 ಹೇ ತುಮಿ ಆಸಲ್ಯಾಲ ದಿಸ್ ಬುರ್ಸ ಹಾತ ಮನ್ಹುನ್ ಯೊಳ್ ಹಾಳ್ ಕರಾಚೆ ಆಂದಿ ಉಪೇಗ್ ಕರಾ. 17 ಆನಿ ಖುಳ್ಯಾಚೆಗತ್ ಚಾ಼ಲಾಚೆ಼ ಆಂದಿ ಪ್ರಭುಚ಼ ಮನ್ ಕ್ಯಾ ಮನ್ಹುನ್ ಸಮಜ಼ುನ್ ಗೆವಾ.

18 ದರಾಕ್ಷಿಚಾ಼ ರಸ್ ಪಿವುನ್ ಜಿಂಗತ್ ರಾವುನಕೊಸಾ. ತ್ಯನಿ ಹಾಳ್ ವ್ಹಯಾ ವ್ಹತ. ಫನ್ ಪವಿತ್ರಾತ್ಮಾನಿ ಬರುನ್, 19 ಕೀರ್ತನಾನಿ, ಸ್ತುತಿ ಗಿತಾನಿ, ಮನಾತಲ್ಯಾ ಗಿತಾಂಚಾನಿ ಯಕಾಮಕಾಸಂಗ ಬೊಲಾ ತುಮ್ಚಾ ಮನಾತ್ ಪ್ರಭುಲಾ ವವ್ಯಾಳಾ. 20 ಕವಾಬಿ ಸಗ್‌ಳ್ಯಾ ಕಾಮಾಸಾಟಿ ಆಮ್ಚಾ ಪ್ರಭು ಯೇಸು ಕ್ರಿಸ್ತಾಚಾ ನಾವಾನಿ ಬಾ ದೇವಾಲಾ ಸ್ತೊತ್ರಕರಾ.

21 ಕ್ರಿಸ್ತಾಚಾ ಭ್ಯಾನಿ ರಾಹುನ್ , ಯಕಾ ಮಕಾಚಾ ಆಧಾರಾನಿ ರಾವ್ಹಾ.

22 ಬ್ಯಾಯ್ಕಾನು, ತುಮಿ ಪ್ರಭುಲಾ ಕಸಿ ತಸಿ ತುಮ್ಚಾ ಘ್ವಾಂಚಾ ಹಾತಾಕಾಲ್ ಹಾಸಾ. 23 ಕ್ರಿಸ್ತ ಮಂಡಳಿಲಾ ಡುಯಿ ಹಾ ತಸಾಸ್ ಘೊ ದನ್ಗರಿಲಾ ಡುಯಿ ಜಾ಼ಲ್ಯಾ. ಕ್ರಿಸ್ತ ಆಪ್ನುಸ್ ಮಂಡಳಿಚಾ ಶರೀರಾಲಾ ರಕ್ಷಕ್ ಜಾ಼ಲ್ಯಾ. 24 ಮಂಡಳಿ ಕಸಿ ಕ್ರಿಸ್ತಾಚಾ ಹಾತಾಕಾಲ್ ಹಾ ತಸಿಸ್ ಬ್ಯಾಯ್ಕಾಂಚಾನಿ ಸಗ್ಳೆ ಗುಸ್ಟಿತ್ ಆಪ್‍ಲ್ಯಾ ಘ್ವಾಂಚಾ ಹಾತಾಕಾಲ್ ರಾಹ್ಯಾವ್ಹಯಿ.

25 ಘ್ವಾಸಾನು, ಕ್ರಿಸ್ತಾನಿ ಮಂಡಳಿಚಿ ಕಸಿ ಮಾಯಾಕೆಲೆ ತಸಿಸ್ ತುಮ್ಚೆ ಬ್ಯಾಯ್ಕಾಂಚಿ ಮಾಯಾ ಕರಾ. ಹ್ಯಚಿಸಾಟಿ ತ್ಯನಿ ಆಪಲ್ಯಾಲಾ ಬಲಿ ದಿಲ್ಯಾ 26 ಹ್ಯಚಿಸಾಟಿ ತ್ಯನಿ ಸಬೆಲಾ ದೆವಾಚಾ ವಚ಼ನಾಶಾರ್ಕ ಪಾನ್ಯಾನಿ ದುಹುನ್ ಶುದ್ ಕರುನ್ ಪವಿತ್ರ ಕರಯಾ ವ್ಹಯಿ ಮನ್ಹುನ್ ಆಪಲ್ಯಾಲಾ ಆಪ್ನು ಬಲಿ ದಿಲ್ಯಾ. 27 ಮನ್ಹುನ್ ತಿಲಾ ಕಸ್ಲಾ ಡಾಗ್ ಆನಿಯಾಕ್ ನಾಹಿಚೆಗತ್ ನಿರ್ಮಳ್, ನಿರ್ದೊಷ್ ನಸ್ನಾರಿ , ಮೈಮಾ ಆಸ್ನಾರಿ ಮಂಡಳಿ ಕರುನ್ ಆಪ್ಲೆ ಮೊರ‍್ಹ ಉಬಿ ಕರಾಯಾವ್ಹಯಿ ಮನ್ಹುನ್ ವಾಕ್ಯಾ ಸಾಂಗುನ್ ಪಾನ್ಯಾನಿ ಬಾಪ್ತಿಸ್ಮಾ ದಿವುನ್ ಶುದ್ಧ್ ಕೆಲಿತ. 28 ತಸಸ್ ಘ್ವಾಂಚಾನಿ ಸಾಯಿತ್ ಆಪ್‌ಲ್ಯಾ ಸ್ವತಾಚಾ ಶರೀರಾಚಿ ಮಾಯಾ ಕರತ್ಯಾತ ತಸಸ್ ಆಪ್ಲೆ ಬ್ಯಾಯ್ಕಾಂಚಿ ಮಾಯಾ ಕರ್ನಾರ ಜಾ಼ಲ್ಯಾತ. ಆಪ್ಲೆ ದನ್ಗರಿಚಿ ಮಾಯಾ ಕರ್ನಾರಾ ಆಪ್ಲಿ ಮಾಯಾ ಕರ್ನಾರಾ ಜಾ಼ಲ್ಯಾ. 29 ಕುನಿಸ್ ಕವಾಸ್ ಸ್ವತಾಚಾ ಶರೀರಾಚಾ಼ ರಾಗ್ ಕೆಲಾನಾಹಿ ನವ್ಹ, ಸಗ್‌ಳ್ಯಾಂಚಾನಿ ಆಪ್ಲ ಶರೀರ್ ಬಾಳ್ಗುನ್ ಕ್ಯಾಳ್ಜಿ ಕರ್ತ್ಯಾತ ಮಂಡಳಿ ಮಂತ್ಯಾಲ ಹ್ಯ ಶರೀರ್ ಕ್ರಿಸ್ತಾನಿ ತಸಸ್ ಬಾಳ್ಗುನ್ ಕ್ಯಾಳ್ಜಿ ಕರಿತ್ ಆಲ್ಯಾ. 30 ಮನ್ಹುನ್ ಮಂಡಳಿ ಮಂತ್ಯಾಲ್ಯಾ ಶರೀರಾಲಾ ಆಮಿ ಭಾಗ್ ಜಾ಼ಲ್ಯಾವ್. 31 ಹ್ಯಾ ಕಾರ್ನಾನಿಉತ್ಪತಿ 2:24 ಘೊ ಆಪ್ಲೆ ಐ ಬಾಲಾ ಸುಡುನ್ ಆಪ್ಲೆ ಬ್ಯಾಯ್ಕೊಸಂಗ ರಾನಾರ್, ತೀ ದೊಗ ಯಾಕುಸ್ ಶರೀರ್ ಜಾ಼ಲ್ಯಾತ. ಮನ್ಹುನ್ ಲಿವ್‌ಲ್ಯಾನವ್ಹ. 32 ಮೀ ಕ್ರಿಸ್ತಾಲಾಬಿ ಮಂಡಳಿಲಾಬಿ ಆಸ್‌ಲ್ಯಾಲೆ ಯಕಿಚೆ ಗುಸ್ಟಿತ್ ಬೊಲ್ತೊ, ಆಜು಼ನ್ ಪರೆತ್ ಚು಼ರುನ್ ಆಸ್‌ಲ್ಯಾಲೆ ಹೆ ಗುಟಚಾ಼ ಆರ್ಥ ಖುಬ್ ಕಿಮ್ತಿಚಾ಼. 33 ಫನ್ ತುಮ್ಚಿಪ ಪರತೆಕ್ ಘ್ವಾನಿ ಆಪ್ಲಿ ಮಾಯಾ ಕರ್ತ್ಯಾಚೆಗತ್ ಆಪ್ಲೆಬ್ಯಾಯ್ಕೊಚಿ ಮಾಯಾ ಕರಾಯಾವ್ಹಯಿ. ಪರತೆಕ್ ಬ್ಯಾಯ್ಕೊನಿ ಆಪ್‌ಲ್ಯಾ ಘ್ವಾಸಂಗ ಮರೆದಿನಿ ಚಾ಼ಲಾಯಾವ್ಹಯಿ.